Previa del Gran Premiu de Baḥréin 2023

La espera terminó y yá tamos equí cola primer previa de la temporada. Damos iniciu a esti 2023 con la carrera nel circuitu de Sakhir, un trazáu nel qu’hai una selmana los pilotos trabayaben pa poner a puntu los sos monoplaces.

Baḥréin tornose nel circuitu de referencia pa los entrenamientos de pre-temporada, aparte de pola importancia que tán ganando los promotores de los eventos nos países del Golfu, pol fechu de que seya’l primer gran premiu de la temporada y amás les condiciones climatolóxiques seyan estables, a lo menos más que nel casu, por exemplu, de Montmeló au l’iviernu podía torgar les pruebes de los equipos si asomaba con agua o ñeve y temperatures mui baxes.

Ello ye que tamos de vuelta nesti trazáu, baxo les lluces artificiales dispuestes pol circuitu dende que se decidió que Baḥréin diba ser, mesmo que Singapur y Arabia Saudí, un gran premiu de nueche. Hai munches coses de les que tar pendientes pa esti iniciu de temporada. La primera ye la confirmación de que Lance Stroll va competir con Aston Martin. En principiu había munches duldes de que’l canadiense pudiera tar preparáu p’afrontar un gran premiu depués del so accidente nel que partió la moñeca y tuvo d’operase. Sicasí, paez ser que va poder xubise al monoplaza anque nun duldamos que mesmo Drugovich que Vandoorne tarán soyertes por si terminen teniendo que participar na carrera.

El gran premiu de 2022 foi ún de los más interesantes de la temporada, dalgo a lo que nun tamos avezaos en F1. Cuando la temporada entamaba n’Australia, lo normal yera dicir que lo que se vía n’Albert Park nun yera reflexu de lo que diba ser la temporada. Abúltanos que nel casu de Sakhir, pesie a ser el primer eventu, sí podría dir dándonos una idea de lo que se nos vien. L’añu pasáu la pelea ente Red Bull y Ferrari pola victoria foi bien reñida y remató con los dos Ferrari nel podiu y los dos Red Bull ensin ver la bandera a cuadros. Foi un espeyu de lo que diríemos viendo nel futuru hasta que los erros y la poca fiabilidá, asina como’l pasu alantre de Red Bull punxeran les coses del so llau. Toos sabemos cómo terminó la temporada 2022, pero si esti domingu tenemos otra carrera como la de 2022, de xuru naide va tener quexa.

Son munches les voces qu’esperen que’l dominiu de Red Bull esti añu nun seya talu y qu’a lo menos Ferrari seya quien a ponelu n’apuros ya evitar los paseos trunfales de Max Verstappen en 2022. Nun sabemos hasta qué puntu vamos a poder cuntar con Mercedes pa esta xera, ya incluso dalguién atreveríase a mentar a Aston Martin, pero lo cierto ye que, con tan pocos cambios nos coches con respeutu al añu pasáu y lo que vimos nos test de lo bien que diba’l Red Bull, les predicciones de momentu nun dan otru ganador qu’al toru coloráu. Ferrari suel dir rápido nesti circuitu, como yá vimos hai un añu, la dulda ye si va ser superior a Red Bull tamién nes otres carreres y con regulariedá. Los sábados de 2022 yeren casi territorio Ferrari, con Leclerc a la cabeza atropando un bon númberu de poles que llueu’l domingu nun valíen pa muncho.

Tenemos munches ganes de ver qué pasa con Williams, porque colo que vimos nos test tenemos motivos pa creyer qu’esti añu nun van zarrar la clasificación. Nesta llínia, tamién tenemos interés en ver qué pasa con McLaren. Les sensaciones depués de los entrenamientos (y demientres ellos) nun fueron les meyores. L’equipu almitió yá ceo que diben col pie cambiáu y que nun llegaríen al primer gran premiu na meyor de les condiciones pola opción de diseñu del coche qu’escoyeran y que los llevó a dase cuenta tarde de cual yera’l meyor camín p’ameyorar les sos prestaciones. El casu ye que confíen poder enderechalu a partir del gran premiu d’Azerbaixán, a finales d’abril. Hasta esi momentu, en principiu, a amenorgar daños.

Tamién tenemos ganes de ver el debú de los rookies d’esti añu: Nyck De Vries, qu’amosó munchu potencial na oportunidá que tuvo l’añu pasáu de correr con Williams, entrando en puntos y dexando claro que taba más que preparáu pa competir; Oscar Piastri, que foi la estrella de la silly season del añu pasáu col so pasu d’Alpine a McLaren y tolo qu’eso significó; Logan Sargeant, que si nun interpretamos mal lo que vimos en test aporta nun bon momentu pal equipu con muncho que deprender pero n’un coche con potencial; Nico Hülkenberg, que nun ye rookie como tal, y taba de pilotu reserva en Haas, pero que podríemos dicir que debuta oficialmente con estos coches, anque yá corriera l’añu pasáu con Aston Martin sustituyendo a Sebastian Vettel na primer carrera del añu cuando ésti se punxo malu de COVID-19.

Nun queremos dexar de mencionar la bona pinta que tien la batalla na mitá de la tabla, con Aston Martin en principiu mui potente, Russell incluso suxer que van ser el so principal rival; con Alfa Romeo faciendo bien les coses nos entrenamientos y les duldes d’Alpine y AlphaTauri, de los que tovía nun sabemos mui bien qué esperar. Haas debiera ser un invitáu de privilexu a esti grupu nesti 2023. Queda la dulda de si McLaren y Williams se van sumar a la llucha o la de so va ser la pelea por nun zarrar la clasificación. Como diximos más arriba, esti añu nun pinta claro pal equipu de Woking, a lo menos nestos primeros compases, pesie a que Norris comentaba ayeri que la cosa nun taba tan mal como asomeyaba.

Zarramos esta previa dexándovos tola información que precisáis sobre los horarios del gran premiu y les gomes que van utilizar los pilotos nestos tres díes: