Tornamos a l’actividá formulera, depués del parón, y nun hai meyor manera que poniéndonos al día colos cambios que tamos teniendo de cara a 2023. Cambios dellos inesperaos y que configuren una parriella pa 2023 qu’entavía que lloñe de tar completada. Diremos como davezu actualizando esti post con toles novedaes que vaigamos recibiendo. Asina tamos:
XUEVES, 28 DE XUNETU
Sebastian Vettel anuncia la so retirada de la competición pa 2023. El pilotu alemán confirmó nesti día que va dexar la Fórmula 1 n’acabando esta temporada.
LLUNES, 01 D’AGOSTU
Fernando Alonso anuncia que cola d’Alpine pa pilotar n’Aston Martin en 2023 depués de que na escudería de Lawrence Stroll quedara un güecu llibre cola marcha de Sebastian Vettel. L’asturianu firma un contratu de varios años.
MARTES, 02 D’AGOSTU
Alpine da anuncia de que va cuntar con Oscar Piastri, pilotu reserva del equipu y vixente campeón de F2. Sicasí, hores depués, el propiu pilotu desmintión la información diciendo nes sos redes sociales que nun va ser pilotu d’Alpine pa 2023. Ello ye, Alpine sigui teniendo un asientu llibre pa 2023.
MIÉRCOLES, 03 D’AGOSTU
Williams confirma a Alexander Albon como pilotu pa 2023. El pilotu tailandés firma un contratu por varios años.
MIÉRCOLES, 24 D’AGOSTU
McLaren confirma que Daniel Ricciardo va dexar de ser pilotu de la escudería en terminando esta temporada pesie a que l’australianu entá tien un añu de contratu col equipu inglés.
VIENRES, 26 D’AGOSTU
Audi anuncia que va entrar na Fórmula 1 nel añu 2026. Entavía nun se sabe de la mano de qué equipu porque la marca entraría como motorista y non como escudería independiente.
VIENRES, 02 DE SETIEMBRE
McLaren confirma qu’Oscar Piastri va ser el so pilotu pa 2023, acompañando a Lando Norris. El CRB, encargáu de decidir la validez y conformidá de los contratos en F1, intervino pa decidir si’l de la escudería inglesa col pilotu australianu yera válidu o si, pola contra, yera Alpine quien tinía razón. L’ente dio la razón a McLaren, que confirma al pilotu pa 2023 y 2024.
XUEVES, 22 DE SETIEMBRE
AlphaTauri confirma a Yuki Tsunoda como pilotu pa 2023.
VIENRES, 23 DE SETIEMBRE
Williams da anuncia de que Nicholas Latifi nun va continuar na escudería británica en 2023.
MARTES, 27 DE SETIEMBRE
Alfa Romeo confirma que Zhou Guanyu va continuar como pilotu cola escudería en 2023.
SÁBADU, 08 D’OCHOBRE
Alpine confirma a Pierre Gasly como pilotu pa 2023 xunto a Esteban Ocon.
AlphaTauri fai oficial que Nyck de Vries va ser pilotu de la escudería pa 2023 xunto a Yuki Tsunoda.
SÁBADU, 22 D’OCHOBRE
Williams confirma que Logan Sargeant va ser pilotu de Williams en 2023 pero sólo si consigui los puntos de superlicencia necesarios pa poder competir en Fórmula 1.
MIÉRCOLES, 26 D’OCHOBRE
Sauber confirma que va trabayar con Audi a partir de 2026, cola entrada del equipu alemán como motorista na Fórmula 1.
MARTES, 01 DE PAYARES
Aston Martin confirma a Stoffel Vandoorne como pilotu reserva de la escudería.
XUEVES, 17 DE PAYARES
Haas confirma que Mick Schumacher va dexar de ser pilotu del equipu pa 2023 y que va cuntar con Nico Hülkenberg pa sustituyilu.
DOMINGU, 20 DE PAYARES
Williams fai oficial a Logan Sargeant como pilotu pa 2023 depués de que l’estáuxunidense asegurara los puntos de la superlicencia necesarios pa competir.
MIÉRCOLES, 23 DE PAYARES
Red Bull confirma a Daniel Ricciardo como tercer pilotu pa la temporada 2023.
MARTES, 29 DE PAYARES
Ferrari confirma la dimisión de Mattia Binotto como xefe d’equipu. Entavía nun se conoz el nome de quien lu va sustituyir.
XUEVES, 1 D’AVIENTU
McLaren confirma a Alex Palou como pilotu reserva del equipu. El pilotu catalán siguirá compitiendo n’IndyCar y va combinar esi llabor col de pilotu de McLaren.
MIÉRCOLES, 7 D’AVIENTU
Red Bull confirma a Zane Maloney como pilotu reserva del equipu. El pilotu de Barbados quedó segundu nel campeonatu de F3 de 2022.
LLUNES, 12 D’AVIENTU
Jost Capito y FX Demaison dexen de ser xefe d’equipu y direutor téunicu respeutivamente del equipu Williams.
MARTES, 13 D’AVIENTU
Ferrari confirma a Fred Vasseur como xefe d’equipu pa sustituyir a Mattia Binotto. El güecu que dexa en Sauber (non el d’Alfa Romeo), va ocupalu Andreas Seidl, que dexa de ser xefe d’equipu de McLaren. En marchando Seidl, Andrea Stella ocupa’l so llugar en McLaren.
XUEVES, 15 D’AVIENTU
L’equipu Mercedes confirma a Mick Schumacher como pilotu reserva pa la temporada 2023.