Esta selmana les noticies más importantes vienen de la mano de dos de los equipos de la parriella qu’entavía teníen flecos sueltos que confirmar. Yá conocemos les feches de presentación de tolos coches (podéis consultales equí) y pocu a pocu vamos zarrando detalles pa poner yá rumbu a los test de pre-temporada.
Como vos dicimos, Alfa Romeo y Haas, los dos equipos qu’entavía nun confirmaran, ya anunciaron les feches de la presentación de los sos coches. L’equipu estaoxunidense va ser el que más temprano amuese’l so coche, y va facelo’l día 31 nuna presentación en llínea. La escudería tamién confirmó que Pietro Fittipaldi va siguir siendo’l so pilotu reserva y probador.
Nel casu d’Alfa Romeo, tuvieron un tiempu ensin que se supiera muncho d’ellos, pero esta selmana dieron muncho que falar. Pa empezar, tamién conocemos la fecha de presentación del so nuevu monoplaza, que ye’l 7 de febreru y que va cellebrase en Zurich. Per otru llau, tamién conocimos el nome de quien va ser quien xestione l’equipu xunto a Andreas Seidl pa esti 2023. Si echasteis un güeyu a les noticies pasaes, sabréis que Frederic Vasseur dexó l’equipu pa dir a Ferrari, dexando vacíu’l puestu de direutor d’equipu. Amás, tamién sabréis que Sauber va facer dupla con Audi pa 2026 y Alfa Romeo va dexar de trabayar con ellos n’acabando esti 2023. Poro, la estructura del equipu ta careciendo dellos cambios pensando nesi futuru prósimu d’abandonu d’Alfa Romeo y aterrizaxe d’Audi. Asina ye que nun van tener un direutor d’equipu como tal esti añu, si non un representante del equipu, que va trabayar mui de cerca con Andreas Seidl, agora CEO de Sauber. La persona escoyida pa esti puestu ye Alessando Alunni Bravi, que yá tuvo de xefe y direutor d’equipu en Trident no que yera la GP2. Dende 2017 ta venceyáu a Alfa Romeo.
Aparte de too esto, Alfa Romeo va tener un nuevu patrocinador principal Stake, lo que va significar un nuevu logu y nome pa 2023: Alfa Romeo Stake. Stake ye una plataforma d’apuestes y casino online.
Estes son les novedaes más importantes de la selmana. Recordai que toles selmanes vamos poniéndovos al día de lo que va pasando, y podéis dir consultando toles noticies de selmanes pasaes nestos enllaces:
Noticies post-temporada 2022:
Noticies – 2 d’avientu
Noticies – 9 d’avientu
Noticies – 16 d’avientu
Noticies – 23 d’avientu
Noticies – 30 d’avientu
Noticies pre-temporada 2023:
Noticies – 13 de xineru
Noticies – 20 de xineru
Y si tamién queréis dir informándovos de tolo necesario pa entamar bien la temporada, equí vos dexamos los enllaces que fuimos asoleyando sobre tolo que precisáis saber enantes de ver rodar a los coches en Sakhir:
Pilotos y equipos
Calendariu
Presentaciones de los coches
Circuitos