Previa del Gran Premiu d’Azerbaixán 2023

Cuatro llargues selmanes depués la F1 torna a los circuitos y failo al urbanu de Bakú, ún de los trazaos que se ta convirtiendo nun favoritu gracies a les carreres interesantes que nos vien dexando n’años pasaos.

Y ye que yá tamos avezaos a tener podios pocu corrientes y, pasín ente pasu anque salvando les distancias, ta tornándose nun Mónaco a la hora de dar esperances a los equipos con menos posibilidaes de poder atropar puntos. Esti 2023 paez complicao ver más allá de Red Bull nel podiu y ganando la carrera, pero como dicimos, en Bakú ye posible.

En Bakú vamos tener la primer carrera al sprint de la temporada pero con un formatu anováu. Nun intentu de la organización de la F1 por facer más interesante l’eventu, reorganizose too pa que’l sprint seya un eventu en sigo mesmo. Esto quier dicir que’l vienres vamos tener la sesión de clasificación pa la carrera del domingu, aparte de la sesión de llibres, y que’l sábadu vamos tener una clasificación pa la carrera al sprint y la carrera al sprint. D’esta manera, lo que se fai’l sábadu nun condiciona’l domingu y los equipos y pilotos arriesguen más y, suponse, dan más espectáculu. Esa ye la teoría. Ye verdá qu’hasta agora, sacante Brasil l’añu pasáu, nenguna d’estes carreres fueron mui allá no que cinca a emoción y ye algo almitío polos equipos, que nun quieren arriesgase pal domingu. Veremos si esti xiru al formatu val p’algamar esa ansiada emoción que la F1 busca nos eventos qu’entama. Cada vegada hai más xente que pide que se reduzan les sesiones d’entrenamientos llibres por aquello de da-y más incertidume a los equipos que nun saben esautamente qué esperar de los sos coches, pero al tiempu ye dalgo que nun termina de convencer a los protagonistes.

No que cinca a los equipos, col rendimientu amosáu hasta agora por Aston Martin nes manes de Fernando Alonso y de Mercedes, nun sedría raro velos no cimero del podiu en dalgún momentu d’esti añu y con permisu de Red Bull. Mercedes paez qu’atopó’l puntu al que dirixise pa siguir ameyorando les sos prestaciones no que cinca a les vinientes carreres. Aston Martin precisa quiciás un pasín más, anque nun sabemos si entá tán preparaos pa la so primer victoria. Mercedes, que paez tar n’ascensu, quier sicasí dir pasu ente pasu pa nun emocionase de más y que llueu’l guelpe seya mayor.

Hai munches coses interesantes que güeyar nesti fin de selmana y una d’elles ye les meyores de McLaren. L’equipu aseguró dende’l principiu de la temporada qu’en Bakú diben camudar el so rendimientu, mui probe nes dos primeres carreres y dalgo meyor n’Australia, aprovechando tamién les circunstancies de la carrera. L’equipu de Woking tien motivos pa ser optimista: si foi quien a atropar puntos con un coche que diba mui lentu, si les meyores de Bakú funcionen deberíen recuperar el pasu y ponese, quiciás non al altor d’Alpine en rendimientu, pero sí más cerca. Lo bono pa ellos ye qu’agora mesmo tán quintos nel mundial, per delantre d’Alpine col doble de puntos que l’equipu francés, gracies a la carrera n’Albert Park. Si les meyores aporten, nun van partir dende cero, lo cual ye importante.

Alpine, pel so llau, cuenta con recuperar del desastre que foi Australia col doble abandonu de los sos pilotos, ya espera ponese al altor de poder pelear con Mercedes, dalgo que nos abulta daqué ambicioso viendo la situación na que lleguen dambos equipos. Pero, como yá diximos enantes, si hai un sitiu nel qu’esperar lo inesperao, ye equí.

Tamién hai munches entrugues en Ferrari. Australia foi un desastre pa la escudería italiana, qu’apeló la penalización de Sáinz pero ensin ésitu y que ta fundida nel cuartu llugar del mundial de constructores con trenta puntos de diferencia con Mercedes. Ye verdá qu’ésta ye la cuarta carrera de la temporada pero otru domingu como’l de Melbourne hai tres selmanes puede acabar con toles aspiraciones de Ferrari, si ye que tienen dalguna yá a estes altures y col rendimientu de los sos principales rivales y Aston Martin tamién na batalla.

Queremos ver tamién dalgo más d’AlphaTauri y d’Alfa Romeo. De momentu Nyck De Vries nun ta dando lo qu’esperábemos d’él, y anque Bottas tuvo una bona carrera en Sakhir pa entamar la temporada, ye verdá que dende entós el so rendimientu baxó abondo. Esta selmana amás supimos que, pa final de temporada, Franz Tost, el xefe d’equipu d’AlphaTauri va dexar el so puestu, que va ocupar Laurent Mekies, agora mesmo en Ferrari como ayudante de xefe d’equipu y direutor de carrera. Franz Tost lleva bien de tiempu nel equipu, dende 2005 y cuando tovía yera Toro Rosso, y va pasar a ocupar un cargu consultivu, ye dicir, nun va dexar dafechu la competición. Aparte, Peter Bayer va ocupar el cargu de CEO del equipu, tamién pa 2024.

Williams pela so parte, mesmo que Haas van tentar d’aprovechar les condiciones d’un circuitu que siempre brinda espectáculu ya oportunidaes a los pilotos d’atropar bonos puntos, sobre too nel casu de Williams que como almitía el so xefe d’equipu, James Vowles, tien menos puntos de los que debiera por rendimientu. Nengún de los pilotos pudo aprovechar les circunstancies anómales d’Australia, dalgo que sí ficieron otros equipos de la so contorna, como ye’l casu de McLaren y Haas, anque esti últimu namás con Hülkenberg. Sicasí, l’equipu estauxunidense ye agora mesmo sétimu na clasificación, con siete puntos, ún perriba d’Alfa Romeo y seis d’AlphaTauri y Williams. Alfa Romeo tamién precisa una bona carrera pa desquitase de los malos resultaos de les dos últimes, au l’equipu nun dio pa tanto como prometía, a lo menos con Bottas, en Sakhir.

El circuitu de Bakú yá ye un clásicu pesie a nun llevar nel calendariu más que dende 2016. Ye un trazáu de Hermann Tilke pero aprovechando les calles de la ciudá de Bakú ya usando los sos monumentos como escenariu de privilexu pa la F1. Mide 6’003 kilómetros y xira nel sen contrariu a les aguyes del reló. Ye un circuitu mui rápidu y mui llargu, el terceru depués de Spa-Francorchamps y Xida.

Equí vos dexamos tola información de horarios que precisáis pa esti fin de selmana de carreres. Alcordaivos que la clasificación del domingu ye’l vienres y que’l sábadu tenemos la clasificación pal sprint y la carrera.

Ya éstes son les gomes que van montar los equipos: