Alborez otru día más en Montmeló y dientro de poco yá vamos tener los coches otra vegada en pista. Dempués del día d’ayeri, güei quédanos esperar ver confirmaes delles coses:
– per un llau, que McLaren-Honda atoparon el camín dulce a siguir y van poder tener otru día ensin nengún problema destacáu.
– per otru, si lo que pasa con Manor ye cosa del pilotu o en verdá la escudería nun ye tanto como prometía, a lo menos nestos tests. Güei va tar al volante Pascal Wehrlein.
– amás, quédanos por ver cuántos pasos alantre más puen dar en Mercedes, yá los víemos ayeri usar compuestos más blandos (que non los más, los ultrasoft entá quedaron guardaos nel garaxe) y si Ferrari, de la mano de Vettel, va tener un día tranquilín.
– el restu d’equipos van siguir nel so continuum de trabayu, y nós vamos poniendo munchu enfotu en ver cómo evoluciona’l C35 amás del coche del equipu Haas, aparte de mirar de regüeyu lo que faiga Renault, qu’ayeri tuvo un día medianamente buenu. Güei van tener otra oportunidá de dir puliendo les coses qu’entá-yos patinen nos sos respeutivos monoplaces.
La llista pilotos que van tar güei en pista ye la siguiente:
MERCEDES AMG F1: Lewis Hamilton / Nico Rosberg
SCUDERIA FERRARI: Sebastian Vettel
WILLIAMS F1 RACING: Valtteri Bottas
RED BULL RACING: Daniel Ricciardo
FORCE INDIA: Sergio Pérez
RENAULT: Kevin Magnussen
SCUDERIA TORO ROSSO: Carlos Sáinz Jr.
SAUBER F1 TEAM: Marcus Ericsson
McLAREN-HONDA: Jenson Button
MANOR: Pascal Wehrlein
HAAS: Esteban Gutiérrez
Al final del día atoparéis nel blogue un resume de tolo que pase güei en pista.