Previa del Gran Premiu d’Hungría 2023

Dexamos atrás les curves rápides de Silverstone y aterrizamos nun de los circuitos preferíos por pilotos, equipos ya siguidores en xeneral, el Hungaroring.

Y llegamos con una noticia que nun dexa de ser sorprendente pesie a que d’una forma o otra, toos esperábemos por ella y ye que Daniel Ricciardo va sustituyir a Nyck de Vries al volante del AlphaTauri. Ye verdá que dalgunos pensábemos que Red Bull esperaría al parón braniegu pa facer el cambiu y quiciás asina facilitar a Ricciardo la transición de tar fuera de la F1 a vese dientro otra vuelta, amás nun circuitu como Hungría que nun ye precisamente fácil de llevar pal coche que va manexar. Sicasí, paez que dende la cúpula del equipu decidieron que diez carreres yeren abondes y que’l destín de de Vries ta lloñe d’un volante de F1. Hai quien diz que ye inxusto pal pilotu holandés, hai quien diz que cuando entres en Red Bull sabes que nun van tener nengún tipu de consideración si nun rindes, y a nosotros abúltanos qu’hai verdá en dambes partes. Ye cierto que de Vries nun dio la talla, o a lo menos la talla que s’esperaba depués del so debú en Monza con Williams donde puntuó y quedó per delantre del so compañeru d’equipu. Pero tamién ye verdá que diez carreres paecen poques pa sacar conclusiones d’un pilotu que, en principiu, Red Bull escoyó pol so talentu. Quiciás n’otru equipu tuviera tenío la oportunidá de tar una temporada completa y, creyemos, quiciás esa ye la oportunidá que tolos pilotos merecen. Sicasí, otra vuelta, Red Bull nun ye famosu pola paciencia que tien colos sos pilotos, asina que, col pasu les carreres ya viendo’l rendimientu del holandés, yera cuestión de tiempu.

Dexando de llau esti cambiu de pilotos, tamién hai un cambiu no que cinca a la clasificación y que tien que ver coles gomes. Hasta agora, pilotos ya equipos cuntaben con un total de trece xuegos de gomes, que nel gran premiu d’Hungría van ser once, recortando notablemente la cantidá del compuestu más blandu que van llevar. Asina, pilotos ya equipos van cuntar con tres xuegos de duros (el blancu), cuatro de medios (el mariellu) y namás cuatro de blandos (el coloráu). N’otres sesiones de clasificación, los pilotos solíen recibir ocho xuegos de blandos, polo que’l recorte a la mitá de xuru va tener dalgún impautu nes estratexes d’usu. La idea ye, aparte d’aforrar, que los pilotos usen les gomes dures pa la Q1, les medies pa la Q2 y les blandes pa la Q3. En principiu, van repetir esti formatu tamién en Monza, y d’ehí van decidir si lu caltienen pal futuru o non.

Hungría ye un circuitu conocíu poles sos curves lentes (namás por detrás de Mónaco nesi sen) y tamién pola alta degradación de les gomes, lo que va determinar les estratexes de los equipos de forma definitiva. El circuitu d’Hungría ye permanente anque nun s’usa muncho más allá de la F1 y dalguna otra competición, polo que l’agarre del asfaltu va dir ameyorando cola goma que van dir dexando tanto los coches de F1 como les otres carreres qu’acompañen, F2 ya F3.

Munchos equipos traen delles meyores a Hungría, ente ellos Red Bull y Mercedes ya otros de la parte más baxo de la tabla como Haas. Ferrari, en pallabres de Vasseur, precisa dar un pasu alantre y dexar atrás el conservadurismu que calterizó al equipu en pasaes carreres. Depués de lo visto en Silvestone, col pasu alantre de McLaren, ta claro que Ferrari nun puede durmise si nun quier llevar más d’una sorpresa na clasificación. Podríemos dicir lo mesmo d’Alpine. El xefe del equipu, Szafnauer, dixo tar sorprendíu col pasu alantre dau por McLaren que los adelantó en clasificación. L’equipu francés tuvo un par de carreres con un rendimientu bien floxu que se treslladó en perder la posición con McLaren nel mundial de constructores.

Tenemos tamién interés por ver lo que puede facer l’equipu Williams con Albon, y tamién el rendimientu d’Aston Martin, que lleven dos carreres ensin los resultaos a los que nos teníen avezaos en carreres pasaes. Ye verdá que nin Austria nin Silverstone son trazaos que s’adauten bien a les calterístiques del Aston Martin d’esti 2023, pero Hungría sí debería polo que nun sedría raro tornar a velos no más alto. Na mesma llínia, pero al revés, nun deberíemos ver a McLaren con tan bon ritmu como n’Austria y Hungría porque l’Hungaroring, en teoría, nun s’adauta al so monoplaza. Queda ver, sicasí, hasta au llega Oscar Piastri agora en total igualdá de condiciones con Lando Norris, qu’en Silverstone llevaba un morru nuevu que l’australianu tamién va llevar equí.

Equí vos dexamos tola información que precisáis pa nun perder nada del gran premiu:

Y éstes son les gomes que van usar los equipos y pilotos demientres esti fin de selmana: