A la fin tornaron los monoplaces a pista y pudimos dir viendo lo que tiníen qu’ufrir, en munchos casos mui estremao a lo que nos enseñaron nes presentaciones d’hai unos díes.
Nesti primer día, como ye lóxico, vimos muncha parafina, munches vueltes, muncho atropar información y, en definitiva, muncho probar. Nun podemos escaecer qu’esta tanda de test ye la única d’esta temporada y que’l primer gran premiu ye dientro d’unos díes, polo que los equipos trabayen escontra’l tiempu tentando de solucionar los problemes qu’asomen estos tres díes.
La sesión nun entamó bien p’Aston Martin, que namás salir a pista, y a diez minutos d’entamar la xornada, quedó paráu y provocó la primer, y única, bandera colorada del día. Hebo preocupación nel equipu, qu’atopó un fallu llétricu que foi lo que torgó parte de la sesión de Drugovich pero que terminó arreglándose y de fechu, con Fernando Alonso al volante, l’equipu púnxose segundu. Un bon cambiu con respeutu a la primer parte del día. Recordamos que Felipe Drugovich ta cubriendo’l puestu de Lance Stroll que tuvo un accidente entrenando y nun puede participar nes sesiones de test. En principiu’l canadiense ta en tratamientu fisioterapéuticu pa recuperar dafechu pa la primer carrera. En casu de que pudiera participar, Alonso va facese cargu de probar el coche nos dos díes que queden. Si non, l’asturianu va compartir llabor con Drugovich, que tendría de subise al coche tamién nel gran premiu.
Vimos munches duldes en McLaren, qu’acabó marcando un bon crono con Norris depués de pasar bastante tiempu no más baxo de la clasificación de tiempos, y tamién d’AlphaTauri. Max Verstappen marcó’l meyor tiempu con un coche qu’en dellos momentos abultaba un pocu nerviosu. Vimos dalgo rebote nos Ferrari y muncho menos con respeutu a 2022 nos Mercedes, y nengún de los dos equipos amosó, abúltanos, tol potencial de los sos coches. L’únicu pilotu de la parriella de 2023 que nun compitió güei, sacante’l yá mentáu Stroll, foi Sergio Pérez.
Como davezu, nun hai muncho que lleer nos tiempos y nel orde de la clasificación, pero equí vos dexamos los númberos d’esta primer xornada de test nel circuitu de Sakhir:
| Pilotu | Equipu | Tiempu | Vueltes |
|---|---|---|---|
| Max Verstappen | Red Bull | 1:32.837 | 157 |
| Fernando Alonso | Aston Martin | 1:32.866 | 60 |
| Carlos Sáinz | Ferrari | 1:33.253 | 72 |
| Charles Leclerc | Ferrari | 1:33.267 | 64 |
| Lando Norris | McLaren | 1:33.462 | 40 |
| Lewis Hamilton | Mercedes | 1:33.508 | 83 |
| Alexander Albon | Williams | 1:33.671 | 74 |
| Zhou Guanyu | Alfa Romeo | 1:33.723 | 67 |
| George Russell | Mercedes | 1:34.174 | 69 |
| Logan Sargeant | Williams | 1:34.324 | 75 |
| Nico Hülkenberg | Haas | 1:34.424 | 51 |
| Valtteri Bottas | Alfa Romeo | 1:34.558 | 71 |
| Nyck De Vries | AlphaTauri | 1:34.559 | 85 |
| Felipe Drugovich | Aston Martin | 1:34.564 | 40 |
| Yuki Tsunoda | AlphaTauri | 1:34.671 | 46 |
| Pierre Gasly | Alpine | 1:34.822 | 60 |
| Esteban Ocon | Alpine | 1:34.871 | 53 |
| Oscar Piastri | McLaren | 1:34.888 | 52 |
| Kevin Magnussen | Haas | 1:35.087 | 57 |
Mañana los coches tornen al circuitu de Sakhir pal segundu día de test.