Previa del Gran Premiu d’Estaos Xuníos 2023

La F1 da’l saltu al continente americanu por segunda vegada esti añu pa disputar el gran premiu de los Estaos Xuníos en territoriu de Texas col campeonatu yá decidíu nes sos dos versiones y otru fin de selmana de carrera al sprint.

Emprendemos asina’l tour americanu que va llevanos primero a EEXX, llueu a Méxicu y otra vuelta a EEXX pal debú del circuitu nes cais de Las Vegas. Depués de la carrera nel desiertu catarí onde’l focu tuvo en munchos puntos de polémica, aterrizamos nun trazáu que yá se tornó en clásicu. Como comentaba esti día Lewis Hamilton, nun hai munchos circuitos nuevos agora que tenga esi tastu a los d’enantes, pero nun ye’l casu del COTA, que yá ta más que consolidáu como fecha nel calendariu formuleru.

Colos campeonatos yá resueltos en favor de Red Bull abulta difícil atopar l’interés de lo que queda de temporada, pero hai munchos frentes pa los que mirar. Pa entamar, la disputa del segundu puestu nel mundial de pilotos ente Sergio Pérez y Lewis Hamilton. Son abondos los rumores que falen del futuru del mexicanu lloñe de Red Bull tan pronto como pa la viniente temporada. Hai quien fala de retirada del pilotu, pero a nós abúltanos necesarios que Pérez aproveche estes carreres que vienen, entamando por Austin, p’amosar lo que ye quién a facer. La presión lóxica de competir escontra’l campeón del mundu nel meyor coche de la parriella tien de valir de motivación p’amarrar esi segundu puestu y nun dexalu escapar si nun quier que, en verdá, peligre’l so asientu.

Pa torgar esi oxetivu va tar Lewis Hamilton, que ta teniendo un bon 2023 pesie a los errores como’l que vimos hai dos selmanes en Catar. L’equipu Mercedes ta teniendo una bona temporada, sobre manera dende que decidieron abandonar la so idea revolucionaria de conceutu de coche p’adoutar la que triunfara na parriella. Ensin duldes qu’ún de los dos pilotos acabe segundu nel mundial ye dalgo que, anque sepia a poco, va prestar na fábrica y nel equipu en xeneral. L’añu pasáu ganaron en Brasil con Russell y anque abulta complicao ver a dalguién que nun seya Verstappen no más alto, tamién ye verdá que l’holandés yá quitó la presión d’enriba y pudiera dir más relaxáu, dalgo que pueden aprovechar el restu de pilotos que nagüen por imitar a Carlos Sáinz y ganar una carrera nesta temporada.

McLaren tán recibiendo tamién muncha atención por cuenta’l so bon rendimientu yá non sólo nes últimes carreres si non dende la introducción de meyores n’Austria. Cola pole y la victoria de Piastri nel sprint y los podios nes dos últimes carreres, paez que McLaren namás precisa una victoria pa redondiar una temporada qu’entamó mui estremada de lo que tamos viendo agora mesmo. L’equipu va tener nes sos manes, sicasí, una xera complicada tentando de contentar a dos pilotos deseyando ganar. La escoyera de númberu ún tornose daqué más complicada nes últimes carreres.

Aston Martin tien de dexar de mirar parriba, abúltanos, y entamar a mirrar detrás porque depués de perder el segundu puestu con Mercedes y Ferrari, tien a McLaren namás qu’a once puntos. L’equipu de Lawrence Stroll casi que suma namás que con Alonso y eso ta torgando cualquier posibilidá d’esguilar na clasificación. El bon entamu de la temporada ye agora un suañu de tiempos pasaos que nun s’axusta a la situación que tán viviendo anguaño.

Ferrari consiguió la pole l’añu pasáu n’Austin con Sáinz ya’l pilotu madrilanu ta deseyando montar nel monoplaza pa desquitase d’un gran premiu de vacíu como foi’l de Catar hai dos selmanes. Van tener abonda competencia polos puestos cimeros del podiu, pero nun hai motivos pa nun contar con dambos pilotos nesa pelea.

Pela parte tibio de la tabla, les coses siguen tando apertaes con munchos equipos en pocos puntos y delles carreres entá por disputar. El primer asaltu n’Austin llega con Williams na meyor posición con un bon puñáu de puntos con respeutu a Alfa Romeo xusto per detrás, pero ensin posibilidaes d’alcanzar a Alpine que con noventa puntos queda mui lloñe de los sos ventitrés.

Austin yá se fizo con un sitiu nel calendariu por méritu propiu. Esti añu cunta con carrera al sprint, y equí vos dexamos los horarios pa que nun perdáis nada:

Equí vos dexamos tola información que precisáis sobre les gomes que van usar los pilotos demientres esti fin de selmana.