Hai un par de selmanes entamemos la serie de previes de la temporada 2023 tanto a nivel xeneral como d’equipos y que vamos rematar güei cola segunda parte de les escuderíes.
Al final d’esti artículu vais poder atopar los enllaces a les otres dos previes, au fuimos considerando aspeutos que fuimos viendo na pre-temporada, nes presentaciones de coches y nes noticies en xeneral. Güei toca’l repasu a los cinco equipos que l’añu pasáu quedaron más arriba na clasificación.
McLAREN
Lando Norris
Oscar Piastri
MCL60
2022 foi un añu de sensaciones mecíes pa l’equipu de Woking. A la deceición de Ricciardo sumábase’l bon estáu de forma de Norris que, sicasí, nun foi abondo pa ser quien a quedar per delantre d’Alpine nel mundial de constructores. El culebrón col australianu yá llegó al so fin con final feliz tanto pal equipu como, creyemos, pal pilotu, y les enerxíes tán agora puestes na nueva incorporación: Oscar Piastri. McLaren va tener una combinación de pilotos mui mozo, pero al mesmu tiempu con un gran potencial. Norris yá demostró en munches carreres que ye un pilotu competitivu y que, anque tien coses que pulir, tien la capacidá de lliderar l’equipu en 2023. Piastri ye un talentu al que tol mundu quier ver n’aición, sobremanera depués de la forma na que despegó d’Alpine p’aterrizar en McLaren. Va tener qu’amosar que l’equipu inglés nun apostó por él pa nada. La escudería cellebra esti añu los sesenta años de la so esistencia, otra razón pola que querer facelo bien y quedar, a lo menos, cuarta nel mundial de constructores en 2023.
ALPINE
Esteban Ocon
Pierre Gasly
A523
Alpine va ser l’últimu equipu en presentar el so coche nesta pre-temporada y hai munches ganes de ver qué tien d’ufrir pa esti nuevu añu. Si en 2022 les rellaciones ente Ocon y Alonso yeren tenses, esti añu hai intriga por saber cómo va tar l’ambiente ente dos franceses que se conocen de va munchu tiempu. Hai quien diz que Gasly y Ocon nun se lleven demasiao bien, lo que podría condicionar la situación del equipu si la xestión falla. Sicasí, creyemos qu’Alpine tuvo de deprender dalgo del pasáu 2022, ente otres coses qu’una mala xestión d’equipu puede ser la diferencia ente quedar cuartu y meyor del restu o quedar quintu o pior. Dos pilotos franceses, nun equipu francés. L’escenariu nun podría ser meyor pa un equipu que va tener trabayu dende l’entamu y rivales que de xuru van poner toles torgues posibles pa que nun repita’l puestu de 2022.
MERCEDES
Lewis Hamilton
George Russell
W14
Si dalgo deprendimos tolos años de dominiu de Mercedes ye que nun son de cometer el mesmu erru dos vegaes. Por eso, albidramos que 2023 va ser mui estremáu de 2022 pues nun creyemos que vaigamos a ver otra vuelta al equipu alemán col pasu cambiáu. Ye más, abúltanos que nun somos los únicos que crucien los deos pa qu’ellos tamién se sumen a la llucha por dambos mundiales yá que, como dicía aquél: the more, the merrier. Yá comentemos nel zarru de la temporada pasada, que 2022 foi un añu de deprendizaxe pal equipu y pa los sos pilotos. Pal equipu por ver que tamién pueden cometer erros y que si amuesen debilidá, Red Bull (o otru equipu) va tar ehí p’aprovechase. Pa los pilotos porque, nel casu de Russell, foi un añu bien intensu y positivu pesie a too, porque amosó que tener a un siete vegaes campeón del mundu de compañeru nun lu pon nerviosu y paeciera que más que deprender tamién tien muncho qu’enseñar. Pa Lewis Hamilton tamién foi un añu de deprendizaxes, mesmo que pal equipu, d’avezase a vese superáu por un compañeru que ta acabante d’aterrizar, de baxar la cabeza y continuar trabayando por ameyorar lo posible pa que 2022 nun se repita. Nun sabemos de xuru lo que pasará en 2023 pero, insistimos, axallá Mercedes recupere la forma del pasáu y pueda sumase a la llucha polos dos mundiales.
FERRARI
Charles Leclerc
Carlos Sáinz
SF-23
2022 entamó nuna ñube pal equipu italianu que pasín ente pasu acabó tornando tormenta. Nun hai mundial de F1 que nun entame con Ferrari como candidatu a too y, por desgracia pa l’equipu y pa los fans, yá hai años que nun hai forma de que ganen nada. 2023 nun ye esceición y equí tamos preparaos pa cuntar con Ferrari en dambos mundiales. Cuidamos qu’esti 2023 nun vamos ver repitíos momentos daqué vergoñosos qu’echaron abaxu bones carreres de los dos pilotos. Hai ciertos erros qu’un equipu como Ferrari nun puede nin debe permitise. Pero nun hai meyor cosa que deprender d’esos mesmos erros y aplicar midíes pa que nun se repitan. Con esta mentalidá llega Ferrari a 2023 y cola necesidá de ganar, de sumar y d’ameyorar, al tiempu que termina de creyese que ye un equipu que puede tornar a ganar mundiales gracies a una de les combinaciones de pilotos más competitiva, si non la que más, de la parriella.
RED BULL
Max Verstappen
Sergio Pérez
RB-19
Mesmo que Ferrari, Red Bull ye ún d’esos equipos col que tenemos que cuntar pa ganar los dos mundiales dende la primer carrera. Ye verdá que pasaron unos años nos que nun foron quien a replicar los cuatro títulos ganaos con Sebastian Vettel, pero depués de dos años de trunfos nel mundial de pilotos y de tornar a ganar el de constructores, agora mesmo nun podemos nun cuntar con ellos. Sicasí, son conscientes de que’l dominiu de 2022 va ser complicao de replicar y que van tener que trabayar muncho por esos dos títulos. Nun va ser tampocu cosa fácil xestionar a los pilotos, sobremanera depués del final complicáu de la temporada pasada y con Ricciardo ehí pa recorda-y a Pérez que naide (sacante Max Verstappen) nun ye imprescindible. L’holandés tien la tarea de pelear por un tercer títulu del mundu al tiempu que tenta de llimpiar un pocu esa imaxe de malu que-y quedó de 2022. Nun sabemos qué nos espera en 2023, pero dalgo nos diz que vamos tener de sacar flaires más d’una vegada.
Equí rematamos la previa por equipos qu’entamáramos la selmana pasada. Como yá vos diximos entós, en cada equipu tenéis enllazada la galería o un vídiu pa que veáis con qué monoplaza se presenten a esti 2023 caúna de les escuderíes. Si queréis lleer les otres dos previes, podéis atopales nos siguientes enllaces: