Previa del Gran Premiu de Mónaco 2023

Depués d’una selmana inesperada de descansu y naguando porque toles persones afeutaes poles inundaciones n’Italia vaigan pasín ente pasu recuperando les sos vides, la F1 torna a los circuitos.

Emilia Romagna marcaba l’aniciu de la primer tanda de tres carreres siguíes d’esta temporada, qu’a la fin acabaron siendo dos por cuenta lo que pasó la selmana pasada y que yá vos comentemos equí. Siguimos ensin conocer el futuru de la carrera n’Ímola pero dende que sepamos daqué vos lo comentaremos.

La F1 pon la vista en Mónaco pa la so sexta carrera, de fechu, de la temporada, nun circuitu al que siempre apetez llegar, au les posibilidaes de los equipos más modestos medren enforma lo que lu convierte nuna de les cites interesantes de la temporada. Ye verdá que non siempre tenemos carreres de les de nun perdese nada, pero les espeutatives son de xuru altes.

Una de les noticies más importantes que conocimos esta selmana foi qu’Aston Martin y Honda van xunir los sos destinos a partir de 2026. Yá sabéis que’l siguiente gran cambiu de regulaciones aporta nesi añu, y si fuistis siguiendo les noticies de pre-temporada y delles otres anuncies, nueves alliances tán texéndose nesti 2023. Abulta que tres años son muncho, pero en F1 sabemos que pueden llegar a ser pocos si nun se da col puntu óptimu de desendolcu. Ello ye que, de momentu, sabemos d’esa xunión ente la escudería británica ya’l motorista xaponés, ya una de les duldes que xurden ye saber si Fernando Alonso tará al volante cuando esi momentu llegue. Honda tinía en mente dir dexando la F1 pero los cambios nes regulaciones ya l’interés del xigante xaponés pola sostenibilidá ya los biocombustibles paez que terminaron de convencelu pa siguir na competición, anque de la mano d’Aston Martin depués de que Red Bull manifestara’l so interés por desenvolver les sos unidaes de potencia xunto con Ford. Yá sabéis qu’agora mesmo Honda tien alcuerdu con Red Bull y AlphaTauri, y tolo que ta firmao hasta agora sigui hasta 2025.

Emilia Romagna diba ser un llaboratoriu de pruebes pa munchos equipos que llevaben delles meyores, dalgunes importantes, al circuitu. Nun creyemos que vaigamos a ver munches novedaes en Mónaco poles calterístiques del trazáu, anque nun descartamos que dalguna cosa sí que se pruebe. Posiblemente lo veamos yá en Catalunya, como yera vezu n’otres temporaes cuando’l gran premiu en Montmeló cayía a mediaos de mayu. Mercedes, sicasí, confirmó que va llevar delles de les actualizaciones que tinía previstes pa Ímola, como los pontones, de los que muncho se faló na temporada pasada y tamién no que llevamos d’esta. Amás, l’atención ta puesta tamién n’anovación de Lewis Hamilton col equipu, sobre manera depués de que salieran rumores que lu vinculaben con Ferrari pal futuru prósimu, dalgo que tanto’l pilotu como la Scuderia, desmintieron.

Otru que tamién ta nel puntu de mira ye Nyck De Vries, que nun empezó bien la temporada, viéndose superáu en toles carreres pol so compañeru Yuki Tsunoda, y que nun termina de sintise a gusto col coche. Ye verdá que ye pronto pa falar de reemplazu, pero tamién lo ye que ta nun equipu conocíu por nun tener contemplaciones colos pilotos que nun terminen de rendir. Una bona carrera en Mónaco quiciás sedría lo que precisa’l neerlandés pa motivase ya enderechar la so carrera deportiva.

Siendo’l de Montecarlo un circuitu urbanu, ye fácil apostar pola victoria de Sergio Pérez equí, anque depués de lo del añu pasáu, los rumores qu’hebo énte la so actuación na sesión de clasificación y les consecuencies que tuvo, nun sabemos cuánto va arriesgar el mexicanu. Verstappen vien de ganar con muncha comodidá en Miami, y anque Mónaco ye munches veces impredecible, la superioridá del equipu ye evidente en circunstancies normales.

Mónaco ye una oportunidá d’oru, como dicíemos, pa qu’equipos como McLaren, Alpine o inclusive Williams y Alfa Romeo, busquen atropar puntos. Munches vegaes son los puntos de Montecarlo los que marquen la diferencia n’acabando la temporada, y les escuderíes de la parte baxo de la tabla saben lo importante que puede ser sumar equí.

Tamién va ser una oportunidá d’oru pa Charles Leclerc d’a la fin esfrutar del so gran premiu de casa. L’añu pasáu recordamos el desastre que foi pal pilotu monegascu la estratexa de paraes del so equipu, les decisiones mal tomaes que lu sentenciaron ya lu privaron d’una posible victoria nun circuitu nel qu’entavía nun ganó y au cásique siempre tuvo males esperiencies na F1.

Estes son les principales claves pal viniente gran premiu en Mónaco. Nun esperamos agua en tol fin de selmana, anque hai delles alvertencies de dalguna posibilidá pero paez menor. Más abaxo vos dexamos tola información d’horarios pal fin de selmana y tamién les gomes que van usar los equipos: