Previa del Gran Premiu de Singapur 2023

Hai casi dos selmanes abandonábemos Monza pa encaminanos a la xira asiática de la F1 qu’entama esti fin de selmana nes cais de Singapur, premiu nuecherniegu que cuantayá se fizo sitiu nel calendariu por méritu propio.

Nesti 2023, colos campeonatos casi yá decidíos en favor de Max Verstappen y Red Bull, abulta complicao emocionase por dalgo, pero entavía hai munches razones poles que siguir la F1 con ganes ya emoción. Delles voces quieren ver en Singapur una oportunidá d’acabar col reinau incontestable de Verstappen y Red Bull. Hai quien fala d’una oportunidá pa Sergio Pérez de recuperar la confianza y la sienda la victoria nun circuitu urbanu, dalgo que suel manexar bien.

Pero, si nun ye Sergio Pérez, ¿quién podría quitar la victoria a Verstappen? Mercedes nun paez en condición de disputar la victoria a Red Bull si facemos casu de les pallabres del so xefe Toto Wolff, que faló de la necesidá d’un pasu alantre asomeyáu al d’Aston Martin o McLaren pa qu’esa situación se tornara real. Dambos equipos lleguen a Singapur con meyores qu’incorporar a los sos coches a la gueta d’esti segundu puestu qu’agora mesmo ocupa l’equipu de Brackley.

Lo que sí ta claro ye que cada vegada tenemos una situación más apertada ya emocionante nos puestos del podiu, con cada vegada más protagonistes con posibilidaes de xubise, a lo menos, al segundu. En Singapur, un escenariu que suel ufrir carreres mui desixentes y de munchu aguante pa máquina y pilotu, quiciás podamos ver otru exemplu d’esta variedá de podios que tamos teniendo con permisu de Red Bull.

Ye’l casu d’Aston Martin que, como dicíemos, tien l’oxetivu d’asitiase otra vuelta nel segundu puestu del mundial de constructores qu’agora mesmo disputa con Mercedes y Ferrari. El bon entamu de la temporada del equipu ta sirviendo de renta pa nun descolgase con respeutu a Mercedes nin Ferrari, que gracies al rendimientu de Monza y al probe resultáu d’Aston Martin foi quien a colocase en tercer llugar nel mundial. Les vinientes carreres, con circuitos de mayor carga aerodinámico, debieran beneficiar más a Aston Martin de lo que lo ficieron dalgunes de les pasaes. Entavía cuenten con delles meyores qu’incorporar al coche en vinientes grandes premios como comentábemos enantes.

La selmana previa al gran premiu vieno acompañada de noticies qu’incluyir na silly season d’esti 2023 (que tamos actualizando equí) y ye que yá tenemos la confirmación oficial del equipu Alfa Romeo de que Zhou Guanyu va siguir otru añu más na escudería xunto a Valtteri Bottas. Asina, l’equipu asegura’l futuru de los sos dos pilotos d’anguaño pa 2024.

Amás, vamos siguir viendo a Liam Lawson nel AlphaTauri. Daniel Ricciardo yá asomó pel paddock de Singapur pero entavía nun ta preparáu pa competir. De fechu, Christian Horner siñaló qu’igual nun pueden contar con él tampocu en Suzuka, ello ye, nel gran premiu de dientro d’una selmana, el 24 de setiembre. Demientres, Lawson tien otra oportunidá d’amosar les sos habilidaes al volante nun circuitu mui desixente pa los pilotos y nel que nun ye raro llegar a les dos hores másimes de competición.

No que cinca al tiempu meteorolóxicu, hai predición d’agua pa los tres díes, con porcentaxe creciente dende’l vienres (20%) al domingu (60%). Col retu que supón conducir nel circuitu de Singapur, urbanu, l’añadíu del agua ensin duldes va proponer una carrera bien emocionante y au la estratexa y la precisión van ser perimportantes. Ye verdá qu’hebo dellos remociques nel circuitu, sobre too nel tercer seutor que van quiciás a facilitar el llabor de los pilotos, pero abúltanos que la esencia del retu que supón conducir les cais de Singapur va siguir ehí.

Equí vos dexamos tola información que precisáis pa nun perdevos nada d’esti fin de selmana de competición:

Estes son les gomes que van usar los equipos demientres esti fin de selmana: