Previa del Gran Premiu de Catar 2023

La F1 aterriza otra vuelta nel desiertu catarí depués d’un añu de parón pa un nuevu gran premiu d’esta temporada 2023 na que yá conocemos al campeón del mundu de constructores y nel que tamos a piques, si ye que nun lo sabíemos yá, de conocer al de pilotos.

Max Verstappen precisa namás que tres puntos pa ser campeón, y teniendo dos carreres esti fin de selmana, cuidamos que nun vaiga tener problema en conseguilo. Hai quien diz que si lo fai na carrera al sprint va ser una sensación rara por nun confirmase nuna carrera normal, pero tamos tan avezaos a velu ganar esti añu, que yá nun sorprende que seya asina.

Esti fin de selmana, como tamos comentando, tenemos otra carrera al sprint. En principiu, en Catar debiéramos ver, no que cinca a otros equipos que nun son Red Bull, a McLaren en una bona posición pa replicar lo que ficieron en Xapón. Ferrari, en principiu, debería tener más problemas pol calor y la xestión de gomes, y Mercedes cuidamos que sigan na llínia de replicar les bones actuaciones en carrera, sobre manera nel casu de Hamilton.

Per detrás, esperamos que les coses sigan apertaes na llucha por sumar puntos, con Williams mui dependientes del vientu que puede condicionar la carrera no sólo pola fuercia si non tamién pola cantidá d’arena que mueve y qu’afeuta a los coches. La calor va tener tamién una influyencia importante de xuru, pesie a que la carrera va disputase na nueche catarí, les temperatures tán siendo relativamente cálides. Añadimos a too esto un trazáu reasfaltáu recién y namás una sesión de llibres, lo que de xuru va poner les coses interesantes pal domingu pesie a los comentarios de Verstappen que fala de la previsibilidá del domingu en función de lo que pase’l sábadu.

Seya como seya, equí vos dexamos tola información que precisáis pa nun perder nada de lo que pase nel circuitu de Losail: