Cásique tres meses esperando, tres díes d’entrenamientos y pocu más de tres díes pal primer gran premiu de la temporada 2023. Esos son los númberos colos que zarramos la pre-temporada pa poner la vista na temporada 2023.
Rematamos unos test nos que munches cuestiones se resolvieron pero munches, munchísimes otres queden pendientes de responder. Nesti post vamos tentar d’analizar un pocu lo que vimos en pista estos díes y au creyemos que s’atopa cada equipu.
RED BULL
L’equipu de la bébora enerxético dexó claro estos díes en Sakhir que ficieron un bon trabayu demientres les selmanes de parón ente temporaes. Nun había razones pa nun creyer que’l bon trabayu fechu en 2022 diba continuase esti añu. Tienen una bona base de partida, y esti añu yera cuestión de dar un pasu más alantre. Queda ver hasta au son quien a llegar los dos pilotos, sobre manera nel casu de Sergio Pérez, que tien la solombra de Daniel Ricciardo como pilotu reserva en casu de que faiga falta. Parten como favoritos pa ganar esti añu, probablemente dambos campeonatos.
FERRARI
La sensación que nos dexó Ferrari nestos test foi la de trabayu, trabayu, trabayu. Dambos pilotos taben contentos col coche, marcaron bonos tiempos, nun tuvieron problema dalu del que preocupase y, en resume, los entrenamientos foron bien. ¿Sedrá suficiente pa batir a Red Bull? Pesie a que vimos dalgo de rebote nos coches, dalgo que nun vimos en Red Bull pesie a que sí tiníen momentos nos que’l coche paecía más nerviosu que davezu, eso nun paeció preocupar al equipu nin a los pilotos. Ye menor que lo que vimos en 2022, pero queda ver cómo se va portar el coche n’otros trazaos. Queremos creyer, pol aquel del espectáculu, que Ferrari tien potencial pa ser campeón esti añu tanto en pilotos como en constructores. Tres díes dicen pocu frente a ventitrés carreres y lo que precisa la Scuderia esti añu ye fiabilidá total y nun dexar espaciu pa los erros.
MERCEDES
Cuando’l dominiu de Mercedes na F1 yera total, si víemos que nun destacaben nes sesiones de test albidrábemos que yera porque taben tapándose, por nun amosar tolo que tiníen. Les más de les vegaes asina yera y asina se foi confirmando. L’añu pasáu esta fórmula dexó de funcionar y nesti 2023 tenemos les mesmes duldes. Depués d’un 2022 raru y mui complicáu, creyemos qu’esti 2023 nun va ser cenciellu pero tampocu tan difícil. Nun brillaron n’escesu nos entrenamientos, pero tampocu nun tuvieron grandes problemes. Sí ye verdá que vimos a Hamilton corrixendo muncho más de lo que nos tien avezaos. El rebote paez menor, mesmo que Ferrari y cásique cosa del trazáu qu’otra cosa, significativamente menor que’l del añu pasáu ya’l coche da sensación de fiabilidá, dalgo que sí tuvo en 2022. ¿Podrán con un coche fiable pero dalgo menos veloz que’l restu llegar a ganar los campeonatos? Nun queremos dicir que non, pero tampocu creyemos que lo vaigan tener fácil. Batir a un equipu como Ferrari ye complicao pero batir a dos equipos, sobre manera teniendo en cuenta la forma na que llega Red Bull, abulta mui difícil.
ALPINE
Alpine terminó’l 2022 como cuartu meyor equipu de la parriella, pero entama 2023 lloñe d’esa posición. Nun vimos en pista nada que nos ficiera pensar que pueden replicar el resultáu del añu pasáu. De fechu, viendo cómo vienen Alfa Romeo y Aston Martin, tenemos motivos pa pensar que van tener qu’ufrir muncho más que lo que vimos en Sakhir estos díes anque la dulda sigui ehí. Gasly nun paez que tuviera mayor problema p’adautase a les rutines del equipu, nuevu pa él, pero va tener trabayu que facer pa entrar en puntos con regulariedá. Siempre pasa con dellos equipos que da igual lo cerca que los sigas demientres los entrenamientos, nun termines de ver au tán. Esti sedría’l casu d’Alpine.
McLAREN
Casi podríemos copiar equí lo que tamos acabantes de comentar sobre Alpine nel comentariu de McLaren. Foi l’equipu que menos rodó en proporción con otros equipos, tuvo numberosos problemes que nun tenemos claro qu’haigan resuelto del too, y tampocu nun vemos sensaciones positives del equipu. Ye temprano pa xulgar nada, pero con Aston Martin fuerte, Alfa Romeo faciendo un gran trabayu, y Alpine ehí tamién, l’equipu de Woking va precisar muncho más pa nun perder tolo consiguío n’años pasaos y tentar de volver a facer podios. Col debú de Piastri pendiente y toles espeutatives qu’hai sobre’l so rendimientu, nun paez el meyor momentu pa entamar la temporada col pasu cambiáu. Queda ver qué pasa’l domingu de gran premiu.
N’otru post continuaremos col restu d’equipos de la parriella y les sensaciones que nos dexaron depués de los tres díes d’entrenamientos en Sakhir.