Previa del Gran Premiu de Países Baxos 2023

Pasó’l parón braniegu y yá tamos de vuelta nos circuitos p’abordar la segunda parte de la temporada 2023, un añu que tien pinta de tar resueltu no cimero de los campeonatos, pero con muncho entá qu’ufrir.

Y ye qu’abulta complicao ver a otru que nun seya Max Verstappen ganando’l campeonatu de pilotos y tamién Red Bull nel de constructores. De fechu, hai quien aventura que l’holandés sedría quien a facese coles victories de les carreres que queden pa marcar un nuevu récor na hestoria de la F1.

Sicasí, nun va ser por falta de competencia pa tentar qu’eso nun ocurra. Munchos equipos traen delles meyores a Zandvoort, un circuitu con muncha carga aerodinámico, del estilu de Mónaco o Hungría. Ye un circuitu nel qu’adelantar nun ye cenciello, y la clasificación del sábadu marca la diferencia. Max Verstappen tien dominao Zandvoort dende’l so retornu al calendariu de la F1 y nesti 2023 va buscar repetir lo que yá vivimos n’años pasaos. Al so llau, Sergio Pérez precisa abordar la segunda parte de la temporada ensin más erros nin inseguridaes. Ye vital pal mexicanu quedar segundu nel mundial, una posición qu’agora mesmo nun tien asegurada. De fechu, pilotos como Lewis Hamilton espresaron que’l so oxetivu pa esta segunda mitá de la temporada ye, precisamente, esi segundu puestu de Pérez. La realidá ye que Verstappen abulta imbatible, pero Pérez non tanto y esa segunda posición ye un puestu mui cobiciáu polos demás pilotos.

Mercedes nun sabe qu’esperar de Zandvoort, anque les condiciones meteorolóxiques apunten a agua demientres el fin de selmana ya eso ye siempre dalgo que tanto Hamilton como Russell saben manexar bien. Aparte, nun circuitu d’alta carga deberíen tener oportunidá de facer dalgo interesante. Aston Martin tien falta d’atopar el camín de vuelta a los podios que caleyaron nes primeres carreres del campeonatu y que tienen abandonáu dende va unes cuantes. L’equipu trayerá meyores nesi intentu de recuperar la forma d’entamos d’añu y pa dir pensando tamién nel coche del añu que vien.

McLaren, pela so parte, busca caltener esi bon estáu de forma col que naide nun cuntaba al empiezu de la temporada. Zandvoort sedrá la primer oportunidá de siguir sumando y averándose a los equipos que los preceden. De fechu, Ferrari tará mirando de regüeyu viendo como los coches papaya s’averen a ellos y mientres la Scuderia entavía nun atopa la regulariedá precisa p’algamar esi tercer llugar qu’agora ocupa Aston Martin. El futuru de Leclerc y Sáinz ye motivu d’especulación nel mundu formuleru, pero l’equipu tien la necesidá de centrase nel so rendimientu en carrera, en siguir entendiendo’l funcionamientu del coche pa tentar de sumar bonos puntos ya, en casu de que Verstappen tenga algún momentu de debilidá, ganar una carrera.

Alpine dieron anuncia del cambiu de les persones encargaes de sacar alantre l’equipu como yeren Szafnauer, Permane y Fry. Pel momentu, l’equipu ta ocupáu en camudar l’estilu de trabayu ya en buscar la sienda de los bonos resultaos qu’esta temporada caleyaron irregularmente.

Pela parte más baxo de la tabla tenemos un bon grupu d’equipos sumando puntos pasín ente pasu y apertando más les posiciones. Haas confirmó esti xueves a Magnussen y Hülkenberg pa 2024 (como yá vos comentemos nel nuestru post abiertu de la silly season de 2024), lo qu’alloña la preocupación del equipu del futuru nesi aspeutu ya pueden enfotase nel desenvolvimientu del coche, no que queda de temporada y pa la viniente. Williams empata a puntos con Haas y en Zandvoort nun deberían tener un bon rendimientu porque nun ye un circuitu que s’axuste a les sos calterístiques. Sicasí, Alex Albon yá amosó esta temporada que ye quien a esprimir un coche que, en teoría, debiera dir peor.

AlphaTauri, cola llegada de Ricciardo ya’l bon rendimientu de Tsunoda debiera enfotase na posibilidá d’algamar bonos resultaos que permitan al equipu recuperar dalgo de forma y ser competitivos pensando tamién en 2024. Nel casu d’Alfa Romeo, podríemos dicir que s’atopen nuna situación asomeyada, na que l’equipu precisa dar el pasu alantre definitivu pa que nestes diez carreres que queden puedan compensar el baxu rendimientu de les doce primeres.

Aterrizamos pues en Zandvoort, territoriu Verstappen, con unes condiciones meteorolóxiques que prometen dar un pocu d’emoción al fin de selmana. ¿Sedrá suficiente pa torgar una nueva victoria del vixente campeón del mundu? Pa nun perder detalle de la carrera, equí vos dexamos horarios:

Ya éstes son les gomes disponibles: