Previa del Gran Premiu d’Australia 2020

Pasín ente pasu, ensin muncho ruíu y cola atención puesto n’otros asuntos que tán afeutando a gran parte de los países qu’acueyen el campeonatu de Fórmula 1, aterrizamos n’Australia pal primer gran premiu d’esti 2020. Avezaos como tamos a qu’esti momentu llegue con munches ganes, esta temporada les sensaciones son bien distintes, y les duldes sobre la cellebración de dellos eventos ocupen más portaes y titulares de lo que quixéramos.

El domingu, en principiu, tornaremos a ver a los monoplaces compitiendo nuna nueva edición del campeonatu. Con munches entrugues tamién no que cinca al rendimientu de los equipos y tamién con munches espeutatives llega por fin el momentu de dir resolviendo unes y comprobando otres. Taremos sollertes, sicasí, énte cualquier cambiu de planes a lo llargo d’esti fin de selmana mesmo que nes selmanes vinientes.

Ello ye que por fin les lluces coloraes van apagase delantre d’una veintena de coches preparaos p’abordar el primer asaltu d’un nuevu añu. Mercedes son en teoría favoritos, anque na segunda tanda de test dexaron espaciu pal cuestionamientu d’esta afirmación: quiciábes nun tán tan bien como albidramos. Ferrari semó duldes na primer tanda y tampoco nun acabó de recoyeles na segunda. Ye posible que teamos avezaos a la sensación de que Ferrari llega siempre un pasu per detrás de Mercedes, asina que nada meyor que velos el domingu pa responder a toles entrugues que nos surden estos díes.

Red Bull va ser clave, paeznos, esti añu. Pinta que tienen dao un pasu alantre en comparanza con otros años, y lleguen con motivaciones anovaes. Sí ye verdá que suel pintar asina siempre hasta que, col pasu de les carreres, nos decatamos que nun taben tán bien como pensábemos. Sicasí, l’equipu del güe coloráu siempre ye candidatu al títulu.

Yá comentemos qu’esti añu pinta  perinteresante pela parte medio de la tabla. Racing Point amosaron un rendimientu escelente (si lu comparamos colo que viemos l’añu pasáu) y McLaren tamién tien munchos motivos pal optimismu. Pero nun podemos escaecer que tamién Renault llega con fuercia y que tanto AlphaTauri como Alfa Romeo van tener la so voz y muncho que dicir. Nun podemos dexar de llau a Haas. L’añu pasáu tuvieron una temporada bastante desastrosa y de xuru van querer replicar un pocu l’aniciu de 2018 nel que yera normal velos dientro de los puntos en cásique toles carreres.

Williams progresa. Les sesiones de test fueron bien positives pal equipu británicu. Queda ver si nun ye más ilusión que realidá, pero pinta qu’esti añu pueden tar na amarraza, anque nun seya dando un pasu de xigante. Lo importante nesti equipu yera recuperar l’enfotu y pasín ente pasu eliminar les duldes y les torgues pa poder dir recuperando la so posición na tabla.

Hai poques coses que podamos afirmar enantes de la dispuesta d’esti gran premiu, yá que son munches les informaciones qu’atropamos, les duldes, los plantegamientos y teoríes que nun van tardar en desapaecer dando pasu a otres. Lo que sí sabemos ye que tamos énte otra temporada nueva y otra oportunidá d’esfrutar de la máxima categoría del deporte de motor. Los coches tán preparaos, tamién los equipos y los pilotos. Los escenarios nagüen por acoyer el so eventu y nós taremos equí pa cuntavos tolo que vaiga pasando.

De momentu, esta ye tola información que precisáis pa nun perder nada d’esti primer asaltu de la temporada:

Y estes son les gomes que vamos ver usar a los pilotos esti fin de selmana: