Güei pudimos ver yá los coches nel so mediu natural: la pista, cola intención de dir desaniciando les duldes de cara a la temporada. Quiciás salgan decepcionaos los qu’esperaben una revolución, anque probablemente tovía nun tengamos visto nada en rellación a lo que vamos a ver el restu de la temporada.
Vettel foi el más rápidu del día, meyorando yá’l tiempu que marcó na Q3 del GP d’España, siguiolu Hamilton que foi quien a rodar nada menos que 156 vueltes (polo que paez tienen un oxetivu de rodar ente 600 y 800 km al día). Detrás d’ellos, Ricciardo estrenó el TAG-Heuer en tercer posición siguíu pol Williams de Bottas y el Force India de Celis.
Ente lo que tuvieron un día más complicáu ta McLaren, que tovía nun tenemos claro si empecipia a ver la lluz al final del túnel, anque Boullier nun paez tar mui contentu pesie a que llograron dar bastantes más vueltes que nel estrenu de l’añu pasáu. Tamién tuvo problemes Toro Rosso, onde la caxa de cambios fizo parar a Sainz pela tarde por precaución y nun lu dexó pasar de les 55 vueltes nun Toro Rosso “qu’estrenaba” PU Ferrari, eso sí, la evolución de 2015. Per detrás d’ellos quedaría Ericsson que pilotaba el Sauber C34 de 2015 a la espera d’estrenar el nuevu coche la selmana que vien. Manor llograba 54 vueltes y desaniciar el so nome de les últimes posiciones a les que tábemos avezaos mientres que Haas, nel so debut na competición, sufrió un fallu nel alerón delanteru que tamien los impidió siguir dando vueltes a Montmeló. Sicasí, nel equipu americanu paecíen enfotaos en que’l problema nun yera grave. Renault, a la cola, intenta recomponer l’equipu mientres intentaben resolver dalgunos pequeños problemes col coche (paez ser que col software) y nun pasaben de ser los más lentos del día.
Hai pistes que nos dan a entender que vamos tener coches más rápidos esti añu, poques sorpreses nos equipos a los que-yos ta costando entamar la temporada (nun dexa de ser curiosa la comparación ente Red Bull y Renault, llevando supuestamente la mesma PU anque la marca del toru la lleve renomada). Quiciabes Sauber, al salir coche del añu pasáu, seya la meyor referencia pa ver onde s’alluga’l restu en comparanza a la temporada pasada. Pero lo dicho, tovía nun salimos de les grandes incógnites que presenta esta temporada, veremos a ver mañana…
Los númberos en cuantes a meyores tiempos y rodaxe güei fueron estos:
| Pilotu | Equipu | Tiempu | Neumáticu | Vueltes |
|---|---|---|---|---|
| Vettel | Ferrari | 1:24.939 | M | 69 |
| Hamilton | Mercedes | 1:25:409 | M | 156 |
| Ricciardo | Red Bull | 1:26.044 | M | 87 |
| Bottas | Williams | 1:26.044 | M | 80 |
| Celis | Force India | 1:26.298 | S | 58 |
| Button | McLaren | 1:26.735 | S | 84 |
| Sainz | Toro Rosso | 1:27.180 | M | 55 |
| Ericsson | Sauber | 1:27.555 | M | 88 |
| Wehrlein | Manor | 1:28.292 | S | 54 |
| Grosjean | Haas | 1:28.399 | M | 31 |
| Palmer | Renault | 1:29.356 | M | 37 |