Gran Premiu de Baḥréin 2016 – Análisis por equipos

Dexamos pasar unos díes pa ponenos manes a la obra y analizar lo que foi l’actuación de los equipos nel pasáu Gran Premiu de Baḥréin. Como yá diximos, foi una carrera vistosa que nos fexo desquitanos un poco de lo que víemos, otra vez, el sábadu. Ye d’agradecer qu’a lo menos les carreres tean dando de sí:

– Mercedes: la victoria de Rosberg ya’l tercer puestu de Hamilton falen por si mesmos, pero ye verdá que tamos viendo delles cosines que nos faen creyer entá na humanidá d’esti equipu. L’arranque de les carreres sigui siendo daqué que-yos da dolor de cabeza y que los sos competidores tán sabiendo aprovechar. De toes formes, la capacidá de recuperación del equipu ye mui grande y de xuru nun tardarán n’atopar la solución a esi puntín de debilidá.

– Ferrari: ver a Vettel aparcar el coche nuna escapadera (paez ser que con un problema nos inyectores que pueden obligalu a estrenar unidá de potencia en China) cuando nin siquiera terminara la vuelta formación fexo que muncha xente punxera’l gritu nel cielu pola fiabilidá de los motores de la escudería italiana. Ensin embargu, viendo’l rendimientu del coche de Kimi, qu’algamó’l segundu caxón del podiu, nun creyemos que tengan que preocupase tovía.

– Red Bull: Nestes dos primeres carreres, Horner ta más enfotau n’echar enriba’l nuevu sistema de clasificación que sobre cualquier otra cosa, y nesa discreición anda moviéndose Red Bull estes dos carreres. Pesie a que Kvyat nun entamara n’Australia cola torga qu’eso ye pal equipu nel campeonatu, en Baḥréin dambos pilotos tuvieron a lo d’ellos, regalándonos delles batalles en pista, y consiguiendo sumar un puñáu de puntos col cuartu puesto de Ricciardo ya’l séptimu de Kvyat.

– Haas: siempre teniendo en cuenta que namás llevamos un par de carreres, lo de la escudería americana nun dexa de ser d’aplausu. Si yá nos sorprendíen en Melbourne col sextu puestu de Grosjean, en Baḥréin afitóse con un quintu, anque nun sepan entá lo que ye terminar un gran premiu con dambos coches por cuenta l’abandonu de Gutiérrez.

– Toro Rosso: nun sabemos si hebo toque d’atención de puertes pa dientro dempués de lo visto n’Australia, pero la verdá ye que nesta ocasión, vimos a dambos pilotos más calmaos. L’abandonu de Sáinz dexó a Verstappen a cargu de sumar puntos pal equipu, terminando na carrera nel puestu sextu.

– Williams: de los d’arriba, igual son los qu’entá nun amosaron lo que s’esperaba d’ellos. Anque nun empezaben de mui atrás, lo cierto ye qu’ente l’incidente de Bottas con Hamilton na primer vuelta, que-y valió un drive-through, y llueu la mala decisión (y van…) al montar neumáticos, podemos dicir que la carrera de los dos pilotos de Williams foi daqué descafeinada, siendo Massa octavu y Bottas novenu.

– McLaren: Debutaba Vandoorne, y debutó con puntu, siendo décimu, poniendo-y el llistón bien altu a Fernando Alonso pa China. La mala suerte acompañó a Jenson Button, que na vuelta 9 quedó tiráu cuando l’ERS decidió dexar de furrular. El británicu dicía que’l coche diba como pa quedar quintu o sextu, polo que los fans de McLaren, ensin enfotase demasiao, quiciás puen entamar a recuperar un poquín de sorrisa que perdieren en 2015.

– Renault: otros que siguen ensin convencenos, la escudería francesa ye un sacu llástimes. Ente la sanción del sábadu a Magnussen, que lu fizo salir dende’l pitlane, y que Palmer nin siquiera pudo entamar el gran premiu, yá van dos veces que queden a les puertes de los puntos. Sin ser eso malo del too, esperábemos un pocu más d’ellos.

– Sauber: nun son bonos tiempos pa Sauber no económico, pero en pista ficieron un trabayu bastante decente en Baḥréin. Vimos a Ericsson, qu’acabó nel puestu doce, engarrase con unos cuantos pilotos y a Nasr, con un coche según elli inconducible, salir del últimu puesto nel que quedó na clasificación del sábadu, pa terminar decimocuartu.

– Manor: llevamos yá unos cuantos aplausos, y ensin duldes Pascal Wehrlein merezse otru. Yá’l sábadu consiguiera daqué abondo meritorio como foi dexar el so coche nel puestu dieciséis, pero ye que’l domingu vímoslu pelease con otros pilotos, amargar la carrera d’otros tantos (que-y lo digan a Magnussen) y tresmitir la sensación de solidez qu’hai tiempu necesitaba Manor. El so compañeru foi más discretu, pero a lo menos dambos consiguieron terminar el gran premiu, décimoterceru Wehrlein y Haryanto décimoséptimu.

– Force India: l’actuación más decepcionante de tol gran premiu foi quiciás la de Force India. Teníennos avezaos a tar ente los diez primeros en Baḥréin, incluso a tar nel podiu, y velos quedar nel puestu quince (Pérez) y dieciséis (Hülkenberg) foi ensin dulda lo que menos esperábemos d’ellos. Cuntamos cola so recuperación pa China.

Gran Premiu de Baḥréin 2016 – Carrera

Si de dalgo pue presumir la temporada 2016 ye de consiguir que les carreres consigan quitanos el sabor amargu que tán dexando les calificaciones. Dempués d’otru sábadu surrealista, nel que lo que más valió foi ver la Q1 y la vuelta de pole de Hamilton recuperándose dempués d’un erru que paecía poner nes manes de Rosberg el puestu más altu la parrilla, el domingu dexó un sabor perdulce.

httpss://www.youtube.com/watch?v=SHUDGEU6TFE

Bien ceo, víemos como Vettel nun podía nin siquiera terminar la so vuelta de formación pola muerte del so motor. Cola so retirada paecía que la carrera diba queda-yos en bandexa a los Mercedes, pero otra vuelta más Hamilton vio cómo la so ventaxa de pole quedaba en nada tres una salida na que Rosberg-y garró la posición y tuvo un encontronazu con Bottas na primer curva, que-y valió un drive-through al finlandés. De toes formes, Hamilton nun tardó en dir recuperando posiciones, anque tuviera que conformase col tercer caxón del podio. Rosberg dominó d’empiezu a fin la carrera, faciendo con esta cinco les veces consecutives que se sube a lo más alto.

El segundu güecu ocupolu Kimi Räikkönen, n’una carrera ensin problemes y controlada pol pilotu de Ferrari, que fizo por compensar l’ausencia del so compañeru d’equipu garrando dellos puntos pa la escudería rosso.

Per detrás d’estos tres, vimos lluches bien prestoses: los Force India, daqué descafeinaos, anduvieron engarraos con tol mundo, pa terminar bien atrás (teniendo en cuenta lo bien que se-yos suel dar esti trazáu); Williams tuvieron batalles perguapes con casi tola parrilla tamién, destacando los momentos colos Red Bull. Más discretos tuvieron los Toro Rosso, con Sáinz retiráu y Verstappen faciendo’l so trabayu pero ensin dar tanto que falar como n’Australia.

Hai que destacar delles actuaciones esti domingu: per un lláu, Grosjean y Haas, quintos por méritos propios, amosando que lo d’Australia quiciás nun fue tanto buena suerte como buen facer; per otru, Vandoorne, que debutaba en Baḥréin y quedó como únicu representante de McLaren en pista dempués de que Jenson Button tuviera problemes col ERS y nun pudiera terminar la carrera, consiguiendo arrampuñar un pocos puntín, el primeru pa McLaren na temporada. Por último, Pascal Wehrlein qu’amosó que’l Manor nun necesita más que manos capaces pa plantar cara a coches que l’añu pasáu sólo aspiraben a dexar pasar coles banderes azules. El propiu Magnussen quexábase de que yeren como cohetes en recta, lo que facía casi imposible que’l Renault se pudiere arrimar a ellos.

Sauber fexo un trabayu decente, vimos a Ericsson lluchar en pista y plantar cara a los sos rivales, y anque Nasr quexábase del coche, tamién pudo terminar n’un bon puestu.

Aparte de los yá mentaos, tampoco nun terminaron la carrera Esteban Gutiérrez, qu’entá nun sabe lo que ye ver la bandera a cuadros n’un GP, nin Jolyon Palmer. A continuación vos dexamos los resultaos de la calificación y carrera:

Calificación

Pos Pilotu Tiempu
1 Lewis Hamilton 1:29.493
2 Nico Rosberg 1:29.570
3 Sebastian Vettel 1:30.012
4 Kimi Räikkönen 1:30.244
5 Daniel Ricciardo 1:30.854
6 Valtteri Bottas 1:31.153
7 Felipe Massa 1:31.155
8 Nico Hülkenberg 1:31.620
9 Romain Grosjean 1:31.756
10 Max Verstappen 1:31.772
11 Carlos Sáinz 1:31.816
12 Stoffel Vandoorne 1:31.934
13 Esteban Gutiérrez 1:31.945
14 Jenson Button 1:31.998
15 Daniil Kvyat 1:32.241
16 Pascal Wehrlein 1:32.806
17 Marcus Ericsson 1:32.840
18 Sergio Pérez 1:32.911
19 Kevin Magnussen 1:33.181*
20 Jolyon Palmer 1:33.438
21 Rio Haryanto 1:34.190
22 Felipe Nasr 1:34.388

(*) Empezó dende’l pitlane

Carrera

Pos Pilotu Tiempu Vuelta
1 Nico Rosberg 01:33:34.696 57
2 Kimi Räikkönen +10.282 57
3 Lewis Hamilton +30.148 57
4 Daniel Ricciardo +1:02.494 57
5 Romain Grosjean +1:18.299 57
6 Max Verstappen +1:20.929 57
7 Daniil Kvyat +1 lap 56
8 Felipe Massa +1 lap 56
9 Valtteri Bottas +1 lap 56
10 Stoffel Vandoorne +1 lap 56
11 Kevin Magnussen +1 lap 56
12 Marcus Ericsson +1 lap 56
13 Pascal Wehrlein +1 lap 56
14 Felipe Nasr +1 lap 56
15 Nico Hülkenberg +1 lap 56
16 Sergio Pérez +1 lap 56
17 Rio Haryanto +1 lap 56
Ret Carlos Sáinz 29
Ret Esteban Gutiérrez 9
Ret Jenson Button 6
NS** Sebastian Vettel 0
NS Jolyon Palmer 0

(**) Nun salió

Gran Premiu de Baḥréin 2016 – Previa

Dos selmanes dempués del entamu de la temporada en Melbourne, la Fórmula Uno aterriza nel desiertu, n’unu d’esos circuitos que tien de reinventase cada ciertu tiempu pa convencer a la xente de que paga la pena ver correr coches nel so trazáu. Nun hai duldes que l’optar pola lluz artificial paez conformar a los aficionaos que tán al otru llau la televisión porque la realidá ye que, nes grades, nun vemos más que vacíu.

Enfotándonos agora no que ye lo deportivo, trayemos unes delles novedaes embaxo’l brazu: la más bultable, quiciás, ye la noticia que conocíemos ayeri de que, por conseyu médicu, Fernando Alonso nun va correr esti Gran Premiu. El pilotu asturianu tien fractura de costielles y anque nun ye nada grave, nun-y recomendaron arriesgase a tener otru accidente que-y furare un pulmón. Asina pues, Alonso dexa’l so asientu al belga Stoffel Vandoorne, que tuvo de garrar un avión dende Xapón, onde taba pa disputar la Superfórmula, y presentase nel circuitu pa disputar esti GP. Entá nun se sabe si’l China tamién va a tar fuera del calendariu p’Alonso.

Mercedes cuenta siguir marcando’l ritmu, anque con menos presión que n’Australia, y Ferrari pela so parte va a buscar que nun seya asina y ser quién a batir a les fleches platiaes. Detrás van siguir los de siempre, Red Bull y Williams, de los qu’esperamos daqué más en comparación con Australia, mesmo que de Renault. Force India tien fecho bones carreres nesti circuitu poro tamién son unu de los equipos que tan nel puntu de mira esta fin de selmana.

Pel mediu cuntamos topanos colos Toro Rosso, más calmaos, pola cuenta que-yos trai a los sos pilotos. Siendo realistes, nun debieramos esperar que Haas anduvieren per ehí, pero quiciás esti GP sirva pa determinar dafechu si lo que vimos n’Australia con Grosjean foi sólo una casualidá. Sauber, Manor y McLaren tienen falta demostrar qu’Australia foi namás un mal empiezu.

Estos son los neumáticos escoyíos por cada pilotu pa esti GP. Destaca la elección de Mercedes y Renault con un únicu xuegu del compuestu más duru sacrificando los soft. Manor paez preparase pa una estratexa de tandes llargues.

neumaticos-bahrein

Tocante a la pista, los puntos d’interés, les zones onde se va a poder usar el DRS en carrera y ver cómo ye un on board del Bahrein International Circuit de Sakhir nesti videu. El restu de datos del circuitu (unos de los que tienen el consumu más altu del campeonatu, polo qu’habrá que tar atentos a ello) son los que siguen:

Llargor 5.412km
Ganador 2015 Lewis Hamilton (1:35:05.809)
Pole 2015 Lewis Hamilton (1:32.571)
Vuelta rápida 2015 Kimi Räikkönen (1:36.311)
Récor Michael Schumacher – Ferrari 2004 (1:30.252)
Recta más llarga 1.090m
Velocidá punta 335km/h llegando a la curva 1
Lonx. Pitlane 420m (unos 21s en cruzalu)
Curva más rápida La 13 (185 km/h)
Curva más lenta La 10 (80 km/h)
Acelerador a fondu 64%
Consumu/vuelta 1.8Kg
ERS usu mediu
Desgaste frenu altu
Cambios de marcha 52 por vuelta

Gran Premiu d’Australia 2016 – Análisis por equipos

Dempués d’una visión xeneral de lo que foi’l Gran Premiu d’Australia, vamos dir parándonos equipu a equipu valorando un pocu’l rendimientu qu’amosaron tol fin de selmana.

– Mercedes: naide duldaba que diben de favoritos y especialmente dempués de ver como Hamilton taba a la cabeza de toles sesiones de llibres, por muncho agua que cayera’l vienres, y cómo se facía cola pole nuna sesión de calificación que dexó a tola xente desencantao. Intuyíase que diben facer un 1-2 como vien siendo la tónica nos últimos GPs, y anque al final foi asina, la batalla presentada por Ferrari a la salida y demientres la carrera fízonos albidrar que nun van ser too roses esti añu pa la escudería alemana. Victoria pa Nico Rosberg y segundu caxón del podium pa Hamilton, salvando los muebles dempués d’una mala salida.

– Ferrari: toles esperances tán puestes, dende cuantayá, na escudería rosso, y anque a Kimi sigue escorriéndolu la mala suerte, amosaron dambos que son l’equipu que puede poner en problemes a Mercedes. Posiblemente entá nun seyan quién a quita-yos la pole, pero ta visto qu’en carrera y cola estratexa afayadiza (ayeri Vettel vio escapar la victoria por cuenta d’una mala elección de los neumáticos) puen aspirar a munches más victories que l’añu pasáu.

– Red Bull: ye complicao facer una valoración xeneral del aniciu per parte de la escudería por cuenta de los problemes de Kvyat non sólo na calificación del sábadu sinon también ayeri cuando, tres la vuelta de formación nin siquiera pudo ocupar el so güecu na parrilla. El llabor sólido de Ricciardo, que foi cuartu, fainos pensar que tienen dao un pasu alantre dempués d’un 2015 con altes y baxes, pero va tocános esperar pa saber si foi sólo cosa d’un GP.

– Williams: la discreición vien siendo la pallabra a usar pa describir lo que vienen faciendo Williams dende los test. Ayeri en carrera, Massa terminó quintu y Bottas octavu, dempués de sufrir una sanción por cambiar la caxa cambios que lu fizo cayer a la posición 16. Tamos toos sollertes pa ver si por fin son quien a dar más de si, algamando una victoria que se-yos escapa dende tiempos de Pastor Maldonado en Barcelona 2012.

– Haas: ensin dulda, la sorpresa del GP diola Romain Grosjean col so sextu puestu en carrera. Pa un equipu recién entráu na máxima competición del motor ye muncho más qu’un bon resultáu y, anque nun podemos enfotanos en que toles carreres seyan asina (hai que tener en cuenta tolos factores que se dieron en carrera, ente ellos la bandera colorada) naide nun ñega que ye un mui bon empiezu. L’apunte negru púnxolu Esteban Gutiérrez, que quedó fuera del GP dempués d’un accidente con Fernando Alonso na vuelta 17.

– Force India: Con Hülkenberg dientro los puntos y Checo Pérez nel puestu 13, Force India completó un GP normalín, sumando puntos siempre necesarios pa un equipu como ellos, pero ensin facer grandes coses. Pérez pasó la carrera ensin ser quién a salir de los puestos que nun dan puntos, viéndoles colos Toro Rosso, los Renault y, dacuando, el McLaren de Jenson Button.

– Toro Rosso: tres de pasar perriba la escudería hermana en calificación, y de tener a Verstappen cuartu pela primer parte de la carrera, paez que sabe a pocu los dos últimos puestos que dan drechu a puntos (Sáinz novenu, Verstappen décimu). Dambos pilotos siguen dando muestres de por qué tán ehí y nel casu de Verstappen, una vez más, d’esi ímpetu que calteriza a los más mozos. Anque Helmut Marko se faiga’l llocu cuando-y pregunten que-y paeció l’actitú de Verstappen, de xuru qu’hebo dalgún tirón d’oreyes al pilotu holandés.

– Renault: bon trabayu de Renault en xeneral, non sólo na carrera sinon tamién na calificación y los llibres. Jolyon Palmer quedó a un puestu d’algamar los sos primeros puntos en F1 y el sábadu foi unu de los protagonistes d’una sesión de calificación que la mayoría queremos olvidar. El so compañeru, Magnussen, quedó per detrás d’elli, nel puestu 12, dempués de sufrir un pinchazu nos primeros metros de carrera.

– McLaren: yá se tien dicho y escrito muncho sobre l’accidente de Fernando Alonso nel GP, asina que nun vamos a dir sobre ello. No que cinca al GP, aparte de la so retirada, la escudería británica nun dio tantes muestres de meyora como s’esperaba, con errores na elección de neumáticos pel llau de Button que fizo que terminare n’un descafeináu puestu 14.

– Sauber: con Ericsson fuera xuegu y Nasr nel puestu 15, l’actuación de Sauber nel GP d’Australia 2016 ensin duldes nun va pasar a la hestoria como la meyor carrera pa esti equipu.

– Manor: la mala suerte cebose con Rio Haryanto que nun pudo completar el GP y tuvo de quedase nel garaxe demientres la bandera colorada. El so compañeru, Pascal Wehrlein, quedó 16.

Gran Premiu d’Australia 2016 – Carrera

Dempués d’un par d’entrenamientos llibres el vienres que dexaron un puñáu d’interrogantes nel aire y una xornada de sábado que nos dexó un poco tocaos dempués de comprobar lo que daba de sí’l nuevu formatu de clasificación (naide llevantó la voz pa dicir que-y prestaba) atopámonos el domingu, lluchando escontra’l sueñu unos, tirando de repetición otros.

Alboreció soleyero y, dempués de la sesión de calificación, ensin muncha novedá na parrilla, más allá de Kvyat (con problemes nel coche) y Bottas (saliendo P16 por cuenta una penalización de cinco posiciones por cambiar caxa de cambios). Nun había munches razones pa creyer que la carrera nun diba trescurrir dientro lo normal nos últimos dos años, esto ye, con Mercedes dominando. Albortóse la salida a cuenta d’un fallu nel coche de Kvyat que nin siquiera pudo colocase nel so puestu de parrilla, quedando tiráu al principiu de la recta de meta.

Sebastian Vettel vieno a despertar a tolos que taben con medio güeyu abiertu, colándose ente dambos Mercedes y faciéndose cola primer posición en cuestión de metros al empecipiar la carrera. De pasu, víemos como Hamilton terminaba sextu y Rosberg víase superáu por Räikkönen, quedando terceru. A partir d’ehí, Vettel foi poniendo distancia colos sos perseguidores ensin que paeciera que Mercedes reaccionara (de fecho, Hamilton nun dexaba quexase de la so incapacidá pa superar a Verstappen nel Toro Rosso).

httpss://youtu.be/3wtfh6DV-cc

El puntu d’inflexón de la carrera vieno na vuelta 19 tres un accidente tremendu protagonizáu por Esteban Gutiérrez y Fernando Alonso, nel que’l pilotu asturianu dexó a toos cola boca abierta pol estáu nel que quedó’l coche. Les bones noticies son que nun hai que lamentar consecuencies pa nengún de los pilotos. Col accidente vieno un Safety Car y llueu una bandera colorada, pola cantidá de restos que quedaron na pista y ser preciso llimpiala, lo cual perxudicó sobremanera a los equipos que tuvieren parao demientres el SC.

httpss://youtu.be/B71x5M2nC6A

El reaniciu de la carrera trexo un reaxuste d’estratexes, y la resurreción de Mercedes qu’aprovechó la floxera de Ferrari na eleición de neumáticos (montaren superblandos cuando’l restu de la parrilla diba con medios) pa poner a Rosberg primeru, con Hamilton segundu y Vettel intentando recuperar el tarrén perdíu. Un error de Vettel al garrar una curva punxo puntu final a la llucha con Hamilton y dexó’l podium conocíu: Rosberg ganó, siguíu del so compañeru d’equipu Lewis Hamilton, con Sebastian Vettel terceru. Ferrari sólo terminó con unu de los coches dempués de que Räikkönen tuviere de retirase.

Tamién dexó batalles perguapes ente los dos pilotos de Toro Rosso, con un Verstappen desesperáu porque l’equipu-y dexara pasar al compañeru, Sáinz Jr. Hai que destacar tamién el llabor de Romain Grosjean a bordu’l Haas, que consiguió la sexta posición, daqué más que meritorio pa un equipu que debutaba nesti GP.

Aparte de los yá nomaos Kvyat, Alonso, Gutiérrez y Räikkönen; Haryanto nun pudo terminar la carrera (retiró’l coche demientres la bandera colorada) lo mesmo que Marcus Ericsson, que tuvo de retirase delles vueltes dempués.

Empecipió la temporada, y fízolo con victoria d’un Mercedes, pero la realidá foi que vimos una carrera entretenida donde naide tevo nada fecho dende que les lluces coloraes s’apagaron. Embaxo podéis atopar la tabla cola calificación del sábadu y los resultaos del Gran Premiu:

Calificación

Pos Pilotu Tiempu
1 Lewis Hamilton 1:23.837
2 Nico Rosberg 1:24.197
3 Sebastian Vettel 1:24.675
4 Kimi Räikkönen 1:25.033
5 Max Verstappen 1:25.434
6 Felipe Massa 1:25.458
7 Carlos Sáinz 1:25.582
8 Daniel Ricciardo 1:25.589
9 Sergio Pérez 1:25.753
10 Nico Hülkenberg 1:25.865
11 Valtteri Bottas 1:25.961
12 Fernando Alonso 1:26.125
13 Jenson Button 1:26.304
14 Jolyon Palmer 1:27.601
15 Kevin Magnussen 1:27.742
16 Marcus Ericsson 1:27.435
17 Felipe Nasr 1:27.958
18 Daniil Kvyat 1:28.006
19 Romain Grosjean 1:28.322
20 Esteban Gutiérrez 1:29.606
21 Rio Haryanto 1:29.627
22 Pascal Wehrlein 1:29.642

Carrera

Pos Pilotu Tiempu Vuelta
1 Nico Rosberg 01:48:15.565 57
2 Lewis Hamilton + 8.060 57
3 Sebastian Vettel +9.643 57
4 Daniel Ricciardo +24.330 57
5 Felipe Massa +58.979 57
6 Romain Grosjean +1:12.081 57
7 Nico Hülkenberg +1:14.199 57
8 Valtteri Bottas +1:15.153 57
9 Carlos Sáinz Jr. +1:15.680 57
10 Max Verstappen +1:16.833 57
11 Jolyon Palmer +1:23.399 57
12 Kevin Magnussen +1:25.606 57
13 Sergio Pérez +1:31.699 57
14 Jenson Button +1 lap 56
15 Felipe Nasr +1 lap 56
16 Pascal Wehrlein +1 lap 56
Ret Marcus Ericsson 38
Ret Kimi Räikkönen 21
Ret Rio Haryanto 17
Ret Fernando Alonso 16
Ret Esteban Gutiérrez 16
NS* Daniil Kvyat 0

Nun dexéis de lleer tampoco l’analís del trabayu fechu polos equipos na carrera d’ayeri.

*NS: Nun salió

Gran Premiu d’Australia 2016 – Previa

Dempués d’una bayura artículos, llegó’l momento de ponese manes a la obra cola temporada 2016. Llegó’l Gran Premiu d’Australia.

Favoritu de munchos, anque nun tenga’l horariu más atractivu de la parrilla nin tea afayaizu dende un puntu de vista européu, aterrizamos en Melbourne, nel circuitu d’Albert Park, primera carrera del añu y quiciás símbolu de la incertidume: toos vimos lo que pasó nos test, toos nos ficimos les nuestres propies idees, pero hasta que los pilotos nun pisen l’acelerador dempués de ver apagase les lluces colloraes nun vamos saber qué ye de verdá lo qu’hai. Y nin siquiera entonces.

Una de les coses que recomienden los sabios d’esti deporte ye nun facer munchu casu de lo que pase n’Australia, aparte de por ser la primera carrera del añu, porque les sos calterístiques desvirtúen un pocu lo que puen ser les ganancies o pérdides de los equipos.

L’añu pasáu Lewis Hamilton foi dueñu y señor del Gran Premiu, faciéndose cola pole position el sábadu, y cola vuelta rápida y la carrera el domingu. Ta por ver si esti añu va poder repitir.

Magar que ye’l primer GP del añu nun arrastramos sanciones nin nengún fechu d’interés de carreres precedentes, pero si que ye pa tener en cuenta a la hora de siguir esti gran premiu la escoyeta de neumáticos cola que cuenta cada pilotu, cosa a la que nos tenemos que dir avezando:

2016-australia-neumaticos

Namás nos queda dir familiarizándonos col trazáu, los puntos d’interés, les zones onde se va a poder usar el DRS en carrera y ver cómo ye un on board en Albert Park nesti videu. El restu de datos del circuitu son los que siguen:

Llonxitú 5.303km
Ganador 2015 Lewis Hamilton (1:31:54.067)
Pole 2015 Lewis Hamilton (1:26.327)
Vuelta rápida 2015 Lewis Hamilton (1:30.945)
Récor Michael Schumacher – Ferrari 2004 (1:24.125)
Recta más llarga 860m
Velocidá punta 305km/h llegando a la curva 1
Lonx. Pitlane 280m (unos 21s en cruzalu)
Curva más rápida La 8 (257 km/h)
Curva más lenta La 15 (84 km/h)
Acelerador a fondu 61%
Consumu/vuelta 1.7Kg
ERS usu mediu
Desgaste frenu altu
Cambios de marcha 56 por vuelta

Previa temporada 2016 – Regles

Siguiendo col post anterior onde comentabemos les novedaes nos equipos nesta temporada, agora damos-y un repasu a los cambios del reglamentu a tener en cuenta pa nun perdese nada:

  • Númberu de Grandes Premios: esta temporada tendrá’l récor de carreres al añadir el Gran Premiu d’Europa en Baku (Azerbaixán) a les 20 del añu pasáu. Esti añu amás sí se celebrará’l Gran Premiu d’Alemaña que nun pudo correse daquella.
  • Unidaes de potencia (UP): esti añu nun habrá llímite nos elementos modificables nes UP (ye dicir, qué se cambia, porque sí hai llímite en cuántos: 32 de los 66 tokens nos que se divide la UP, l’añu que vien nun habrá restricción tala) y remocicáronse los escapes pa “meyorar” el soníu de los coches separando la salida del turbo (d’ehí qu’esti añu veamos “tubos d’escape” d’estremaes formes con más d’una salida). Amás, al haber más de 20 grandes premios, el númberu de veces que se podrá cambiar ensin sanción cada elementu de la UP (MGU-K, MGU-H, motor internu de combustión, almacenamientu d’enerxía -bateríes-, turbo y lletrónica de control) ye 5.
  • Neumáticos: esti añu introduzse’l compuestu ultrablandu (ultra-soft) arriendes d’una nueva regulación nel usu de los neumáticos. En total tendrán 13 xuegos de neumáticos de seco, 4 d’intermedios y 3 pa moyao. Nel casu de los neumáticos de seco habrán usase de la siguiente forma (toos escoyíos pol pilotu sacante onde se diz lo contrario):

Cuándo devolverán (xuegos)
40 minutos de FP1 1
Final de F1 1
Final de FP2 2
Final de FP3 2
Final de Q3 (*) 1 (escoyíu por Pirelli, el más blandu de los disponibles)
Quedaríen pa carrera (*) 4 + 2 (escoyíu por Pirelli, obligatorio usar ún de los dos)

*Los que lleguen a Q3 tendrán d’empezar la carrera col que marcaron el meyor tiempu en Q2, el restu podrán usar el xuegu reserváu pa Q3

  • Clasificación: habrá un formatu nuevu de clasificación con eliminación progresiva (ye importante siñalar que cuenten les vueltes qu’anicien dientro del tiempu de carrera, anque lleguen depués):
    • Q1: durará 16 minutos con tolos coches participantes en pista, darréu los primeros 7 minutos quedará elimináu el pilotu col peor tiempu y eliminaráse otru más cada minutu y mediu hasta que queden 15 coches.
    • Q2: durará 15 minutos colos coches que pasaren la Q1. Magar los primeros 6 minutos quedará elimináu el pilotu col peor tiempu y eliminaráse otru más cada minutu y mediu hasta que queden 8.
    • Q3: durará 14 minutos colos pilotos que pasen la Q2. Magar los primeros 5 minutos quedará elimináu el pilotu col peor tiempu y eliminaráse otru más cada minutu y mediu, quedaríen 2 pilotos que se xugaríen la pole
  • Llimitaciones na comunicación por radio: namás se podrán tresmitir por radio los mensaxes que tean nesta llista.

Previa temporada 2016 – Equipos

A una selmana del primer GP del añu y, poro, el principiu de la temporada vamos a intentar facer un resumen de lo que creemos que son les cuestiones a tener en cuenta una vez arranquen los motores.

Y empezamos poles novedaes en parrilla, onde a nivel d’equipos destaca la entrada del equipu americanu Haas qu’aspira a meyorar el resultáu de los últimos equipos que s’incorporaron a la competición.  Pa ello cuenta cola collaboración de Ferrari y non solo tocante a la unidá de potencia, apurriendo-yos estos más partes del coche (hasta’l coche que presentaron tien un ciertu aire al SF15-T, el Ferrari del añu pasáu). Al volante va a contar con Romain Grosjean, que llega de Lotus, y con Esteban Gutiérrez que tres el so pasu por Sauber y facer l’añu pasáu de pilotu reserva de Ferrari vuelve a los mandos d’un monoplaza. Veremos en qué llugar de la parrilla s’asitien.

Renault nun son precisamente buenos, pero nun participaben como equipu 2011. La marca francesa vuelve al asfaltu tres comprar l’equipu Lotus con Jolyon Palmer (el que yera pilotu reserva de Lotus) y Kevin Magnussen, que tres echa-y paciencia en McLaren como pilotu reserva vio como se-y zarraben unes puertes en Woking y se-y abríen otres n’Enstone.  Va a ser una temporada de transición lo mesmo pal coche como pa la escudería en xeneral mientres reconstruyen un equipu que seya quien a lluchar por too.  Tres el drama del añu pasáu con Red Bull, la marca del güe correrá tamién col propulsor fechu por Renault pero marcáu como TAG-Heuer, a los mandos siguirán Daniel Ricciardo y Daniil Kvyiat; otru equipu que tien per delantre una temporada de transición, como’l so hermanu pequeñu Toro Rosso, que sufre les rellaciones del so hermanu mayor con Renault y esti añu correrá cola unidá de potencia de Ferrari de 2015.  Sicasí, el tastu que dexaron los test ye que nun van ser el furgón de cola nin muncho menos, a lo menos nos primeros compases de la temporada. La competencia va a ser dura nos dos equipos de la bebida enerxético, yá que Carlos Sáinz y Max Verstappen van a tar apurando al máximu’l so segundu añu lluchando por un puestu nel primer equipu.

Manor nun son nuevos, pero nun tienen nada que ver col equipu que viemos l’añu pasáu, de vese emburriaos pola evolución previa del Ferrari pasarán a usar la especificación actual de Mercedes, teniéndolos como collaboradores tamién a otros niveles (tamién usarán Petronas como combustibles) y la tresmisión de Williams. Pa dar el pasu alantre pondrán al volante a Pascal Werhlein, pilotu del programa de Mercedes y reserva de les fleches platiaes, y a Rio Haryanto gracies a la apuesta del gobiernu indonesiu.

Sauber esti añu tendrá mayor competencia y siguirá contando con Felipe Nasr y Marcus Ericsson. El so mayor enemigu sedrá la economía y ser quien a tar l’altura y caltener la evolución tola temporada. Lo mesmo que Force India, qu’intentará sorprender como la pasada temporada y continuar cola evolución ascendiente y sigue confiando pa ello en Sergio Pérez y Niko Hülkenberg. Seria competencia topará nellos Williams, qu’esforzarase pa mantenese como tercer equipu de la parrilla ya intentará aspirar a dalgo más con Felipe Massa y Valtteri Bottas.

McLaren-Honda paez que poco a poco va recuperándose del desastre que foi l’añu pasáu, Fernando Alonso y Jenson Button caltienen la fe nos propulsores xaponeses y, si bien paez probable qu’abandonarán los últimos puestos porque la fiabilidá entra yá en parámetros más normales, inda nun sabemos con quien tarán compitiendo de tu a tu. Quiciás les unidaes de potencia d’Honda anden equilibraes coles de Renault, pero nun veremos como se resuelven toles variables hasta que nun s’apaguen les lluces del semáforu.

Mercedes va a ser l’enemigu a batir y Ferrari el primer candidatu a ello. Tres l’avance ponderatible del añu pasáu y aprovechándose de tolos recursos que tienen a mano, la escudería italiana intentará esti añu que Sebastian Vettel y Kimi Räikkönen tengan un coche a la par que los actuales campeones.  Mentanto, Mercedes buscará siguir dominando nel deporte y continuar sorprendiéndonos topando meyores onde paez que yá nun se puede sacar más y esti añu dexará correr con más llibertá al actual campeón Lewis Hamilton y a Nico Rosberg, qu’intentará qu’a la tercera vaya la vencida.

Estos son los protagonistes. Per delante tenemos ventiún carreres, cola novedá del premiu d’Europa en Baku, y bien de puntos qu’axuntar p’alzase con un nuevu campeonatu de Fórmula 1. La llucha empecipia el próximu domingu en Melbourne.

Resume de los tests d’iviernu

Damos por acabaos los tests con una sensación d’incertidume y de que la mayoría de los equipos, por nun dicir toos, tan escondiendo les cartes bastante bien.

La “gran novedá” d’esti últimu día tréxonosla Mercedes con una bandera colorada por un fallu de la tresmisión, un fallu que se produxo na vuelta 638 d’esti coche ente les dos selmanes; quiciás pa recordanos que tamién son d’esti mundu y tienen un llímite pese a los númberos estratosféricos de rodaxe que veníen asoleyando.

Pero, enantes de nada, vamos a ver los tiempos y vueltes que dexó esta xornada:

Pilotu Equipu Tiempu Neumáticu  Vueltes
Vettel Ferrari 1:22.852 SS 142
Sáinz Toro Rosso 1:23.134 US 133
Massa Williams 1:23.644 SS 129
Pérez Force India 1:23.721 SS 60
Hamilton Mercedes 1:24.133 M  69
Ricciardo Red Bull 1:24.427 S 123
Button McLaren 1:24.714 US 121
Palmer Renault 1:24:859 SS 90
Ericsson Sauber 1:25.031 S 132
Grosjean Haas 1:25:255 S 66
Gutiérrez Haas 1:25:422 SS 25
Haryanto Manor 1:25.899 US 58
Rosberg Mercedes 1:26:140 M  70

Y agora vamos col resume de los tests, equipu por equipu (podemos encontrar un resume numbéricu na páxina oficial de la F1):

  • Ferrari: ún de los equipos onde había más miraes posaes y el que llideró les tables los más de los díes, cosa que nun dexa de ser l’avezada los últimos años pero ensin dar pistes de cuala ye la diferencia con Mercedes y si esta vez tarán a la par o per delante. Los tiempos dan a pensar qu’en Maranello tamién tán guardando los sos ases na manga (ye particularmente llamativo lo cerca que ta Toro Rosso cola PU de 2015 d’ellos). Sufrieron más problemes de los esperaos a lo llargo de les dos selmanes, pero nada que paeza siñalable y que pueda influir una vez n’Australia
  • Williams: completo’l so programa ensin sobresaltos, anque nun estrenó el morru nuevu nestes selmanes (quiciás lo faiga en Baḥréin).  Vense competitivos y la so expectativa ye tar cerca de Ferrari, pero insistimos, ye dificil de situalos tovía.
  • Red Bull: la clave d’esti equipu que suel contar con bonos chasis ye en qué nivel va a tar la unidá de potencia de Renault esti añu (renomada nel so casu como TAG-Heuer).  Nun primer momentu paez que recuperaron dalgo de la distancia que teníen colos equipos que montaben Mercedes y Ferrari, pero una vez más habrá que ver en competición hasta que puntu lo visto en Barcelona se mantién.
  • Force India: teníen que demostrar que podíen continuar la recta ascendente cola qu’acabaron la temporada pasada y, polo visto nel asfaltu, siguen mirando hacia arriba y paez que-yos van a poner les coses difíciles a Williams. El gran pasu alantre ta dau, agora la dulda ta na capacidá d’evolución pela temporada que tendrá l’equipu.
  • Renault: de los que más sufrieron estes selmanes, nunos test que’l propiu Palmer calificaría como “dalgo desatrosos” nos que tuvieron que pelear con distintos problemes mecánicos. Ye cierto que la tardanza en rematar l’acuerdu de compra por parte de Renault l’añu pasáu facía que tuvieran que aceutar dalgunos compromisos na planificación d’esti añu, sicasí, la cuenta de vueltes nun ye tan mala como la pinten y quiciabes seya asumible nuna temporada de transición. La incógnita, como nel casu de Red Bull ye ónde tará esti añu el motor Renault.
  • Toro Rosso: si esperábemos ver esti equipu esti añu a la cola por ser l’únicu con un propulsor de 2015 equivocávamonos dafechu. Si bien ye verdá que a midida que los constructores vayan evolucionando les sos partes la diferencia d’esti equipu col restu tendría de tender a agrandase, paez que de momento siguen trabayando sobre la perbona base que yera’l coche de 2015 y que l’impactu del cambiu de motor nun foi tan grande como cabría pensar.  Hai que ver onde tien los llímites esti equipu que ta demostrando lo buenos que son sacando lo meyor de los recursos colos que cuenten.  Tampoco se puede olvidar que nun lu conducen dos pilotos que se conformen con poco y que lu esprimirán a fondo.
  • Sauber: anque nun pudieron poner el pista el C35 hasta la segunda selmana de test, la xente de Sauber nun quixo dexar de rodar col del añu pasáu la primer selmana. Una vez col coche col que van competir esti añu sufrieron dalgunos problemes na so unidá Ferrari que los quitaron de dar tantes vueltes como-yos prestaría. Unos de los candidatos a engarrase nos últimos puestos, habrá que ver si dieron el pasu alantre necesariu pa nun quedase atrás.
  • McLaren-Honda: llegaben necesitaos de demostrar qu’esti añu nun diba a ser un calcu de 2015 y demostráronlo, a lo menos no tocante a la fiabilidá del coche, sicasí paez que dexen deberes p’Australia al nun poder completar el programa que definíu pa los tests, asina que tovía probarán pieces nueves n’Australia. Si bien paez que los problemes d’ERS fueron desaniciaos y que avanzaron col compuestu de combustible, habrá que ver ónde los dexa nuna temporada na que paez que les diferencies s’estrenchen sobremanera. ¿Superar los problemes de 2015 quier dicir que tán onde lo dexaron en 2014? Esta vez paez que nun-yos va a faltar chasis, asina que habrá que ver lo que l’Honda ye quien a entregar y hasta ónde son quien a evolucionar.
  • Manor: esta temporada nun tien nada que ver con años anteriores pero tolos cambios tienen el so procesu. Si bien sigue viéndose-yos atrás dieron bona muestra de que tienen lo qu’hai que tener pa evitar los últimos puestos del paquete y yá nun falamos n’absoluto de chicanes móviles. Haryanto paez que foi sorteando les dificultaes d’adautación pocu a pocu y habrá que velu desenvolvese en verdadera competición. A midida que pase la temporada esti equipu debería dir ganando en fiabilidá y entrega, pero l’aniciu nun va a ser coser y cantar.
  • Haas: “los nuevos” yeren posiblemente la mayor incógnita ente les incógnites y notaron nel so cuerpu la dureza de la F1. Anque los americanos sufrieron colos problemes técnicos y con dalgún qu’otru sustu, hai que dicir que la so actuación nun tien comparanza pa nada cola de los equipos novatos a los que tábemos avezaos. Deprendiéronnos rápido que nun vienen a ser el vagón de cola y si son quien a terminar les carreres podríen pensar nos puntos. Tamién pudimos ver que la collaboración con Ferrari ye cercana y visible nos detalles del coche con arreglos aerodinámicos mui asemeyaos (especiamente en dalgunos difusores), anque’l coche tamién tien detalles propios que lu diferencien de la marca collaboradora.

Test d’iviernu 2 – Previa día 4

Llegó l’últimu día de test y con él los nervios y les prises yá que ye esta la última oportunidá pa optimizar toles coses enantes d’empecipiar la temporada (dientro dos selmanes yá tendremos a los coches n’Albert Park nes xornaes de llibres de los vienres). Ayeri dexonos delles cosines, ente elles, ensin duldes la más llamativa: la instalación del halo nel Ferrari de Kimi Räikkönen (Red Bull van probar güei otra especificación). Esti aparatu pretende servir como proteición pa la cabeza del pilotu en casu d’accidente (pa evitar desgracies como la de Jules Bianchi) y, como nun podía ser d’otra manera, provocó opiniones de tolos tipos, dende les aséptiques, propies de Kimi, que-y dio’l so “ok” reglamentariu, hasta les crítiques de Hülkenberg que diz que-y paez horrorosu. Guapures aparte, quédanos por ver si nun esiste nenguna torga pa que los pilotos puean usalu con confianza (comentábase la posibilidá de que quitare visibilidá nes salides, a la hora de mirar parriba pa les lluces del semáforu). Taremos sollertes a los pasos que se sigan dando nesi sen.

Tamién reaicionó la parrilla a les decisiones de cambiu nes sesiones de clasificación, que sólo van afeutar a Q1 y Q2, dexando la Q3 como taba hasta agora. Dellos pilotos, como Alonso por exemplu, nun paecen tar mui convencíos cola idea.

Ayeri foi un día dulce pa unos y non tanto pa otros: Haas viose torgáu por un accidente de Grosjean (ensin consecuencies pal pilotu); Palmer pudo facer con Renault parte del trabayu que nun ficiera nos test pasaos con Renault; Manor dio un pasín alante, anque siguen ensin terminar d’arrancar del too; McLaren-Honda completó otru día positivu pa la escudería, que nun dexa de dir ameyorando a puquitinos (magar dientro l’equipu quieran siguir siendo discretos a la hora xulgar los sos progresos); Ferrari foron los más rápidos, con halo incluyíu, ya’l restu equipos completaron otra xornada de test ensin munchu ruiu.

Los tiempos marcaos fueron los siguientes:

Pilotu Equipu Tiempu Neumáticu  Vueltes
Räikönnen Ferrari 1:22.765 US 136
Massa Williams 1:23.139 S 119
Hulkenberg Force India 1:23.251 US 137
Verstappen Toro Rosso 1:23.382 US 159
Rosberg Mercedes 1:24:126 M  81
Nasr Sauber 1:24.760 S 116
Alonso McLaren 1:24.870 SS 118
Wehrlein Manor 1:24.913 US 48
Kvyat Red Bull 1:25.141 S 121
Palmer Renault 1:26:224 S 98
Hamilton Mercedes 1:26.488 M  63
Grosjean Haas 1:27.196 S 78

Pa güei, güeyos puestos en Williams, qu’ayeri afirmaben ser quien a garrar a Ferrari esta temporada; Manor con Haryanto al volante; Mercedes, pa ver si deciden nesti últimu día montar les gomes más blandes, daqué qu’entá nun ficieron; y especialmente, güeyu a la solución qu’ufra Red Bull pal halo del que vos falábemos enantes.

Los pilotos en pista güei son:

MERCEDES AMG F1: Lewis Hamilton / Nico Rosberg
SCUDERIA FERRARI: Sebastian Vettel
WILLIAMS F1 RACING: Felipe Massa
RED BULL RACING: Daniel Ricciardo
FORCE INDIA: Sergio Pérez
RENAULT: Jolyon Palmer
SCUDERIA TORO ROSSO: Carlos Sáinz Jr.
SAUBER F1 TEAM: Marcus Ericsson
McLAREN-HONDA: Jenson Button
MANOR: Rio Haryanto
HAAS: Romain Grosjean / Esteban Gutiérrez

Tai sollertes al resume final de la tanda de test al final del día.