Previa del Gran Premiu d’Italia 2023

Entavía recuperando de les emociones vivíes nel circuitu de Zandvoort hai namás unos díes, ponemos los güeyos en Monza pal viniente gran premiu de la temporada, l’últimu n’Europa.

L’Autodromo de Monza yá tien too preparao pa recibir otru añu más de F1, d’emoción y de tifosi que nagüen por presenciar una bona carrera del so equipu de referencia. Ferrari, sicasí, tien abonda xera per delantre si quier cellebrar anque seya un podiu colos sos aficionaos na carrera d’esti 2023. La victoria abulta alloñada si les coses trescurren con normalidá, ello ye, si Verstappen nun tien nengún problema col so monoplaza. En casu de ganar l’holandés sumaría yá diez victories siguíes nesti 2023, cifres de récor que nun paez que vaigan tener final nes selmanes vinientes.

Aparte de lo que pase nel circuitu, el focu d’atención va tar tamién nel equipu Mercedes. Lewis Hamilton firmó un acuerdo pa siguir otros dos años na escudería. Dos años que, suponemos, sirvirán tanto al pilotu como al equipu pa ver cómo plantegar los cambios de 2026 ya’l so futuru xuntos. Con esta firma, zárrase un pocu la puerta a la especulación o más bien desviase de Hamilton, que tinía nes sos manes la llave p’abrir la caxa de la silly season si tuviera decidío salir del equipu alemán. Falárase d’una posible salida de Leclerc de Ferrari, tamién de la situación de Sáinz, que nun paez atopase a gusto del too. Sicasí, cola firma de Hamilton, esi posible asientu llibre en Mercedes queda ocupáu y los movimientos del restu de pilotos queden más llimitaos. Tenemos d’almitir que nun ta cumpliendo cola tradición y esta silly season ta siendo bastante tranquila, como podéis comprobar equí.

Amás, Mercedes tamién firmó una estensión de dos años del contratu de George Russell, sellando asina’l futuru del inglés y dando estabilidá a la so alliniación de pilotos pa les vinientes dos temporaes.

Entavía queden abondes carreres pa que veamos la última bandera a cuadros de la temporada, pero hai dellos pilotos que yá entamen a sintir la presión con respeutu al so futuru nel equipu nel que tán. Monza va ser otra oportunidá de reivindicase y amarrar otru añu más na másima competición de motor. Falamos de casos como’l de Logan Sargeant. L’equipu Williams dio un pasu alantre dende l’entamu de la temporada, pero les actuaciones más destacaes tán siendo les d’Alex Albon. Sargeant suma accidentes ya problemes col coche que nun terminen de dexanos velu competir a bon rendimientu, lo que fai que les sos oportunidaes de siguir en 2024 vaigan siendo cada vegada más febles. En Monza tien la necesidá de, primero terminar la carrera y segundo tentar, polo menos, d’averase lo más posible a Albon si nun ye quien a superalu.

Red Bull nun dexa d’insistir que Sergio Pérez nun tien nada de qué preocupase pa 2024, pero conociendo cómo funciona l’equipu abúltanos que’l mexicanu tien abondos motivos pa facelo. Primero del parón braniegu tuvo delles actuaciones bastante probes, con problemes pa entrar na Q3 y lloñe del podiu. El domingu pasáu clasificó lloñe de la cabeza y en carrera acabó cuartu por una penalización. Nun tenemos claro que, si les coses nun ameyoren, l’equipu de la bébora enerxético nun decida mirar a otros pilotos pensando nun remplazu pa Pérez. El mexicanu precisa brillar en Monza y endrechar el camín nes carreres vinientes, pa terminar de convencer y convencese de que ye un pilotu competitivu que puede tar al altor de Verstappen.

Vamos tar sollertes tamién al segundu gran premiu de Liam Lawson como pilotu d’AlphaTauri, el primeru nel que va poder disputar toles sesiones de llibres. Si vos alcordáis, el neozelandés tuvo de sustituyir a Daniel Ricciardo que rompió’l metacarpu de la mano drecha nun accidente’l vienres. En principiu pa Singapur deberíemos tener al australianu de vuelta, pero de momentu ye Lawson el pilotu oficial. Nel so debú foi quien a quedar per delantre de Tsunoda, que tuvo penalización al final de la carrera, y de ver la bandera a cuadros ensin ser últimu, dalgo mui valoratible pa ser la so primer carrera y con un coche que nun ye competitivu. En Monza tien la segunda oportunidá d’amosar les sos habilidaes al volante.

Monza ye amás escenariu escoyíu pa replicar lo que yá se fizo n’Hungría col tema de les gomes. Los pilotos van tener que disputar les sesiones de clasificación con gomes asignaes para cada sesión: Q3 dures, Q2 medies y Q1 blandes. N’Hungría yá dio dellos resultaos inesperaos y queda ver si en Monza tien el mesmu efeutu. De xuru que munchos equipos recordarán la bona xestión de gomes que fizo Alfa Romeo, que probara nes sesiones de llibres les gomes más dures cuando casi naide lo ficiera y llueu consiguió una bona clasificación.

Ensin más, equí vos dexamos tola información de la última carrera en territoriu européu:

Y éstes son les gomes que van usar los equipos pa esti fin de selmana: