Previa del Gran Premiu de Xapón 2023

Entavía recuperando de lo que foi’l gran premiu de Singapur, aterrizamos en Xapón pa la décimosétima carrera de la temporada nel míticu circuitu de Suzuka.

Retornen los madrugones a la F1 y ún de los circuitos favoritos de pilotos ya equipos. Son munchos los que quieren aprovechar el bon momentu de Singapur pa treslladalo equí anque seya un trazáu totalmente estremáu de lo que vimos hai una selmana. Les gomes escoyíes van ser más dures por ser un circuitu que les castiga más y tamién requier más de motor que la pista postrera.

Nun cuntamos tampocu con tornar a ver la debilidá de los Red Bull que vimos en Singapur. Dambos pilotos deberíen tar arriba como davezu y nun tener problemes pa colocase ente los tres primeros. Sergio Pérez comentaba qu’entavía nun entendieran mui bien qué foi lo que pasó en Singapur, pero que de xuru nun va repitise en Suzuka. Mercedes tamién ye consciente de lo complicao de replicar la llucha pola victoria de fai siete díes, pero ye fácil que sigamos viéndolos ellí arriba como en Singapur.

Tenemos la dulda con Ferrari. Depués de dos grandes premios con un rendimientu espectacular, sobre too nel casu de Carlos Sáinz, Suzuka ye una nueva oportunidá pa siguir sumando puntos y tentar d’averase a Mercedes nel campeonatu de constructores. Dende Zandvoort abulta que la Scuderia deprendió a entender el coche y va dando pasos alantre que nun víemos les primeres carreres del añu. En Suzuka van tener que bregar con Mercedes y tamién con McLaren. Oscar Piastri va llevar tamién les meyores que montara Lando Norris en Singapur, polo que cuntamos con tenelos a dambos tamién peleando pol podiu. L’australianu, amás, foi noticia esta selmana (como vos comentemos equí) depués d’ampliar el so contratu con McLaren. El pilotu va continuar col equipu hasta 2026.

AlphaTauri cuerre en casa con Honda y con Yuki Tsunoda. De xuru eses circunstancies deberíen suponer un aporte necesariu pa tentar de conquistar les posiciones que dan puntos. Liam Lawson yá sabe lo que ye sumar col equipu, pero de xuru’l so compañeru buscará esos puntos tan necesarios nos sos intentos por abandonar la última posición del campeonatu de constructores. Van tener que luchalo con Haas, qu’en Singapur sumón un bon númberu d’ellos, con dambos pilotos, y tamién con Alfa Romeo, que tovía siguen trabayando por conseguir averase a les diez primeres posiciones y, dacuando, sumar puntos. En Singapur nun tuvieron el meyor de los díes, pero Suzuka ye una nueva oportunidá de tentar colocase nun bon llugar.

Williams debería tener una bona carrera en Suzuka poles calterístiques de la pista y Alex Albon almitía que la carrera de Singapur fuera frustrante porque cuando tuvo l’incidente con Sergio Pérez, él taba en puntos en un circuitu nel que, en teoría, Williams nun va bien. Poro, hai optismismu nel equipu sobre lo que van poder facer demientres el fin de selmana y, sobre too, el domingu.

Tamién esperamos una bona actuación d’Aston Martin. En Singapur tolo que podía salir mal salió mal, asina que realmente en Suzuka namás pueden dir hacia arriba y con dambos pilotos en pista. Alpine tamién tien falta de terminar una carrera con dambos pilotos en puntos y tanto Gasly como Ocon esfruten muncho col trazáu de Suzuka. Ocon de fechu foi cuartu l’añu pasáu. Cuntamos tamién con ellos pa entrar ente los diez primeros.

Tornamos a Xapón y tornen los madrugones. Equí vos dexamos tola información sobre horarios pa que nun perdáis nada del fin de selmana:

Y éstes son les gomes que van usar los pilotos pa esti gran premiu nel circuitu de Suzuka: