Previa del Gran Premiu de Bélxica 2023

Ensin casi descansu depués del viaxe dende Hungría, aterrizamos en Bélxica pal gran premiu de Bélxica nel míticu circuitu de Spa-Fracorchamps.

Ya una de les primeres noticies d’esti fin de selmana ye que Max Verstappen va recibir cinco posiciones de penalización pal domingu por camudar la caxa de cambios del so monoplaza. Nun creyemos que diendo les coses como-y tán diendo vaya tener problemes de ponese per delantre nun tardando, pero ye verdá que ye una torga de partida pa la so carrera.

Otra manera, aterrizamos nel trazáu de Spa col parón braniegu y la necesidá de garrar aire y descansar pa munchos equipos y pilotos y, cómo non, l’entamu de la silly season como yá ye vezu nesti tiempu del añu. Unos que tarán naguando pol parón son los equipos de la parte más baxo de la tabla y sobremanera AlphaTauri. Depués de la llegada de Ricciardo hai motivos pal optimismu nel equipu, pero ye verdá que tienen un trechu per delantre pa ponese al altor d’otros equipos no que cinca a rendimientu. Tán a siete puntos del penúltimu equipu clasificau, que ye Alfa Romeo. Ye una distancia bultable pa un equipu como AlphaTauri nesti 2023, pero si son quien a atopar el puntu al coche y con Ricciardo al volante, abúltanos que nun hai motivos pa nun confiar en que puedan salvala.

Alfa Romeo pela so parte ta nuna situación asomeyada anque más desfogada que l’otru Alpha. N’Hungría destacaron cola so clasificación, pero en carrera volvieron un pocu a la posición esperada viendo lo visto esta temporada. Entamaron mui bien, con Bottas en puntos, pero pasín ente pasu fueron perdiendo fuercia y agora, sacante sorpreses como Hungría, casi nun cuntamos con ellos ente los diez primeros. Nun pueden despistase nin Haas nin Williams, qu’anque tán dalgo meyor, namás son dos puntos los que los separtan d’Alfa Romeo. Williams precisa siguir na llínia marcada hasta agora, de dir esguilando posiciones y viéndose con capacidá d’entrar nos puntos, sobre too nel casu d’Albon. Alpine tien abondos puntos como pa nun temer que lu alcancen dende atrás, pero viendo lo que pasó n’Hungría, en Bélxica necesiten puntuar con dambos coches y tener una carrera tranquila y ensin mayor problema.

Perriba, les mires tán puestes en McLaren que paez ser l’equipu a siguir y tamién a temer polos demás colos qu’agora pelea posiciones. Ye verdá que tán mui abaxo con respeuto a Ferrari, ochenta puntos, pero la segunda parte de la temporada va faese mui llarga pa los italianos si nun son quien a dar el pasu alantre necesariu, empezando por equí, por Spa, pa dir al parón braniegu con un bon resultáu y sensaciones positives de les qu’agora casi nun tienen.

Aston Martin tien un colchón con Ferrari pero tampocu nun puede despistase. En Spa precisen un resultáu que recuerde a les primeres carreres. La realidá ye qu’agora mesmo tán teniendo carreres bastante discretes. Sí que ye verdá que siguen tando en los puntos, anque seya munches vegaes sólo con un pilotu, pero saben a pocu teniendo en cuenta qu’hai unes carreres yeren veceros del podiu.

Mercedes afiánzase na segunda posición del campeonatu y depués de la pole de Hamilton n’Hungría que rompió la racha de poles de Verstappen, el siguiente nivel ye tentar de superar al holandés y facese cola primer victoria dende Brasil 2022. L’equipu precísala, y tien capacidá pa facelo, pero la realidá ye que si Verstappen rinde como hasta agora, van tenelo complicao. Si amás sumamos a Sergio Pérez con bon rendimientu, les posiciones más altes van vendese cares en Spa.

Esti fin de selmana tenemos carrera al sprint. Yá sabéis, la clasificación xeneral muévese al vienres, el sábadu ye esclusivu pal sprint, primero cola so clasificación y llueu la carrera al sprint ya’l domingu, como davezu, la carrera. Equí vos dexamos tola información pa que nun perdáis detalle:

Y éstes son les gomes que van usar. Alcordaivos que pa la clasificación d’esti vienres recuperamos el formatu d’usu que vimos hasta agora. Lo que s’usó n’Hungría tornaremos a velo en Monza.