Tamos a menos d’una selmana de ver los coches de F1 otra vuelta nun circuitu, pa los test de pre-temporada que se van cellebrar nel circuitu de Sakhir. Yá conocemos tolos monoplaces que van competir nesti 2023 y yá pocu más nos queda por saber d’esta nueva temporada.
De fechu, esti post de noticies tien más de repasu que de boletín. Como tamos acabantes de dicir, yá se presentaron tolos coches, con Alpine zarrando la sesión ayeri. Nes previes qu’ellaboremos y que vos enllazamos más abaxo podéis atopar les semeyes de tolos monoplaces ya un pocu la previa cola que parten los equipos. Hai munches entrugues nel aire n’equipos como Mercedes, depués d’un 2022 atípicu pa ellos, o Ferrari, que tuvieron cerca y al tiempu lloñe de campeonar.
Por otru llau, los que sí yá tán en pista son los coches de F2 ya F3 que dieron iniciu a la so temporada colos test, tamién en Sakhir. Na categoría de F3, quien marcó’l ritmu nos test, amás de forma bastante importante, foi’l pilotu d’ART Gregoire Saucy, que foi primeru en tres de les cinco sesiones nes que participó, y tando ente los tres primeros nes que nun llideró. La F3 entama la so temporada, mesmo que la F1, el primer fin de selmana de marzu nel circuitu de Sakhir.
Nel casu de la F2, el meyor tiempu de toles sesiones foi pa Richard Verschoor, del equipu Van Amersfoort Racing. La categoría de plata del deporte de motor tamién va empezar el so 2023 nel circuitu de Sakhir dientro de dos selmanes.
Y hasta equí’l boletín de noticies d’esta selmana. Como veis, no que cinca a F1 tuvimos más bien pocu, centrándonos más nes presentaciones de los coches y les sensaciones de los equipos hacia ellos. Como yá diximos, más abaxo podéis atopar les previes au enllazamos les galeríes de tolos monoplaces pa que nun perdáis detalle de lo que vamos ver dientro de menos d’una selmana nos test de pre-temporada.
Previa de la temporada 2023
Previa por equipos (1)
Previa por equipos (2)