Previa del Gran Premiu de São Paulo 2023

Depués d’un gran premiu de México nel que poques sorpreses tuvimos, aterrizamos n’Interlagos pal últimu gran premiu d’esta serie de tres qu’entamara n’Austin. Vamos averándonos al final de la temporada con delles coses entá por decidise.

Por exemplu, el segundu puestu nel campeonatu tanto de pilotos como de constructores. Nel casu del mundial de pilotos, Sergio Pérez ye segundu con Hamilton relativamente cerca pa la cantidá de puntos entavía disponibles (y con carrera al sprint pel mediu). Col abandonu en Méxicu de Pérez, Hamilton compensó un pocu la descalificación propia n’Austin. Nel pasáu, Brasil tien sío un bon circuitu pal inglés y viendo que yá en 2022 un Mercedes foi quien a ganar equí, nun sedría raro pensar que Hamilton, nun mui bon estáu de forma anguaño, pudiera replicalo. Nun ye Interlagos un circuitu al que’l Red Bull s’adaute tan bien, anque parten por supuestu como favoritos dafechu.

Ye por ello qu’hai munches ganes de ver qué puede pasar en dos carreres demientres esti fin de selmana. Nes dos sesiones de clasificación vamos tener los güeyos puestos enriba los dos Ferrari, sobremanera nel de Charles Leclerc, que tresformó en poles les vueltes rápides de los últimos dos grandes premios. Como’l propiu pilotu almitió esti día, quería más qu’en cuenta de tener poles tuviere victories, pero de momentu eso ta negao pal monegascu. La falta de rendimientu suficiente nes carreres ye lo que ta evitando que Ferrari s’avere más a Mercedes nel campeonatu de constructores. La renta de Mercedes nun ye mui grande, son ventidós puntos, pero l’equipu de Grove parte d’una posición meyor que Ferrari, en principiu, pa esta carrera.

Hai munchu interés tamién por ver qué puede facer McLaren nesti circuitu. En teoría nun debiera adecuase a les sos calterístiques, pero tampoco nun s’adautaba’l trazáu de Méxicu ya’l resultáu de Norris foi bien bonu pesie a entamar dende atrás. L’equipu británicu tien un bon colchón de puntos con Aston Martin nel mundial, sobre too cuntando col baxu estáu de forma del equipu de Lawrence Stroll, con doble abandonu nel últimu gran premiu. Per delantre, McLaren tien una distancia qu’abulta pergrande pa que seyan a superala col númberu de carreres que queden disponibles, pero naide nun puede negar que si terminen cuartos esti campeonatu y viendo dende au partieron na primer carrera, el pasu alantre de McLaren nesta temporada dende Austria ye de xigante.

Aston Martin pel so llau ta tentando de retornar a los puestos que dan puntos depués de dos carreres bien negatives pa dambos pilotos, pero sobre manera pa Fernando Alonso que nun vio la bandera a cuadros en nenguna d’elles.

L’añu pasáu equí n’Interlagos vivimos ún de los momentos de la temporada con Kevin Magnussen marcando la primer pole de la so carrera na F1 y tamién de Haas. Abúltanos complicao que se replique esti fin de selmana, ente otres coses porque anque hai previsión d’agua pal vienres, nun paez que vaiga tener un impautu grande nos eventos d’esti viernes. Sicasí, nunca nun ye descartable que lo inesperao acabe asocediendo n’Interlagos.

Por eso, equí vos dexamos tola información que precisáis pa que nun perdáis detalle de lo que pase nel Autodromo José Carlos Pace esti fin de selmana:

Y equí podéis atopar tola información sobre les gomes que van usar los equipos demientres esti fin de selmana de competición.