A una selmana del primer GP del añu y, poro, el principiu de la temporada vamos a intentar facer un resumen de lo que creemos que son les cuestiones a tener en cuenta una vez arranquen los motores.
Y empezamos poles novedaes en parrilla, onde a nivel d’equipos destaca la entrada del equipu americanu Haas qu’aspira a meyorar el resultáu de los últimos equipos que s’incorporaron a la competición. Pa ello cuenta cola collaboración de Ferrari y non solo tocante a la unidá de potencia, apurriendo-yos estos más partes del coche (hasta’l coche que presentaron tien un ciertu aire al SF15-T, el Ferrari del añu pasáu). Al volante va a contar con Romain Grosjean, que llega de Lotus, y con Esteban Gutiérrez que tres el so pasu por Sauber y facer l’añu pasáu de pilotu reserva de Ferrari vuelve a los mandos d’un monoplaza. Veremos en qué llugar de la parrilla s’asitien.
Renault nun son precisamente buenos, pero nun participaben como equipu 2011. La marca francesa vuelve al asfaltu tres comprar l’equipu Lotus con Jolyon Palmer (el que yera pilotu reserva de Lotus) y Kevin Magnussen, que tres echa-y paciencia en McLaren como pilotu reserva vio como se-y zarraben unes puertes en Woking y se-y abríen otres n’Enstone. Va a ser una temporada de transición lo mesmo pal coche como pa la escudería en xeneral mientres reconstruyen un equipu que seya quien a lluchar por too. Tres el drama del añu pasáu con Red Bull, la marca del güe correrá tamién col propulsor fechu por Renault pero marcáu como TAG-Heuer, a los mandos siguirán Daniel Ricciardo y Daniil Kvyiat; otru equipu que tien per delantre una temporada de transición, como’l so hermanu pequeñu Toro Rosso, que sufre les rellaciones del so hermanu mayor con Renault y esti añu correrá cola unidá de potencia de Ferrari de 2015. Sicasí, el tastu que dexaron los test ye que nun van ser el furgón de cola nin muncho menos, a lo menos nos primeros compases de la temporada. La competencia va a ser dura nos dos equipos de la bebida enerxético, yá que Carlos Sáinz y Max Verstappen van a tar apurando al máximu’l so segundu añu lluchando por un puestu nel primer equipu.
Manor nun son nuevos, pero nun tienen nada que ver col equipu que viemos l’añu pasáu, de vese emburriaos pola evolución previa del Ferrari pasarán a usar la especificación actual de Mercedes, teniéndolos como collaboradores tamién a otros niveles (tamién usarán Petronas como combustibles) y la tresmisión de Williams. Pa dar el pasu alantre pondrán al volante a Pascal Werhlein, pilotu del programa de Mercedes y reserva de les fleches platiaes, y a Rio Haryanto gracies a la apuesta del gobiernu indonesiu.
Sauber esti añu tendrá mayor competencia y siguirá contando con Felipe Nasr y Marcus Ericsson. El so mayor enemigu sedrá la economía y ser quien a tar l’altura y caltener la evolución tola temporada. Lo mesmo que Force India, qu’intentará sorprender como la pasada temporada y continuar cola evolución ascendiente y sigue confiando pa ello en Sergio Pérez y Niko Hülkenberg. Seria competencia topará nellos Williams, qu’esforzarase pa mantenese como tercer equipu de la parrilla ya intentará aspirar a dalgo más con Felipe Massa y Valtteri Bottas.
McLaren-Honda paez que poco a poco va recuperándose del desastre que foi l’añu pasáu, Fernando Alonso y Jenson Button caltienen la fe nos propulsores xaponeses y, si bien paez probable qu’abandonarán los últimos puestos porque la fiabilidá entra yá en parámetros más normales, inda nun sabemos con quien tarán compitiendo de tu a tu. Quiciás les unidaes de potencia d’Honda anden equilibraes coles de Renault, pero nun veremos como se resuelven toles variables hasta que nun s’apaguen les lluces del semáforu.
Mercedes va a ser l’enemigu a batir y Ferrari el primer candidatu a ello. Tres l’avance ponderatible del añu pasáu y aprovechándose de tolos recursos que tienen a mano, la escudería italiana intentará esti añu que Sebastian Vettel y Kimi Räikkönen tengan un coche a la par que los actuales campeones. Mentanto, Mercedes buscará siguir dominando nel deporte y continuar sorprendiéndonos topando meyores onde paez que yá nun se puede sacar más y esti añu dexará correr con más llibertá al actual campeón Lewis Hamilton y a Nico Rosberg, qu’intentará qu’a la tercera vaya la vencida.
Estos son los protagonistes. Per delante tenemos ventiún carreres, cola novedá del premiu d’Europa en Baku, y bien de puntos qu’axuntar p’alzase con un nuevu campeonatu de Fórmula 1. La llucha empecipia el próximu domingu en Melbourne.