Segunda tanda de test

L’últimu pasu per pista hasta llegar a Australia dientro mediu mes llargu empecipia mañana. Tornen los test con dellos aspeutos interesantes.
En primer llugar, yá vamos poder ver el C35 en tol so esplendor yá que Sauber va ponelu a rodar mañana. Ellos yeren ensin duldes la incógnita más grande de los test pasaos. Tamién nos queda por ver tol potencial (o’l que nos quieran enseñar) del Toro Rosso, al que nun sabemos si veremos yá con tolos patrocinaores o entá tendremos d’esperar.

El restu de la parrilla ta, más o menos, onde se-y esperaba, con pinta más o menos prometedora, pero ensin sorprender demasiao. Siguimos mui pendientes de Haas y Manor, los primeros pol bon facer de la primer tanda de test, los segundos pol despliegue que siguen amosando de cara a la nueva temporada (ente otres coses, col fichaxe del que fuera un pesu pesáu de McLaren cuantayá, David Ryan).

Na cabeza, naguamos por ver a Mercedes montando neumáticos blandos y dexando d’esconder les so cartes p’asina ser quien a afirmar o non, que’l pasu alantre de Ferrari con respeuto a ellos ye real.

Tolos güeyos van tar tamién posaos en McLaren, onde tarán toos colos deos cruzaos pa que nengún problema-yos torgue los díes de test que tienen per delante (algo que, per otru llau, tolos equipos deseyen).

Equí vos dexamos la llista completa de tolos pilotos y los díes nos que van tar al volante. Manor entá nun confirmó quién tará nel coche dende’l miércoles. Echái una güeyadina a les previes diaries de los test onde vais atopar los pilotos de cada sesión.

 

E.C.* : Ensin confirmar