Test de pre-temporada: día 2

Pasamos el segundu día d’entrenamientos nel circuitu de Sakhir nel que, como ayeri, los equipos tuvieron probando, xirando y camudando aquellos detalles que nun funcionaron bien nel trescursu de les hores pasaes en pista.

Con tola información qu’atroparon ayeri, los equipos salieron nesti vienres a pista, pa siguir probando tandes llargues, curties, protocolu de salida y demás xestiones que vemos demientres un domingu de carrera. Nun hebo grandes problemas pa naide, sacante’l de Russell, que quedó paráu en pista na sesión de tarde por un fallu hidráulicu y que provocó una bandera colorada, mesmo que l’Alfa Romeo de Zhou, que quedó paráu na salida de pitlane, causando tamién una bandera colorada a diez minutos del final de la sesión de tarde y de la segunda xornada.

Los equipos trabayaron la xestión de la degradación coles gomes ufríes por Pirelli pa esti añu, sobremanera poniendo atención a les que van montar dientro d’una selmana pal primer gran premiu de la temporada. Dellos equipos coinciden que la degradación ta siendo bastante alto, quiciás más de lo qu’esperaben. Tamién tán tolos güeyos puestos en cómo van los fondos planos y los rebotes que tantos problemes dieron en 2022 a munchos equipos.

Ún de los equipos que paez nun tar llegando a los oxetivos marcaos al entamu de los entrenamientos ye McLaren. Ayeri, anque marcaron un bon tiempu, nun rodaron tolo que quisieron y güei tuvieron un día asomeyáu. Con tan pocos díes pa probar coses y correxir problemes, abulta que l’iniciu de temporada puede ser complicáu pal equipu de Woking. El mesmu discursu podríemos aplicalu a Haas.

Red Bull y Ferrari continuaron coles sos rutines en pista ensin problema dalu, cumpliendo colos sos programes. Alpine dieron meyores sensaciones qu’ayeri, mesmo qu’Alfa Romeo. Tamién hai que destacar el trabayu de los rookies De Vries (AlphaTauri) y Sargeant (Williams).

Mañana rematamos les tres xornaes d’entrenamientos de pre-temporada previes al entamu de la temporada 2023, onde yá diremos concretando más les coses de cara al primer gran premiu. Equí vos dexamos tolos númberos d’esti vienres: