Previa del Gran Premiu d’España 2023

La F1 continúa la so travesía per Europa y aterriza esti fin de selmana nel Circuit de Barcelona-Catalunya pa sumar otru gran premiu a esta temporada 2023.

Aportamos a un circuitu que ye mui conocíu pa los pilotos y los equipos por tener sío, hasta que’l poder económicu de Sakhir s’impuso, la sede de los test d’iviernu. Ye amás un puntu de referencia esta temporada pa les posibles meyores que traigan los equipos depués de la cancelación d’Emilia Romagna ya’l gran premiu de Mónaco nel que les condiciones son tan úniques que faen que nun seya’l meyor escenariu de pruebes.

Ye d’esperar qu’esti seya un gran premiu que tamién domine Red Bull. El dominiu del equipu de la bébora enerxético ta siendo esti añu mayor si cabe tamién pol bon estáu de forma de Sergio Pérez que, anque tovía non al altor de Verstappen, ta rindiendo daqué meyor qu’en 2022. Sí ye verdá que nun puede permitise erros como’l de Mónaco, au una mala clasificación puede dexate ensin nenguna posibilidá’l domingu. Tamién ye verdá qu’en Mónaco si la clasificación ye mala, la carrera yá ta condergada, mientres que n’otros circuitos, seya o non complicao adelantar, siempre hai más posibilidaes.

El domingu Aston Martin tuvo nes manes de Fernando Alonso la oportunidá de sumar la so primer victoria nun gran premiu. L’apueste valiente por facer daqué estremao a lo de Verstappen nun dio resultáu y l’equipu cola de Mónaco cola sensación de tener merecío más y tamién de tener una oportunidá menos d’algamar esa victoria tan naguada. Seya como seya, cuntamos con Alonso y quiciás con Stroll, si ye quien a recuperase d’una racha un pocu baxa, pa poner n’apuros a Red Bull, anque seya en clasificación y en dellos momentos de la carrera del domingu.

Mercedes aporta a Barcelona namás un puntu per detrás d’Aston Martin na clasificación de constructores, distancia que fueron amenorgando gracies a los puntos sumaos ente los dos pilotos y a la falta d’ellos per parte de Stroll. L’equipu de Grove sabe que precisa siguir ameyorando si quier pasar a Aston Martin na clasificación y tamién pa ganar una carrera. Les meyores que trayeron a Mónaco van vese meyor en Barcelona, au esperen tener un bon rendimientu y quiciás subir al podiu.

La historia de Ferrari esti añu ta dexándonos a vegaes un pocu ensin saber qué esperar d’ellos. En Mónaco abultaba que Leclerc podía facer dalgo interesante, incluso subir al podiu, pero la penalización y les calterístiques de Mónaco nun lu dexaron nin tar ente los cinco primeros. Sáinz pel so llau tampoco nun tuvo un gran premiu brillante y tará tascando la cabeza y tentando d’atopar una rempuesta al so rendimientu tan irregular dende qu’empezó’l campeonatu. Dambos pilotos precisen una bona carrera, con bon ritmu, bon rendimientu y bon resultáu pa que la temporada del equipu italianu nun entame a quedar sentenciada.

Alpine sorprendió a munches persones el domingu col podiu d’Ocon, pues depués de les declaraciones non del too positives de dalgún miembru del equipu, nun esperábemos que la rempuesta fuera a ser ésta. Sicasí, abúltanos difícil que repliquen el mesmu resultáu en Barcelona, creyemos que supieron aprovechar mui bien el bon rendimientu del coche y tamién les calterístiques especiales de Mónaco. Sicasí, depués de sumar un podiu y romper con una racha que nun taba dando bonos resultaos, allúguense quintos nel mundial con bona distancia per detrás.

Cuando McLaren empezó la temporada, albidrábemos que díbemos a velos ocupando les últimes posiciones de la clasificación casi de xuru. Ensin embargu, dende’l gran premiu d’Australia, l’equipu va sumando puntos ya entra con regulariedá na Q3 de les clasificaciones a lo menos con ún de los coches. Sí ye verdá que sacante Australia, nun sumen una cantidá significativa de puntos, pero ye bastante meyor de lo que podíemos esperar d’ellos en marzu. Sicasí, ellos tamién traen delles meyores pa Barcelona que cuiden-yos dean un emburrión más nes carreres.

La zona medio-baxa de la tabla ta cada vegada más apertada. Con McLaren y Alpine descolgándose un pocu d’eses posiciones, abulta que la pelea por nun ocupar l’últimu puestu del mundial de constructores va quedar p’Alfa Romeo, AlphaTauri, Haas o Williams, que lu ocupen agora per por un marxe mínimu. Ente l’equipu Haas, que ta sétimu a once puntos de McLaren, y Williams que ta últimu, nun hai más que siete puntos, lo que vien a dicinos lo importante que ye pa estos cuatro equipos atopar la manera de sumar, anque seya de pocu en poco, pa colocase meyor na clasificación. Haas tien falta de tornar a puntuar como fizo en delles carreres pasaes p’ampliar el so marxe col restu, y nel casu d’Alfa Romeo, precisen dar col puntu de meyora que-yos permita rindir como vimos a Bottas en Sakhir hai delles selmanes. Zhou nun ta terminando de sintise a gusto nel coche y lu vemos mui perdíu nes clasificaciones. AlphaTauri tamién tien falta de puntos pero, sobre too, de que Nyck de Vries dea otru pasu alantre y se ponga al altor de Tsunoda. En Mónaco quedó per delantre del xaponés y anque nun entró en puntos a lo menos lu vimos nun puestu bastante meyor que lo que nos tien avezaos. Nel casu de Williams precisen dalgo suerte porque ye evidente que tienen un meyor coche qu’en 2022 pero nun tan siendo quien a saca-y partíu nes carreres.

Cola oportunidá de Mónaco y les posibilidaes que suel ufrir a los equipos de la parte más baxo de la tabla yá nel pasáu, en Barcelona precisen d’un bon rendimientu y de facer valer les meyores que vaigan trayendo pa marcar la diferencia.

Nun hai muncho nuevo que dicir del circuitu de Montmeló o Circuit de Barcelona-Catalunya que nun se sepa yá por ser, como diximos enantes, ún de los referentes nel calendariu. Hai posibilidá d’agua pal gran premiu, lo qu’ensin duldes abre les espeutatives de tener una carrera interesante y munchos detalles a los que poner atención. Equí vos dexamos tola información pa nun perder nada esti fin de selmana:

Y equí vos dexamos la información sobre les gomes que van montar los equipos demientres tol fin de selmana de competición: