Previa del Gran Premiu d’Eifel 2020

Nesti 2020 casi podíemos pensar que nun hai nada que pueda yá sorprendenos, menos entá no que cinca al deporte de motor. Munches cancelaciones, cambios d’escenarios, una silly season qu’empecipió primero de lo que ye vezu y que yá nun afeuta a pilotos namás. Agora tamién a los motoristes. Y ye qu’una de les noticies que recibimos nestes dos selmanes de parón ente grandes premios foi qu’Honda va dexar de participar na F1. Ello ye, Red Bull y Alpha Tauri tienen de ponese en marcha pa buscar a dalguien que suministre motores a los sos monoplaces. Nun yera dalgo que nós pudiéramos albidrar viendo la bona rellación deportiva ente marques. Pero na F1 poques vegaes les coses pasen porque sí y Honda tien, agora mesmo, la mente puesta n’otres metes qu’alloñen a la marca de la F1.

Per otru llau, aterrizamos n’Alemaña, pal renomáu gran premiu d’Eifel nel míticu circuitu de Nürburgring, l’infiernu verde, con un tiempu y unes temperatures qu’inviten pocu a salir col coche a pista y que prometen poner n’apuru a los equipos a la hora de xestionar les sos carreres. El branu yá quedó atrás, toca’l turnu al tiempu más inestable propiu d’estes feches y que puede determinar enforma los resultaos y rendimientu de los monoplaces nes prósimes carreres.

Eifel va ser escenariu de debú de dos pilotos, promeses de la F1. Ún d’ellos va facelo con Haas, na primer sesión d’entrenamientos, y ye Callum Illot, pilotu británicu de ventiún años y que ta dientro del programa de pilotos de Ferrari. De momentu, ta segundu na clasificación de la F2, plataforma de despegue pa munchos pilotos de F1 y ye esta una bona oportunidá pa ver qué ye lo que puede ufrir al deporte.

Per otru llau, toles miraes van tar puestes, de xuru, enriba del otru debutante. Ye llíder de la categoría F2 y va dar les sos primeres vueltes oficiales nun monoplaza de F1 con Alfa Romeo. Dicimos que l’atención va tar puesta n’él porque nun ye otru que Mick Schumacher. El pilotu alemán debuta nesti gran premiu con munches ganes d’amosar que nun ta au ta namás que pol so apellíu. Los sos resultaos en F2 y la so trayeutoria hasta agora falen bastante bien del so potencial. De momentu, vamos velu’l vienres nel coche.

Mientres avanza la temporada, avancen los rumores del futuru de dellos pilotos qu’entavía nun tienen aseguráu’l so asientu pa 2021. Ye’l casu de Sergio Pérez o de los dos pilotos de Haas, Magnussen y Grosjean. A los segundos nun los ta ayudando’l rendimientu del coche, con actuaciones bastante probes les más de les vegaes. El mexicanu sabe que cada gran premiu ye una tarxeta de presentación énte los demás equipos pa que vean hasta au puede llegar. Esti fin de selmana, amás, va cuntar con anovamientos nel coche que pueden ameyorar más el so trabayu en pista.

Los güeyos van tar puestos nel cielu del Nürburgring esti fin de selmana, y tamién nos termómetros, sobremanera en Williams, que pueden quiciás beneficiase d’estes condiciones. Precisen un pocu más pa poder metese en puntos. Cada carrera ye un pasu alantre, pero de momentu insuficiente pa llegar a puntuar. Ye verdá que la progresión ta siendo positiva anque nun fueron quien a sumar nengún puntu hasta agora. La diferencia col añu pasáu ye qu’esti añu nun sedría raro velos dientro de los puntos y, de fechu, yá tán mereciéndolo.

Nós ponemos tamién los güeyos nel cielu alemán y na tabla con tola información que precisáis sobre horarios del fin de selmana. Más abaxo teneis la información de les gomes escoyíes.