La temporada 2023 yá ta casi equí: cuatro equipos yá presentaron los sos monoplaces de la qu’escribimos esti artículu, y pa dientro una selmana yá conoceremos al restu. Los test empiecen en menos de tres selmanes y abúltanos un bon momentu pa facer una previa de los equipos.
WILLIAMS
Alex Albon
Logan Sargeant
FW45
L’equipu Williams lleva dellos años nos qu’entamar cada temporada ye un trunfu. Esti 2023 nun ye esceición. Ye ún de los equipos que yá presentó’l so monoplaza y anque hai voces dientro del equipu que cuidan tener un añu amable, viendo les primeres sensaciones de lo que se ta faciendo col coche, la verdá ye qu’a estes altures yá nun sabemos si ye más ilusión que realidá. La escudería inglesa confirmó hai dellos díes al so nuevu xefe d’equipu, James Vowles, que nun va entamar a trabayar hasta tres díes primero de los test dalgo que nun tien por qué ser negativo pero que siendo Williams nun dexa de dar medrana. Dalguien dixo que Williams ye l’equipu al que tol mundu quier y ye cierto que somos munches les persones que naguamos por velos otra vuelta anque seya puntuando con regularidá. Esti año debuta Logan Sargeant y va tar acompañáu d’Alex Albon. Nun ye un par qu’entusiasme de primeres, pero de xuru que ganes de facelo bien nun van faltar. Hai munchos cambios que van tener que probase demientres esti añu y yá sabemos que cuando hai movimientu nes files nun suel ser bon síntoma, pero nel casu de la escudería de Grove, abúltanos que yera pernecesario osixenar un pocu l’equipu en tolos frentes, tamién nos pilotos y los patrocinadores.
ALPHATAURI
Yuki Tsunoda
Nyck De Vries
AT04
Si hai un equipu que precisa dexar 2022 nel pasáu ya enfocar el 2023 bien dende l’entamu ye AlphaTauri. Tres un añu mui deceicionante, con Gasly con un pie fuera del equipu y un Tsunoda mui irregular pesie a tener ameyorao comparao con 2021, la escudería hermana de Red Bull tien falta de dar un pasu alantre. Nun tien una combinación de pilotos mui potentes, si pensamos que Tsunoda va ser el veteranu del equipu nesti 2023, pero tienen recursos de sobra pa poder ameyorar lo que vimos l’añu pasáu. Col horizonte y la vista puesto en Ford, tienen dellos años p’amosar a la escudería hermana qu’en verdá son un bon escuderu nel qu’enfotase si lo precisen. El so sitiu debería tar peliando por ser el meyor del restu, como ficieron en 2022, pero hai munches duldes de si van ser quien a ello.
HAAS
Kevin Magnussen
Nico Hülkenberg
VF-23
Haas lleva dellos años nos que paeciera que tien más un pie fuera de la F1 que dientro. Depués d’un 2021 mui negativu, fueron quien a compensar con resultaos en 2022, col retornu de Kevin Magnussen depués d’un añu de retiru y l’enfotu de que Mick Schumacher podía tamién facer un bon papel. L’alemán yá nun tien asientu nel equipu estauxunidense, y va ocupar el so güecu el so compatriota, y veteranu de la F1, Nico Hülkenberg. Muncho s’escribió y faló de si yera o non bono qu’escoyeran a un pilotu veteranu en cuenta dar una oportunidá a talentu nuevo, pero abúltanos que Haas namás ta pensando na estabilidá y los resultaos que pueda conseguir con dos pilotos con muncha esperiencia como Magnussen y Hülkenberg. Camuden patrocinador principal pero Steiner continúa al frente d’un equipu que suaña con replicar una pole como la de 2022 o, meyor entá, xubir al podiu nuna de les ventitrés oportunidaes que va tener dende marzu.
ASTON MARTIN
Lance Stroll
Fernando Alonso
AM-23
Fernando Alonso sorprendió a mediaos de la temporada pasada con que camudaba de collores y diba d’Alpine, tres dos años deceicionantes, a Aston Martin. Naide nun entendía’l movimientu, munchos entá nun lo entienden, pero suponemos que si lo fizo ye porque dalgo enfotu tien na escudería comandada por Lawrence Stroll. Yá conocemos la capacidá del asturianu pa esprimir al másimu cualquier monoplaza, pero ye verdá qu’hasta que nun veamos resultaos, la dulda va tar viva siempre. Hai munches coses que tán cambiando nel equipu y yá dicíemos más arriba qu’esto a vegaes nun s’espeya nel rendimientu del coche en pista. Sicasí, nel casu d’Aston Martin sí paez que se tán faciendo les coses con enfotu y con una direición clara: xubir al podiu con regularidá nesti 2023 y, sobre too, al escalón más altu.
ALFA ROMEO
Valtteri Bottas
Zhou Guanyu
C43
La temporada 2022 d’Alfa Romeo nun foi brillante pero asina y too foi quien a quedar per delantre de rivales como Aston Martin y, sobre too, AlphaTauri. La escudería ta viviendo momentos de munchu cambiu. Alfa Romeo abandona’l barcu en terminando la temporada y Sauber va tar a cargu hasta qu’en 2026 entre Audi. Sicasí, la presencia del xigante alemán va dir notándose yá nesti 2023. No que cinca a los pilotos, opten por repetir dúo, dalgo que nos abulta positivo pa lo que precisa, que ye estabilidá. L’equipu tien un nuevu xefe al volante qu’en verdá nun va ser un xefe al usu, Alessandro Alunni Bravi, y que va trabayar a comuña con Andreas Seidl, que dexó McLaren pa ser CEO de Sauber. 2023 va ser pa ellos un añu de transición, de trabayar nel presente pero col güeyu puestu nos años que vienen. Col pasar de les selmanes veremos l’efeutu qu’eso va tener nel rendimientu y los resultaos de la escudería.
Dexamos pa la selmana viniente a los otros cinco equipos. Aprovechamos pa señalavos que tamos enllazando nesta previa les galeríes de los coches que se van presentando pa que podáis dir viendo cómo son los nuevos monoplaces. Nun escaezáis que tenemos una previa de la temporada yá fecha y que podéis lleer equí.