Tests de pretemporada

Por fin pudimos matar la sapera y pudimos ver les dos últimes selmanes a los coches que van a protagonizar les carreres esta temporada 2019 corriendo pela pista de Montmeló.  Estos coches estrenen los avances nes unidaes de potencia y l’adautación a les regles nueves d’aerodinámica pa esta temporada. Tamién foi l’estrenu de les gomes que van usase esti añu y de los sos nuevos nomes (de C1 a C5 de más duru a más blandu).

Vamos a dar un repasu a lo que pudimos ver equipu per equipu pa dexavos al final colos tiempos pa que saquéis les vuestres propies conclusiones. Sicasí, paez qu’esti añu va tar la cosa más apretada, sobre manera pela parte medio de la parriella.

• Ferrari: si en dalgo coinciden les quinieles ye en dar a Ferrari como’l coche más rápidu polo visto en Barcelona, ello ye que los tiempos axustaos por carga de combustible y goma utilizada dan-yos a ellos los meyores tiempos fieles al conceutu pol que venía apostando l’añu pasáu. Pesie al sustu del choque de Vettel por mor d’una llanta con dañu lo mesmo elli como Leclerc fueron quien a llevar al coche coloráu a bon ritmu dando a entender, amás, que teníen muncho más guardao.
• Mercedes: anque na primer selmana de test paecía qu’esta temporada los pillaba col pasu cambiáu, na segunda selmana apaecieron con un coche mui remocicáu qu’implementaba munches meyores. Al contrariu que’l restu de los coches el W10 de Mercedes ye un coche  con una distancia ente exes mayor y con una diferencia d’altor ente ellos (rake) más suave, asina l’equipu de Brackley siguía enfotáu na fórmula de los últimos años. Foi l’equipu que más kilómetros fexo na última selmana y de xuru volvió pa la fábrica con munchos datos qu’analizar pa ver onde-y pueden arañar a Ferrari esi mediu segundu que dalgunos dicen que-yos saquen.
• Red Bull: nun ta mui claro onde s’asitien les feches platiaes y l’equipu austriacu ente ellos.  El propulsor d’Honda paez que da bona siña de potencia, habiendo comentarios que falen de que pueden tar per delantre del Renault incluso, y toca trabayar na fiabilidá del mesmu (ensin quexa de momentu, sí que tuvieron problemes cola caxa de cambiu).  Con un diseñu d’unidá de potencia compactu que facilitó’l diseñu traseru enforma estrechu, puede ser el pasu alantre que precisaba l’equipu. Con un Verstappen que nun pudo poner el ramu a los tests a cuenta del incidente del so compañeru’l día enantes que los fexo usar pieces vieyes, habrá que ver cómo s’adauta Gasly, que como dicimos sufrió una salida de carretera na que dañó bastante’l coche, al equipu “mayor” de los de la bebida enerxética.
• Toro Rosso: beneficiándose tamién de l’arquitectura compacta de la unidá d’Honda y con muncha xente poniendo grandes espectatives nellos a cuenta de lo que se puede intuyir nestos primeros entrenos. El retu ensin dulda pa esti equipu sedrá ver cómo Kvyat s’adauta de vuelta y cómo evoluciona’l novatu Alexander Albon. Coles blimes qu’amosó nestes primeres vueltes del añu nun se puede descartar la sorpresa, anque hai que ser prudentes y ver como va desenrollándose’l restu de la temporada.
• Alfa Romeo: nun puedes esperar nada distinto faciendo siempre lo mesmo y por ello n’Alfa Romeo (yá ensin Sauber nel nome) nun duldaron n’arriesgar col diseñu del chasis aportando una solución sorprendente tocante al restu y con un alerón delanteru con una forma distinta a lo que veníemos viendo. Ye trabayu de Kimi y Antonio sacar tolo posible d’esti coche que puede siguir sorprendiendo y subiendo posiciones nun grupu nel que cualquier milésima va a marcar una diferencia bultable.
• Renault: la sensación ye que l’equipu francés tovía nun punxo toles sos cartes enriba la mesa, enfotáronse en tandes llargues y nun apretaron pa dar una pista d’au ónde podíen llegar. Fálase de ganancies en potencia, pero habrá que ver si les meyores aerodinámiques de los d’Enstone van a la par de lo que s’espera del equipu.
• McLaren: con nuevos pilotos y nueva dirección, por fin una pretemporada na que nun fueron noticia por problemes mecánicos. Les sensaciones son bones, nada del otru mundu, pero tampoco males. L’equipu de Woking súmase a les incógnites de mitá de grupu. Habrá que ver qué ye lo qu’aporta esa unidá de potencia de Renault y si fueron quien a dar cola tecla en cuantes al chasis. El meyor aniciu de temporada hasta la fecha pal equipu na nueva dómina de F1, pero habrá que ver hasta qué puntu.
• Haas: si l’añu pasáu l’equipu americanu salía de la pretemporada col cuartu meyor coche del campeonatu, nun ta tan claro en qué posición s’alcuentra’l coche d’esti añu.  Paez tar too más apretao y facer predicciones pela parte medio del paquete ye bien aventurao, polo que tendremos qu’esperar a les primeres carreres pa ver si Haas sigue siendo’l cuartu coche o en qué parte de la parriella van a tener que pelear. De momentu, los “trasgos” de los que falaba Guenther Steiner nun los dexaron rodar tolo cómodos que quixeren.
• Racing Point: cola incertidume de l’añu pasáu, nel momentu de pensar nel coche pa esti añu los de Silverstone optaron por basase nel modelu de 2018.  La idea yera adautalu pa la reglamentación d’esti añu y dir aplicándo-y anovamientos pa dir meyorándolu. Ta claro que tovía tienen que meyorar y siguir entendiendo’l coche si quieren tar na llucha poles places altes tres los trés grandes pero si hai un equipu que supo sacar lo meyor del presupuestu estos últimos años ye esti. Esperamos que’l coche qu’apaeza en Melbourne seya un avance bultable comparao colo que se pudo ver en Barcelona. ¿Dempués de los problemes financieros y les nueves regles que vienen sedrá esti un añu de transición pa ellos?
• Williams: tres perder dos díes y mediu por nun tener el coche preparáu pa salir al asfaltu, Williams ye una incógnita, anque paez que’l consensu ye asitialos como’l coche más lentu polo que llevamos viendo hasta agora. ¿Sedrá asina? ¿Tendrá capacidá de reacción? Probablemente veamos les coses más clares dempués d’un par de grandes premios.

Estos son los datos que nos dexaron estos tests:

Primer selmana

Segunda selmana

Total vueltes per equipu