Les selmanes previes al entamu de la temporada de F1 enllénense de previsiones, de repasos y de resumes que lo dexen too embocao pa cuando llegue’l primer día de test de pre-temporada.
Nosotros entamamos güei esa previa, primero de la temporada en xeneral, y llueu de los equipos, que vamos dir asoleyando los martes d’equí a la selmana de los test. Güei yá podemos dicir qu’abrimos la temporada y lo facemos cola presentación online del coche pa 2023 de la escudería Haas. Dientro d’unos díes, cuando tengamos la información y semeyes de tolos coches atropaes, vos pondremos al día de la pinta que tienen.
Ventitrés oportunidaes van tener los pilotos y los equipos p’algamar victories que los lleven al ésitu en llegando a Abu Dhabi. Perdimos China pol camín, qu’entavía d’aquella siguía a vueltes cola xestión del coronavirus, y la organización de la F1 decidió dexar el númberu tar y nun buscar un sustitutu. Nun podemos quexanos, sicasí, ventitrés carreres abulten abondes pa esfrutar d’esta temporada.
Tenemos novedaes importantes nel calendariu. Aparte de la falta de China, coló Francia, dalgo que nun creo que muncha xente eche en falta más allá del fechu de que’l Paul Ricard seya un clásicu, anque agora daqué descafeináu. Tenemos un retornu ya una novedá a medies: Catar, que dexara 2022 en blancu por cuenta’l mundial, va acoyer otra vuelta un gran premiu de F1 y Las Vegas entra nel calendariu. Nun sabemos qu’esperar d’esti últimu eventu, aparte d’un cambiu de díes de competición y tolo que supón que la F1 torne a una ciudá como Las Vegas depués de cuarenta y ún años y tantos cambios. Amás, l’eventu únese al bayurosu grupín de carreres nuecherniegues y ye que con esi espectáculu de lluz que ye la ciudá norteamericana, paez que namás tien xacíu que se cellebre pela nueche.
Nun vamos entrar güei nel tema los equipos y pilotos más allá de mentar que vamos cuntar con dellos novatos ya un retornu nesta temporada: Oscar Piastri va debutar con McLaren, Nyck De Vries va facelo con AlphaTauri y Logan Sargeant con Williams. El retornu ye’l de Nico Hülkenberg, que depués de dellos años torna a la parriella de la F1, esta vegada al volante d’un Haas.
No que cinca a les espectatives de la temporada, asoleyaremos un post más alantre, faciendo un pocu de predicción de lo que creyemos que va ser la nueva temporada, depués de ver los coches nos test y les sos prestaciones con más detalle, pero naguamos por tener una temporada con más variedá nel podiu que la de 2022. Hai qu’almitir el grandísimu llabor de Red Bull l’añu pasáu pa crear un coche casi imbatible, pero por mor del espectáculu, esperamos que’l restu d’equipos faigan el so trabayu bien y tengamos dalgo más d’emoción en pista carrera tres carrera.
Tenemos munchu interés por ver cómo se van adautando a los sos equipos los nuevos xefes depués del gran movimientu de pieces que vivimos hai delles selmanes. Los güeyos tán puestos sobre manera enriba de Frédéric Vasseur, xefe d’equipu de Ferrari, por tolo que s’espera d’él. Ye verdá que cásique tolos años Ferrari parte cola obligación de ganar los dos campeonatos, pero abúltanos qu’esti añu la presión ye mayor depués de 2022 y de ver cómo teníen posibilidá de campionar, pero nun fueron quien a ello y non sólo pola superioridá de Red Bull si non polos erros propios y por nun saber aprovechar les oportunidaes que tuvieron. Ello ye qu’esti 2023, esperamos más de Ferrari. Abondo más.
Tamién esperamos más de Mercedes (yá vos diximos que cuantos más no cimero, meyor): depués d’un añu d’andar col pasu cambiáu y entá ser quien a ganar una carrera, 2023 nun puede repetir lo que vimos l’añu pasáu. La zona medio de la tabla tamién debiera tar interesante, esperando qu’Aston Martin dea un pasu alantre importante y pueda competir con McLaren y Alpine por, en principiu, ser los meyores del restu, ello ye, cuartos nel mundial. Podríemos sumar a esti llistáu a AlphaTauri, pero hasta que nun veamos un pocu lo que faen nos test y cómo entamen la temporada, queremos más dir con curiáu.
Nun podemos terminar ensin mentar la llucha por nun ser últimu. Los años caberos anduvo ente Haas y Williams la cosa. Nun sabemos nel casu del equipu de Grove si van ser quién a pegar l’arreón necesariu pa ponese al altor del restu cuntando con que Haas tenga un rendimientu anque seya asomeyáu al de 2022. Alfa Romeo nun debiera tener problemes tamién pa evitar ser últimu, pero los cambios que tán afeutando al equipu pol futuru inmediatu de Sauber con Audi, déxanos la dulda de lo que pueda pasar no que cinca al so rendimientu en pista.
Zarramos esta previa dexándovos los enllaces con tola información que precisáis pa, por si tovía nun lo ficisteis, ponevos al día cola nueva temporada. Alcordaivos tamién que los vienres vamos asoleyando boletinos coles noticies de la selmana.
Pilotos y equipos
Calendariu
Presentaciones de los coches
Circuitos