Entá nos queda más d’una selmana pal prósimu gran premiu (Bélxica) pero la Fórmula Uno sigue dando noticies. Y ye que tamos en medio de lo que yá se conoz dende va tiempu como silly season, esi momentu na temporada na qu’empiecen los rumores sobre pilotos diendo y viniendo d’equipu n’equipu. 2016 nun diba ser diferente.
Podemos empezar por comentar que dende la prósima carrera vamos tener una cara nueva na parrilla, anque nun seya un desconocíu: Esteban Ocon va sustituyir a Rio Haryanto nel Manor. Lo qu’empezare siendo rumor (el gobiernu d’Indonesia nun taba faciendo los pagos necesarios pa que’l pilotu pudiera siguir sentáu nel so coche) acabó por facese real hai unos díes, cuando Manor confirmaba que diben tener a Ocon como compañeru de Wehrlein. Diose asina puerta a los rumores que vinculaben a Vandoorne col equipu, y refuérciase la presencia de Mercedes en parrilla qu’asitió en Manor a dos pilotos del so programa. Ocon taba compitiendo con Mercedes en DTM mientres facía les llabores de reserva de Renault y segundu reserva de Mercedes.
Continuamos col futuru del pilotu de McLaren Jenson Button. Lleva un par d’años yá nos que l’equipu dexa pa última hora la decisión de quedase con elli o non, ya esti añu comentaren que hasta setiembre nun diben empezar a tratalo. Lo que ta claro ye que los güeyos del equipu británicu tán más enriba de Vandoorne que nunca, y los de Williams en Button. Los de Grove nun dexen d’afalagar al inglés, anque siempre dexando claro que nun van esperar eternamente a que tomen una decisión. Paez claro que McLaren va quedase con Alonso, pero la identidá del so futuru compañeru en 2017 entá nun ta clara. Jenson paez que va a aprovechar el branu pa facese una idea de que dirección quier tomar la so carrera dientro de les opciones que tien.
Y falando de Williams, cada vegada ta más claro que nun van cuntar con Massa pa 2017, lo que dexaría’l sitiu pa la posible llegada de Button, y hai quien diz que Bottas podría nun quedar tampoco. A Button súmase tamién Kvyat, pa los optimistes que piensen qu’entá va tener sitiu na F1 dempués d’esti añu. Y los futuros rookies, nun podíen faltar nel bombu, Alex Lynn (pilotu de desarrollu de Williams y previamente nel programa de Red Bull que compite agora en GP2 y que ya descarta correr una tercer temporada na serie) y Lance Stroll (na Fórmula 3 y pilotu desarrollu de Williams).
Renault y Force India tán tamién nel puntu mira. Los segundos pol fechu de que munchos piensen que Sergio Pérez va dexar l’equipu pa xunise a Williams anque tenga firmáu contratu con Force India pa 2017. En Renault, porque l’asientu de Palmer nun paez tar aseguráu, mesmo que’l de Magnussen, y tamién falen de Sergio Pérez como posible sustitutu,. La entruga ye…¿si Pérez se mueve, pa quién quedaría’l so sitiu? ¿Quiciás Sáinz como apunten dalgunos otros?
Tamién se fala de Nasr saliendo de Sauber o de que los pilotos de Haas pa 2017 podríen nun ser los mesmos, pero ta claro qu’equí entramos nel xuegu de los equipos de caltener un pocu l’interés d’unos ya otros pensando yá na prósima temporada.
Pa resumir, güeyos puestos no que fagan Pérez y Williams, porque los sos movimientos van ser la clave pa los que van venir dempués.
Si dalgo nos tienen enseñao les temporaes pasaes, ye que la mitá los rumores de la silly season queden namás que nel intentu d’unos cuantos de colgase la medalla del “díxelo yo primero”. N’unes selmanes veremos a quién-y toca quedase col oru.
Actualización 01/09/2016: Felipe Massa anuncia la so retirada de la Fórmula Uno, dexando asina un asientu vacíu en Williams pa 2017.
Actualización 02/09/2016: Jenson Button anuncia la so retirada de la competición en 2017 anque va siguir trabayando como pilotu de desarrollu con McLaren y dexa la puerta abierta a volver en 2018. Stoffel Vandoorne pasa a ser compañeru de Fernando Alonso pa la prósima temporada.
Actualización 14/10/2016: Renault confirma a Nico Hülkenberg como pilotu pa 2017.
Actualización 03/11/2016: Williams confirma a Valtteri Bottas y Lance Stroll como pilotos pa 2017.
Actualización 09/11/2016: Renault confirma a Jolyon Palmer como pilotu pa 2017.
Actualización 11/11/2016: Haas confirma a Kevin Magnussen como pilotu pa 2017.
Actualización 21/11/2016: Sauber confirma a Marcus Ericsson como pilotu pa 2017.