Previa del Gran Premiu de Gran Bretaña 2023

Ensin casi recuperar d’Austria yá nos atopamos nel trazáu de Silverstone pal viniente Gran Premiu de Gran Bretaña, ún de los clásicos absolutos del calendariu.

Aterrizamos nun de los circuitos favoritos de pilotos, equipos y fans en xeneral del mundu del motor. Si amás añadimos que van tener grabando nel circuitu pa una futura película sobre F1, abúltanos l’escenariu perfeutu pa un fin de selmana de motor.

Hai dellos equipos que lleguen equí con meyores nos sos coches, como ye’l casu de Mercedes y McLaren nel coche de Piastri. L’equipu de Woking sólo probara les sos actualizaciones nel coche de Lando Norris ya viendo’l resultáu que consiguió l’inglés n’Austria, hai motivos pa pensar que Piastri va poder beneficiase d’elles tamién ya, quiciás, entrar nos puntos na carrera del domingu.

Mercedes cuerre con dos pilotos británicos y con meyores nel so monoplaza, cola esperanza d’a lo menos subir al podiu, cuntando siempre con que Verstappen va ser quien gane la carrera. Lewis Hamilton comentó la necesidá de tentar d’atopar una solución a los años de dominiu siguíos de pilotos en la F1, mesmo que pasó con él o con otros como Schumacher o Vettel, pa que la F1 nun pierda emoción nin entretenimientu. Tamién s’espresó sobre’l calendariu de 2024, que yá foi asoleyáu y que vos presentamos equí, falando de la necesidá de tener fines de selmana de tres en cuenta de cuatro díes pa facer menos desixente la temporada, que pa 2024 se proyeuta de 24 carreres. El pilotu inglés, mesmo que’l so compañeru, nagüen por tener un gran premiu meyor que’l d’Austria, delantre de la so afición, y nel que les meyores que traen funcionen.

Ferrari amosó un bon rendimientu n’Austria qu’espera replicar tamién en Silverstone. Nun ye un circuitu que beneficie especialemnte a les calterístiques de los monoplaces coloraos, pero’l pasu alantre del equipu paez evidente. Hasta agora Carlos Sáinz paecía tener ventaya sobre Leclerc, pero’l monegascu paez dir pocu a poco ganando confianza col coche y la xestión de les gomes.

Otru equipu qu’espera recuperar el ritmu de carreres anteriores ye Aston Martin, que mesmo que Mercedes, nun destacó muncho n’Austria, entrando nos diez primeros con dambos pilotos pero nun pasando del quintu puestu. Ye verdá que, mesmo que Barcelona, Silverstone nun ye precisamente un circuitu que respuenda a les calterístiques del Aston Martin, mesmo que pasa con Ferrari, pero tenemos visto coses non esperaes nel trazáu inglés, asina que nun descartamos una bona actuación del coche verde.

Per detrás, muchos equipos tienen falta de tener una bona carrera ensin sorpreses, nin penalizaciones, como ye’l casu d’Alpine, qu’entama a ver cómo McLaren va ganando tarrén, y Haas, que tamién ve que cada vegada tienen más competencida pol sétimu puestu de la clasificación. Williams cuerre en casa, tamién con Albon, y de xuru l’equipu querrá replicar la bona actuación cola que sumaron puntos en Canadá hai delles selmanes ya’l rendimientu d’Austria, que los dexó a les puertes de puntuar.

Ye interesante tamién tar sollertes al tiempu meteorolóxicu que, como sabéis, ye cambiante demientres tol gran premiu en Silverstone. La predición da agua pa sábadu y domingu, con más probabilidá’l sábadu (un 80%) que’l domingu (un 40%). Lo peor del sábadu tocaría demientres la sesión de llibres, mientres que pal domingu nun debiera llegar a llover en carrera anque sí pela mañana. Pal vienres, en principiu, nun esperamos agua.

Equí vos dexamos tola información que precisáis pa nun perder nada del Gran Premiu de Gran Bretaña nel circuitu de Silverstone, un trazáu que reúne delles de les más mítiques curves del campeonatu de la F1 y tien na so historia carreres memorables:

Y estes son les gomes que van montar los equipos. Pirelli camudó (o actualizó si queréis) daqué la especificación de les gomes de secu p’adautales a les condiciones actuales de los monoplaces, que ye estremada de cuando se diseñaron y fabricaron nel iviernu de 2023: