Previa del Gran Premiu d’Arabia Saudita 2023

Recuperando entavía del primer gran premiu de la temporada 2023 yá aterrizamos en Xida pal segundu gran premiu del calendariu. Nun salimos del desiertu nin de les lluces artificiales.

Y ye que cada vegada tenemos más presencia de lluz artificial nos circuitos de la F1. Foi Singapur quien marcó l’iniciu en 2007 d’esta tendencia a tener carreres nuecherniegues y cada vegada ye más común que tengamos a lo menos tres grandes premios cada añu. Amás, Xida ocupa agora’l segundu llugar nel calendariu, dalgo menos emocionante que lo foi ensin duldes hai dos años cuando se tornó nuna de les carreres determinantes del campeonatu.

Aterrizamos n’Arabia Saudita con delles idees más clares qu’a l’entamu de la temporada: Red Bull nun engañaron col potencial del coche, Mercedes va dalgo meyor de lo que s’esperaba, Ferrari dalgo pior y Aston Martin tampoco nun mentía colo qu’amosaba nos entrenamientos. Sicasí, nun duldamos de que veamos otres coses nel circuitu de Corniche, estremáu del trazáu de Sakhir.

Una de les principales noticies ye que Charles Leclerc yá va penalizar nesta carrera. El monegascu podría recibir un mínimu de diez posiciones, que podríen ser más entá, por camudar la centralita del so monoplaza. En Sakhir, debutó con un segundu componente depués de que l’equipu tuviera de camudar el primeru. Esti segundu componente tamién falló y provocó l’abandonu del pilotu de Ferrari. Agora, llegaos a Xida, Ferrari y Leclerc enfréntense a la realidá de tener que volver a camudar esa pieza y, al ser esti un elementu del que los equipos namás pueden disponer de dos unidaes, trai penalización nesta carrera y la previsión de más penalizaciones en carreres vinientes. Ensin dulda, nun empieza’l campeonatu de la meyor manera pa Leclerc nin pa Ferrari. La penalización, sicasí, nun ta tovía confirmada oficialmente.

Falose muncho esta selmana de motores, con Williams comentando que va decidir quién suministra los sos motores a partir de 2026 y con Red Bull falando de que McLaren tiníen interés nes sos unidaes de potencia, anque como davezu, son too comentarios ensin confirmación oficial per nenguna parte. Sí ye verdá que pa los equipos 2026 ye una fecha que ta mui presente pesie a les tres temporaes qu’entavía tenemos per delantre.

Aston Martin espera replicar lo que se vivió en Sakhir p’amosar que nun foi cosa del circuitu si non que tien vraeru potencial pa volver a ocupar el podiu otres cuantes vegaes más y tamién pensar en ganar dalguna carrera. El retu ye complicáu pensando na bona forma de Red Bull y de Max Verstappen. L’equipu de la bébora enerxético cunta con que Sergio Pérez tamién amuese un rendimientu bien altu.

Mercedes llega a Xida, ensin duldes con alcordances de 2021, pero tamién col determín de borrar les males sensaciones del pasáu gran premiu y dar el pasu necesariu pa batir a Aston Martin. La so batalla, a lo menos agora, nun ye con Red Bull nin con Ferrari, anque entavía queda por ver en qué llugar podemos asitiar al equipu italianu. La lóxica llévanos a pensar que Leclerc diba acabar en podiu si nun fuera pol abandonu pero ye dalgo que nun podemos saber. Por eso, el rendimientu d’esti viniente gran premiu ye vital.

Na zona medio-baxo de la tabla, qu’agora abarca a una bayura d’equipos, les coses abulten abondo menos definíes. Ye más, nun creyemos que nin McLaren, que tuvo un gran premiu terrible ensin puntos y con l’abandonu del so debutante Oscar Piastri, sienta que tien la temporada perdida. Ye verdá que lo que vimos hasta agora nun anima a ser positivos pero conociendo les evoluciones de les marques y la so capacidá pa recomponese, albidramos que la pelea na zona media-baxa va ser mui intensa ya interesante.

El circuitu de Corniche nel que se cellebra l’eventu debutó hai dos años con una carrera de nueche. El so diseñu ye de Carsten Tilke que ye’l fíu del afamáu Hermann Tilke, diseñador de munchos de los circuitos que conformen el calendariu de la F1. Ye consideráu el circuitu urbanu más rápidu del calendariu (alrodiu los 250 km/h) y con esi nomatu se presenta énte’l públicu que sigui la F1. Aparte ye’l segundu más llargu per detrás namás de Spa. Tien tres zones de DRS y amás de campeonatu de F1, tamién tien carreres de F2 y Porsche.

Zarramos esta previa cola información sobre los horarios d’esti fin de selmana y les gomes que van usar los equipos: