Previa del Gran Premiu de Miami 2023

Casi ensin descansu yá aterrizamos en Miami pal quintu gran premiu de la temporada 2023 dexando atrás les cais de Bakú y con munches coses a les que tar soyertes.

Y ye que, anque nun foi la carrera más espectacular de la historia de la F1, sí que ye verdá que dexó dellos interrogantes qu’esperamos dir resolviendo a partir de Miami. Recordamos qu’esti ye’l segundu añu del circuitu qu’entró nel calendariu en 2022 pa convertise na segunda carrera n’EEXX.

Col pasu les carreres tamos viendo que, anque Verstappen nun paez tar dispuestu a dexase batir pol so compañeru d’equipu, sí que ye verdá qu’esti añu tamos viendo un Sergio Pérez distintu, más competitivu y muncho más seguru de sí mesmu. Amás, el coche ta acompañando les sos actuaciones y yá nun sorprende velu no cimero del podiu como pasó en Bakú. Nun hai meyor exemplu d’ello que’l fechu de que ganar les dos carreres del pasáu fin de selmana con méritu. Siempre falamos de qu’hai vegaes que los pilotos tienen suerte, como puede ser por exemplu col coche de seguridá’l domingu que vieno meyor a la carrera de Pérez qu’a la de Verstsappen. Sicasí, pa poder aprovechase de les circunstancies que te permitan ganar una carrera tienes que tar ehí, tienes que tener un rendimientu que te permita aguantar nesa posición, polo que la suerte ye importante, sí, pero tamién tar nun momentu de bon rendimientu. Abúltanos que, hasta agora, Sergio Pérez ta nesi momentu. De fechu, como él mesmu comentó esti fin de selmana pasáu, nun sabemos si’l campeonatu taría entá más apertáu o si’l mexicanu podría tar per delantre de Verstappen si n’Australia les coses tuvieran dío meyor pa él. Seya como seya, llegamos a Miami coles ganes de ver si podemos siguir teniendo esta batalla que, paez, va ser lo más interesante no que cinca a la competición pol campeonatu nun añu que paez que va ser Red Bull quien trunfe en dambos. Por cierto, l’equipu del toru coloráu va llucir un diseñu diferente pa esti gran premiu diseñáu polos fans de la escudería.

La superioridá de Red Bull paez tar, nestos momentos, fuera del alcance del restu d’equipos, pero eso nun fai que lo que veamos en pista dexe de ser interesante. De fechu, cola suma d’Aston Martin al grupu de persiguidores, tenemos agora tres equipos compitiendo por ser el meyor depués de Red Bull. Ferrari recuperó dalgo la forma que paecía tar desapaecida nes primeres carreres, y anque entavía nun fueron quien a ganar un gran premiu, sí que les sensaciones fueron otres, sobre manera nel llau de Leclerc. Les dos poles del monegascu nes carreres de Bakú son síntoma d’ello. Ye verdá qu’esi rendimientu entavía nun se ta viendo más qu’a una vuelta nes sesiones de clasificación, pero ye motivu suficiente pa dir construyendo dende ello. Sáinz paez qu’entavía nun dio col puntu al coche, dalgo asomeyao a lo que-y pasó l’añu pasáu pero abúltanos qu’en Miami va tentar de dexar eses males sensaciones atrás pa enfotase no que vien.

Mercedes y Aston Martin tuvieron bones batalles en Bakú y ye fácil que veamos más de lo mesmo en Miami. Aston Martin ta teniendo bon rendimientu incluso con problemes de DRS, como en Bakú, o en circuitos nos que, en teoría, nun debería dir tan bien. En Bakú, Alonso nun pudo xubir al podiu, pero’l fechu de que quedara cuartu yá nos fai albidrar que’l rendimientu de los monoplaces verdes nun ye un espeyismu. Mercedes paez tar n’ascensu, anque a dulces, como diz el so xefe Toto Wolff. Anque en Bakú nun tuvieron una carrera especialmente bona, sí que tuvieron na pelea con Aston Martin y Ferrari, ya’l tastu del podiu n’Australia entavía remanez. Tenemos ganes de ver lo que pueden facer en Miami na so batalla colos otros dos equipos.

Como yá comentemos na crónica del pasáu gran premiu, McLaren paez que dio un pasu alantre en Bakú y que les meyores naguaes pol equipu y los pilotos en verdá valieron. Sicasí, tán lloñe del rendimientu col que deseyaben entamar la temporada y tienen munchu tarrén que caleyar entavía. Puntuar con dambos coches tien de convertise nun vezu si l’equipu quier recuperase y tamién facer valer la suma de puntos n’Australia cola que naide nun cuntaba. En Miami tanto Norris como Piastri van tener otra oportunidá de meter más distancia col sextu clasificáu nel mundial de constructores qu’agora mesmo ye Alpine a ocho puntos.

Dir sextos nel mundial abultaría una deceición p’Alpine si nun fuera porque lleven un par de carreres pa olvidar y ta teniendo suerte de que, per detrás, los equipos nun tán muncho meyor. Yá perdieron posición con McLaren, equipu col qu’en teoría esta temporada tendríen de competir más direutamente, y precisen d’una vegada atopar la forma de tener, con dambos pilotos, un fin de selmana ensin problemes y nel que tanto Gasly como Ocon puedan sumar. Si non, abúltanos que la pelea con McLaren va ponese complicada pal equipu francés.

Dende’l sextu equipu nel mundial de constructores, que ye Alpine, hasta’l décimu ya últimu que ye Williams, hai namás que siete puntos de diferencia. Ye verdá que pa estos equipos ye difícil puntuar, pero pensando en carreres lloques como foi Australia, abúltanos que ye quiciás la zona más interesante de siguir polos cambios que vamos poder dir viendo demientres la temporada. Otros años, Williams adoutaba casi dende l’aniciu de la temporada’l rol de l’últimu, pero esti añu tanto Albon como Logan Sargeant tán mereciendo bastante más y nun nos extrañaría que, si siguen asina, llegaran a dexar esi últimu puestu na clasificación. De fechu, agora mesmo, tamos viendo más floxo a AlphaTauri, donde De Vries nun termina de despegar y Tsunoda fai lo que pueda por atropar puntos. El neerlandés precisa una carrera tranquila, ensin erros nin problemas na que pueda recuperar la confianza que, creyemos, nun termina d’atopar. Miami va ser un circuitu nuevu pa él, igual nun ye la meyor opción pero tampoco nun creyemos que pueda ser seleitivu. Siendo pilotu n’AlphaTauri sabemos la desixencia que cai sobre él, y nun descartamos que seya esa presión de más la que nun tea ayudando al pilotu que yá amosó un bon rendimientu n’otres categoríes y competiciones y nel so debú non oficial l’añu pasáu con Williams, nel que llegó a puntuar.

Haas xuega en casa nesti gran premiu y precisa tamién d’una bona carrera na qu’atropar puntos ya intentar pasar a Alpine y aprovechase de los sos momentos de debilidá nesti aniciu de temporada. Nin Magnussen nin Hülkenberg tán teniendo mal rendimientu, pero’l coche nun termina de dar de sí, polo que los puntos nun tán llegando. Podemos dicir lo mesmo d’Alfa Romeo que con Bottas entamaron bien la temporada, pero fueron perdiendo fuercia col pasu les carreres. En Miami dambos equipos tentarán de recuperar la forma que necesiten pa nun quedar atrapaos nos puestos baxos de la clasificación. La ventaya, relativa, de los equipos esti añu ye que tienen abondes oportunidaes de sumar puntos gracies al calendariu tan llargu d’esti 2023. Lo importante ye que sepan aprovechales.

Ensin más, ponemos la mirada en Miami, primer cita en territoriu estauxunidense del añu y segunda vegada que los F1 correrán nel so trazáu, l’Autódromo Internacional de Miami. Ye un circuitu de 5,412 km de llargor y foi diseñáu por Apex Circuit Design. Tien la particulariedá de ser un circuitu allugáu nel tarrén del Hard Rock Stadium y que cruza cais públiques pero nun ye nin urbanu nin permanente. N’acabando’l gran premiu, el circuitu desapaez y les cais tornen a la normalidá.

Equí vos dexamos tola información del circuitu no que cinca a horarios y les gomes que van montar los equipos nesti fin de selmana de competición en Miami: