Tamos a piques d’entamar una nueva temporada de F1 y n’Asturies F1 queremos poner el ramu a la pre-temporada cola segunda parte de les reflexones sobre lo que vimos la selmana pasada nos entrenamientos nel circuitu de Sakhir.
Yá asoleyemos la primer parte d’estes reflexones, que podéis lleer equí, au analicemos un pocu lo que vimos en pista los tres díes de test y les sensaciones que nos tresmitieron los equipos. Güei completamos l’analís coles cinco escuderíes que nos queden.
ALFA ROMEO
Pesie a tolos cambios que vienen pal equipu, como la marcha de la marca n’acabando esti 2023, la verdá ye que nun notemos nada en pista que nos ficiera pensar que la escudería s’atopa nuna situación inestable. Ye más, anque tuvieron dalgún qu’otru problema, podríemos dicir qu’amosaron un bon rendimientu que probablemente punxera nerviosos a Alpine, Aston Martin, AlphaTauri y McLaren. En pista pudimos ver un bon coche, sólidu y nel equipu bones cares y confianza. Son bones noticies que tengamos otru equipu pa pelear por esi teóricu cuartu llugar que-y toca defender a Alpine.
ASTON MARTIN
Nun hai duldes qu’Aston Martin foi protagonista total d’estos test. Primero pol fechu de tener a Drugovich al volante en cuenta de Stroll que, como sabéis, tuvo un accidente entrenando que torgó la so presencia nos test y que tamién puede torgar el so debú na temporada el viniente fin de selmana. Sicasí, y pesie a qu’empezaron los test provocando la primer bandera colorada, el ritmu y les bones sensaciones de los dos pilotos, dieron motivos pa pensar qu’Aston Martin dio dafechu un pasu alantre y podríen metese na batalla que yá mentamos enantes falando d’Alfa Romeo.
HAAS
El 2022 de Haas, depués de cómo entamó, foi bonu. Abandonaron les últimes posiciones de la clasificación ya incluso fueron quien a facese con una pole. El so trabayu nos test foi bonu, con Hülkenberg adautándose a un coche totalmente nuevu pa él, y Magnussen sumando vueltes y sensaciones. El retu d’esti añu ye alloñase de los equipos del fondu de la tabla y arimase a la batalla pol cuartu puestu. Sedría una gran meyora si fueran quien a lluchar n’igualdá con estos equipos de la mitá de la tabla.
ALPHATAURI
Depués d’un 2022 bastante negativu y el cambiu de pilotu, AlphaTauri precisa, sobre too estabilidá. Los test nun dieron motivos pa pensar que vaigan dir les coses tan mal como en 2022, pero va ser dalgo que nun sabremos hasta que vaiga avanzando la temporada. Ye importante, creyemos, la bona adautación de De Vries al equipu ya’l pasu alantre de Tsunoda, que tien d’amosar que, nel so tercer añu na categoría y nel equipu, yá tien la madurez necesario pa ser el llíder que precisen.
WILLIAMS
L’equipu inglés zarró la clasificación varies vegaes nos últimos años, pero lo que vimos nos test d’esta pre-temporada dannos motivos pa ser optimistes colo que puedan quiciás suañar con nun quedar últimos esti 2023. Sedría un gran llogru pa ellos nun ser últimos, pero la competencia ye alta y cada puestu véndese caru.
Con esti post zarramos yá dafechu la pre-temporada y ponemos la vista yá na temporada qu’entama esti vienres colos entrenamientos llibres. Nun perdáis detalle d’esta nueva temporada n’AsturiesF1.