Como ye vezu nestes feches del calendariu nel que tol mundu ta descansando, entamen a movese los filos de lo que va ser la temporada 2024 no que cinca a pilotos y personal d’equipos.
A fecha de siete d’agostu tenemos qu’almitir qu’esta silly season abulta más tranquila que la pasada, anque tien potencial de tornase bien interesante dependiendo de los pasos que vaigan dando los protagonistes. Por exemplu, tamos pendientes del futuru de Lewis Hamilton, qu’anque cuntamos que seya en Mercedes, entavía nun ta zarráu. Lo mesmo podemos dicir de Charles Leclerc de quien se comenta tendría un pie fuera de Ferrari. Nada, sicasí, ta confirmao, y esti post va quedar abiertu y n’actualización constante d’equí hasta que too quede zarrao. Como yá ficimos otros años, diremos ampliando les noticies dende que vaigan saliendo.
Y anque nun tiníemos oficialmente entamada la silly season d’esta temporada, quiciás podemos meter nella los recientes movimientos n’Alpine, cola salida de Otmar Szafnauer y Alan Permane del equipu. El gran premiu de Bélxica pasáu foi la so última carrera como xefes nel equipu francés y anque nada nun se sabe del futuru de nengún de los dos, sí qu’hai quien comentó que Szafnauer falara con Aston Martin. Insistimos, nada nun ta confirmao, tampoco nel casu d’Alpine, que nun paez tener muncha priesa en cubrir oficialmente los dos güecos que dexen Szafnauer y Permane.
Lo lóxico tendría sío tamién que nesti parón braniegu vos anunciáravos la salida de Nyck de Vries y la entrada de Daniel Ricciardo pa sustituyilu pero, como sabéis, Red Bull nun quixo esperar y yá tenemos al australianu totalmente integráu otra vuelta nes carreres de F1.
Dexamos pues esti post abiertu a toles actualizaciones que vaigamos teniendo estes selmanes de descansu y tamién nes que vienen de campeonatu:
24 D’AGOSTU 2023
L’equipu Haas confirma a Kevin Magnussen y Nico Hülkenberg como pilotos pa la temporada 2024.
31 D’AGOSTU 2023
Mercedes y Lewis Hamilton firmen un contratu col que l’inglés tará nel equipu nos próximos dos años, 2024 y 2025. Per otru lláu, George Russell tamién sella’l so futuru inmediatu con Mercedes y firma por dos años más de contratu col equipu alemán.
14 DE SETIEMBRE 2023
Alfa Romeo confirma a Zhou Guanyu pa 2024. El pilotu chinu va continuar otru añu más nel equipu xunto a Valtteri Bottas.
20 DE SETIEMBRE 2023
McLaren allarga la so rellación con Oscar Piastri. El pilotu australianu va tar nel equipu hasta l’añu 2026.
23 DE SETIEMBRE 2023
AlphaTauri confirma a Yuki Tsunoda y Daniel Ricciardo como pilotos pa 2024.