Entá col tastu del Gran Premiu na boca, casi tamos mirando a México pero nun queríemos pasar páxina ensin facer un análisis de lo que foi la carrera del domingu pa cada equipu:

– Mercedes: nun creyemos que dalguién nun confiara na capacidá de Hamilton pa facese cola victoria n’Austin. Lleva faciéndolo cuatro veces de les cinco posibles dende qu’empezara a haber Gran Premiu nel COTA y esti añu volvía a tener casi’l 90% de posibilidaes de ganar: ye un circuitu que se-y da especialmente bien, qu’esfruta y la situación nel mundial nun-y permite más que ganar. Pel otru llau, Rosberg fexo la carrera que tinía de facer, minimizando daños con respeutu a lo que fexo’l so compañeru pesie a la salida que fexo y gracies al coche de seguridá virtual que torgó la estratexa de Ricciardo cuando diba segundu.

– Red Bull: cada vegada pinta más que van ser Red Bull los segundos nel mundial de constructores. Anque nesta carrera namás puntuaron con un pilotu, tuvieron la suerte de qu’a Ferrari-yos pasó lo mesmo. Ricciardo fexo una carrera perbona, tando segundu gran parte d’ella, hasta que’l coche de seguridá provocáu pol so propiu compañeru d’equipu comprometío la so estratexa y fexo que perdiera esi segundu puestu y tuviera de conformase con ser terceru. Nel otru llau del box, Verstappen pasó la primer parte de la carrera batallando en pista, retrucando al so equipu de que nun taba corriendo pa ser cuartu, equivocándose a la hora de facer el so pit-stop pillando despreveníu al so equipu que salvó la situación como pudo. Pocu dempués, víemoslu parar el coche, quedando fuera del Gran Premiu por problemes cola caxa cambios.

– Ferrari: nin siquiera son quién a sacar ventaxa de los males de los sos rivales, yá qu’anque Red Bull sólo terminó con un coche, a ellos pasó-yos lo mesmo. Nel casu de Räikkönen, foi a cuenta d’un pit-stop nel que la rueda trasera drecha quedó mal apertada, resultando en que se fuera afloxando cuando’l pilotu finlandés taba enfocando la salida en cuesta del pitlane. Vettel pel so llau, fexo una bona carrera, anque sólo pudo ser cuartu. Estes selmanes se tien falao muncho del so aparente desencantu cola Scudería y la rellación tensa con Arrivabene. Ta claro que nun soplan vientos de felicidá nel equipu italianu.

– McLaren: en conxuntu McLaren fexo una carrera mui completa. Les calificaciones nun dexen claro’l puntu nel que tán ya’l domingu vimos a dambos pilotos metese nos puntos con facilidá (tamién beneficiaos polos incidentes de Hülkenberg, Bottas, Verstappen y Räikkönen). Button calificaba décimonovenu’l sábadu y adelantó diez posiciones pa terminar siendo novenu na carrera. Alonso esfrutó en pista, pesie a qu’al empiezu la carrera quexábase de ser adelantáu polos Renault, y regalonos dellos adelantamientos y batalles, especialmente na última parte de la carrera con Sáinz. Consiguió terminar quintu.

– Toro Rosso: nes últimes carreres, Sáinz nun consiguía tar contentu col coche, pero nun foi’l casu n’Austin. De fechu, el fin de selmana completu foi bien positivu pa elli, terminando sextu en carrera dempués de defendese d’Alonso durante un bon puñau de vueltes. Nun podemos dicir lo mesmo del so compañeru d’equipu, Daniil Kvyat, que dempués de confirmar el so asientu pa la temporada prósima cola escudería, tornaba a dar una imaxe bien probe, con dellos incidentes en pista con otros pilotos y una penalización de diez segundos. Terminó undécimu dempués de ganar una posición por penalización de Magnussen.

– Williams: lo mesmo que diximos pa Ferrari podría dicise pa Williams: nin siquiera puen aprovechase de los problemes del so másimu rival nel mundial de constructores, Force India, porque ellos tamién los tuvieron. Massa consiguió ser séptimu dempués de lluchar con un Fernando Alonso inspiráu. El so compañeru Valtteri Bottas nun puntuó, quedando décimosextu, dempués de vese envueltu nel incidente de la primer curva con Hülkenberg.

– Force India: Na so batalla personal con Williams siguen per delantre, gracies a que la escudería inglesa sólo sumó puntos con un coche. Puen respirar tranquilos yá que dempués del accidente de Hülkenberg al empiezu, paecía que-yos podíen recortar un puñáu de puntos, pero pal so aliviu, sólo unu de los Williams entró nos puntos. Pérez tuvo dellos momentos en pista, incidente con Kvyat incluyíu, pero consiguió acabar octavu.

– Haas: nun foi una carrera espléndida pal equipu en conxuntu, pero sí pa Grosjean, que dempués de deceicionase’l sábadu, volvía a los puntos nel Gran Premiu de casa y quedaba décimu Gutiérrez nun terminó. Esta yera una carrera perimportante pal equipu y anque nun pudieron lucise más, a lo menos consiguieron sumar otru puntín más.

– Renault: nun foi’l fin de selmana de Palmer. Ente problemes na calificación del sábadu y la información que l’equipu nun-y facilitaba (torgando asina vueltes d’otros pilotos) y la so frustración por nun poder adelantar al so compañeru d’equipu por mandatu del pitwall l’inglés nun tuvo’l so meyor fin de selmana. El so compañeru terminara undécimu pero foi penalizáu al final de la carrera con cinco segundos por nun devolver la posición al salise en pista cuando lluchaba con Kvyat. Al final terminó siendo duodécimu per detrás del pilotu rusu.

– Sauber: hebo parte de la carrera na que Marcus Ericsson llegó a tar acariciando los puntos, pero foi un espeyismu. Cada vez queden menos oportunidaes pa poder sumar un par de puntinos que los coloquen perriba Manor, y paecía qu’Austin diba ser el momentu. Ensin embargu, terminaron décimocuartu (Ericsson) y décimoquintu (Nasr).

– Manor: siguen terminando carreres con dambos coches, y siguen faciendo valer el puntu consiguíu n’Austria. Cada vegada ven más cerca’l final de la temporada y con ella la posibilidá de dar un pasu alantre gracies al beneficiu económicu que supón esi puntu. Quéden-yos namás tres carreres de siguir apertando y resistiendo (y cruciando los deos pa que Sauber nun tenga un Gran Premiu inspiráu y consiga puntuar).

Cuando los equipos yá dexaron atrás Suzuka y tienen tola mente puesta no que va ser el siguiente gran premiu del calendariu, el de los Estaos Xuníos, llegamos nós pa facer un análisis de lo que fizo cada equipu’l domingu en Xapón enantes de pasar páxina y empezar la xira americana:

– Mercedes: Rosberg lleva delles selmanes ensin dexar de dar golpes na mesa, amosando que ta nel meyor estáu de forma posible, tanto a nivel físicu como sicolóxicu. Ye esti últimu aspeutu’l más necesariu pa elli, el que creyemos que-y faltaba pa siquiera poder face-y un pocu sombra a Hamilton, que por contra, ta amosando, como yá fizo tantes otres veces nel pasáu, que cuando nun ta centráu ye’l so peor enemigu. Entá puen pasar munches coses nes carreres que nos queden, pero ta claro que si Hamilton quier amenorgar esi marxe que tien con Rosberg (l’alemán tien una ventaxa de 33 puntos) va tener que facer dalgo más qu’usar snapchat nes conferencies de prensa. La escudería alemana yá ye campeona del mundial de constructores por tercer añu consecutivu. Ensin duldes, más que merecío.

– Red Bull: si entá nos quedaben duldes de que yá-y teníen tomada la midía a Ferrari, nesta carrera yá desapaecieron. N’un circuitu nel que, teóricamente, la escudería italiana diba ser superior, vimos como Verstappen se colaba nel podiu ensin problema nengún y incluso se defendió de Hamilton nes vueltes finales. Ricciardo sufrió más en pista, y nun pudo ser más que sextu.

– Ferrari: Ta claro que tanto Vettel como Räikkonen partíen con penalización (Vettel tres posiciones pol incidente de Malasia con Rosberg y Räikkönen por cambiar la caxa cambios un pocu enantes de la carrera) pero nin siquiera los víemos plantar cara y anque intentaron ganar la partida a Mercedes en pista con una estratexa que nun prestó a munchos, terminaron fuera del podiu, siendo cuartu Vettel y quintu Räikkönen. Anque nun ye un mal resultáu, viendo les espectatives que teníen puestes nesta carrera, sí pue considerase dalgo deceicionante.

– Force India: Siguen ensin baxar la guardia, metiéndose con dambos pilotos nos puntos, y terminando carreres dexando amás bona imaxe. Yá tienen un marxe con respeuto a Williams de diez puntos, que nun son muncho si cuntamos qu’entá queden cuatro carreres, pero nun tien pinta de que vaigan dexar escapar munchos de los puntos que tengan a tiru. Hülkenberg amás de puntuar siendo octavu, dexónos un adelantamientu perguapu a Bottas y un “See you later” que prestó abondo a los fans. Nun podemos dexar de ver nesi adelantamientu un reflexu de lo que ta pasando nel mundial ente dambes escuderíes. Pérez consiguió acabar séptimu.

– Williams: Consiguieron sumar puntos con dambos coches, pero per detrás del so máximu competidor, Force India. Tres puntinos que saben a bien poco n’una de les lluches más interesantes que tenemos nel mundial de constructores. Felipe Massa terminó la carrera en novenu llugar, siendo Bottas décimu. Anqué entá queda tiempu pa que puedan pasar a Force India, la verdá ye que nun paez que-yos vaiga a ser fácil, y de fechu paeznos que si Force India nun se derrumben a última hora, los diez puntinos de diferencia puen ser colchón abondo d’equí al final de la temporada.

– Haas: Ficieron una sesión de calificación perbona, metiendo a dambos coches ente los diez primeros per primera vez nesta temporada. Ensin embargu, la deceición vieno en carrera, onde quedaron fuera de los puntos, con Grosjean nel undécimu puestu y Gutiérrez, que calificara décimu, nel veinte. Ensin duldes, un gran premiu que van querer más olvidar pronto. Amás, nel siguiente gran premiu cuerren en casa, razón de más pa quitar del mediu les males sensaciones en Xapón y centrase n’esfrutar el so primer gran premiu en casa.

– Renault: Ensin puntos esta vez, pero con un Palmer inspiráu, que volvió a tar per delantre de Magnussen. Ye como si, a estes altures del campeonatu, tuviere corriendo por conservar el so asientu, unu de los más cobiciaos agora mesmo na parrilla. Hai munchos candidatos, los dos pilotos actuales ente ellos, pero paez que Palmer púnxo les piles pa dar motivos a la escudería francesa pa escoyelu a elli. Dientro d’unes selmanes veremos si pagó la pena. El pilotu inglés terminó décimosegundu, mientres Magnussen foi décimocuartu.

– Toro Rosso: Carlos Sáinz resumía perfeutamente lo que foi la carrera pa elli, y paeznos que pa dambos pilotos: un desastre. En nengún momentu paecieron tar cómodos y de fechu nun hai más qu’echar un güeyu a la clasificación pa velos bien lloñe de los puestos que solíen ocupar hai unos cuantos meses. El baxón de forma de la escudería ye bultable, y el so únicu consuelu nesti gran premiu ye que los sos rivales nel mundial de constructores, McLaren, tampoco nun fueron quién a puntuar.

– Sauber: los equipos de los puestos baxos de la tabla suelen tener de conformase colo poco bueno que-yos toca, siempre xulgando como bueno dalgun aspeutu positivu que nun tan avezaos a esfrutar. Nesti casu, y anque quiciás sepa a poco, ye qu’Ericsson quedó per delantre de dambos McLaren, en décimoquintu llugar, ensin qu’estos pudieran pasalu en pista. Insistimos que nun ye motivu d’allegría, pero’l fechu de terminar la carrera yá ye un plus pa la escudería suiza, que de xuru ta deseyando que llegue’l 2017 d’una vez. Nasr terminó la carrera nel puestu décimonovenu.

– McLaren: La gran deceición del gran premiu vieno de la mano de la escudería inglesa y sobre manera del motor xaponés otra vuelta. Sabíemos que nun diben dir especialmente bien en Suzuka, y que Jenson Button diba penalizáu por cambiar la so unidá de potencia (anque eso significaba salir namás que cinco puestos per detrás de lo que yá calificara’l sábadu) pero tol mundo esperaba un poquiñín más, sobre too cuando falamos de correr na tierra d’Honda. Nin el coche nin les gomes respondieron y por ello Fernando Alonso foi decimusextu y Jenson Button decimuoctavu.

– Manor: Siguen acabando carreres y anque nun foi esti’l so gran premiu más brillante, nin tán contentos col resultáu, paeznos que sigue siendo dalgo a destacar. Nun podemos olvidar que sigue valiendo’l puntu consiguíu por Wehrlein n’Austria, que los coloca perriba Sauber nel mundial de constructores. Nun puen dexar de siguir trabayando hasta la última vuelta en Yas Marina dientro de mes y mediu.

Nun queda muncho pa ponenos a mirar yá pa Xapón, pero enantes de zarrar el capítulu de Malasia vamos repasar lo que fexo cada equipu’l domingu pasáu nel circuitu de Sepang:

– Red Bull: ensin duldes, los mayores beneficiaos de la rotura de motor de Hamilton. Tuvieron acariciando en dellos momentos el primer puestu en carrera, pero paecía que les sos propies pelees en pista (Verstappen llegó a pidir al equipu que “actuara” pa dexalu adelantar al so compañeru yá que yera más rápidu) diben da-y la victoria al pilotu de Mercedes. Ensin embargu, unes vueltes dempués diben vese premiaos con esa primer posición y con un coche de seguridá virtual que daba a Ricciardo la prioridá d’entrar en boxes, facilitando asina que llueu sólo tuviera de puxar pa facese cola so primer victoria del añu, la primera dende 2014. Verstappen terminó segundu.

– Mercedes: lluz y solombra na escudería alemana. Nun creyemos que quede entá naide nel mundu formuleru que nun sintiera les pallabres de Hamilton sobre lo que pasó na carrera. Los comentarios del inglés nun dexaron a naide indiferente, unos considérenlos una falta respetu al equipu, otros namás una forma de falar y un episodiu más nel xuegu de desestabilización que xueguen los pilotos de Mercedes dende hai bien de tiempu. El casu ye qu’agora mesmo Rosberg y Hamilton tán separtaos nel campeonatu por veintitrés puntos, casi como lo que val una victoria d’un gran premiu. De xuru qu’en Xapón va siguir falándose de Malasia pero nosotros vamos dexalo en que la mala suerte tornó a cebase con Hamilton dexándolu fuera de carrera por rotura d’un motor nuevu, demientres el so compañeru remontaba dende l’últimu puestu por un incidente nel que se vio envueltu na primer vuelta. L’alemán foi capaz de subir al podiu quedando terceru, anque nes últimes vueltes tuvo d’agrandar el marxe que lu separaba de Räikkönen por una penalización de diez segundos por un incidente n’un adelantamientu en pista al finlandés.

– Ferrari: siempre pasa que cada temporada la mala suerte paez cebase con un pilotu. Dalgunos dirán qu’esti añu toca-y a Hamilton, pero a nós paeznos qu’esto ta afeutando-y más a Vettel. L’incidente de la primer curva de carrera dexolu fuera cola suspensión rota, y cola deceición d’otru gran premiu ensin puntuar. El so movimientu en pista foi bastante fuerciáu, y anque sabemos que nun diba cola intención de provocar lo que pasó, sí que ye verdá que foi un error al que nun nos tien avezaos. En Xapón va partir con tres posiciones de penalización. Pel so llau, Kimi Räikkönen acabó cuartu, ensin muncha complicación anque ensin llegar a ser nunca una amenaza pa los tres primeros.

– Williams: el gran premiu de Felipe Massa empezaba yá torcíu na vuelta de calentamientu. Quedábase paráu y tuvo de salir dende’l pitlane. Dende ehí yá nun pudo facer muncho más y terminó décimoterceru. El so compañeru Valtteri Bottas quedó quintu, per delantre los dos Force India a los que yá tienen a tiru de tres puntos nel campeonatu de constructores.

– Force India: con dambos coches dientro de los puntos, Sergio Pérez en sextu puestu y Nico Hülkenberg n’octavu, consiguen mantenese cuartos nel mundial de constructores anque saben que nun puen despistase con Williams a tres puntos. De toles formes, nesta época de la temporada Force India solía amosar una baxada de forma qu’esti añu nun tamos viendo, polo que tienen bien de coses de les qu’allegrase na escudería.

– McLaren: los británicos repiten con dambos pilotos dientro los puntos y una perbona actuación d’Alonso saliendo últimu p’acabar séptimu. Jenson Button viose perxudicáu pol últimu coche de seguridá (pola rotura de Hamilton) que salió al pocu d’entrar a cambiar gomes y benefició a dellos pilotos que veníen per detrás. De toles formes, consiguió acabar novenu y McLaren allóñase cada vegada más de Toro Rosso y consolidando la sexta posición nel mundial de constructores. La siguiente carrera ye en casa asina qu’espérase d’ellos que, como mínimo, repitan lo que se vio’l domingu en Malasia y dambos coches puntúen.

– Renault: col sustu del vienres nel coche de Magnussen (un escape de combustible fexo que’l coche ardiera cuando’l pilotu danés dexaba’l garaxe) paecíanos que tábemos ente un gran premiu complicáu pa la escudería francesa. Y anque foi asina pel llau de Magnussen, que tuvo de retirase por un choque con Kvyat que dañó la parte trasera del so coche, nel llau de Jolyon Palmer taben de cellebración yá que consiguió colase nel puestu diez, sumando asina’l so primer puntu esta temporada, y unu más pa Renault. Nun tenemos claro qu’esti gran premiu faga pol restu la temporada, pero paeznos que yá yera hora que’l pilotu inglés tuviera la so oportunidá de sumar puntos.

– Toro Rosso: nun tuvieron muncha suerte na carrera, Sáinz con problemes dende la salida al apagase-y el coche, y Kvyat col choque con Magnussen, qu’anque nun lu fexo abandonar la carrera, sí condicionó la so posición. Sáinz foi undécimu y Kvyat décimocuartu. Cada vez-yos queda más lloñe la sexta posición del campeonatu de constructores.

– Sauber: cuando dicimos que siempre hai un pilotu en cada temporada col que la mala suerte se ceba, podemos facelo xeneral a un equipu nel casu de Sauber. Anque un puestu doce en carrera pue nun ser gran cosa, ye bastante llogru pa la escudería suiza, qu’esti añu nun ta pasando por una bona situación, yá dende bien pronto na temporada. De toles formes, con Nasr fuera de carrera por problemes (supuestamente col motor, anque dicho cola boca pequeña) entá-yos queda muncho que trabayar, ya’l suañu de puntuar esta temporada cada vez paez más complicáu.

– Manor: bona carrera de dambos pilotos, a los víemos incluso batallar en pista y que nun dexan de cumplir colos oxetivos de terminar carreres (y aprovechar los puntos que caigan). Wehrlein acabó perriba’l so compañeru en décimoquintu llugar, con Ocon décimosextu. El pilotu francés recibió dos penalizaciones por pasase de velocidá nel pitlane.

– Haas: xunto con Hamilton, los grandes perdedores del gran premiu. Grosjean tuvo otra vez problemes colos frenos, como los que nun lu dexaron participar nel gran premiu de Singapur hai dos selmanes, anque esta vez lu dexaben na gravilla. Esteban Gutiérrez pel so llau quedaba fuera por una rueda mal axustada que se soltó demientres el pilotu taba en pista y pola que Haas yá recibió multa. Nes entrevistes Grosjean, casi autoconvenciéndose, insistía en que tolo que la escudería americana tenía conseguío hasta agora taba siendo un regalu porque, siendo’l so primer añu nun pensaben siquiera en puntuar y agora mesmo tienen bien agarrada la octava posición nel mundial. A siguir trabayando.

Cola mayoría de los equipos yá de vuelta nes sos sedes y colos pilotos desperdigaos pol continente asiáticu ya’l européu, vamos facer un repasu a lo que cada escudería dio de sí nel pasáu gran premiu de Singapur:

– Mercedes: Podemos nomalos los triunfadores de la nueche, anque paeza que ye lo que siempre dicimos, pero teniendo en cuenta que corríen n’un circuitu onde suelen tener más problemes pa dominar, el domingu vímoslos lluchar pa poder pasar perriba de los sos rivales. Cuando’l coche nun marca tanto la diferencia tamién saben lluchar. Nun vamos repetir que la carrera de Rosberg foi de quitase’l sombreru y que Hamilton, anque más baxu, tamién fexo una bona carrera. La llucha pol campeonatu de pilotos sigue más qu’abierta.

– Red Bull: Yeren la principal amenaza pa Mercedes, y asina lo demostraron el domingu. Anque Verstappen nun anduvo mui finu si lu comparamos con Ricciardo, la verdá ye qu’en conxuntu l’equipu respondió a les espectatives que se teníen de la so actuación nesti gran premiu. Les últimes vueltes de Ricciardo intentando alcanzar a Rosberg son de los más reseñable d’esta carrera y cásique de los últimos años.

– Ferrari: Vettel víase torgáu’l sábadu por un problema na suspensión que lu facía salir últimu al nun poder marcar un tiempu competitivu mientres llegaba a box col coche sobre tres ruedes. Paecía que la so carrera taba sentenciada y en Ferrari tirábense de los pelos pensando nun fin de selmana nel que sí qu’había oportunidaes de lluchar polo más alto del caxón, pero conociendo al alemán (y el fechu de que yá lo fexo otra vez) sabíase que nun diba ser tan catastrófico. Y anque les actuaciones de Ferrari siguen sabiendo a poco (cuartu y quintu nesta carrera) teniendo en cuenta les circunstancies pueden respirar tranquilos, anque cola atención puesta nes decisiones a tomar nes estratexes de carrera, que siguen siendo la so debilidá.

– McLaren: A estes altures de la temporada yá vien siendo vezu qu’un McLaren termine la carrera ya’l otru quede fuera enantes de tiempu por problemes de dalgún tipu nel coche: o perda de potencia, o accidente, o lo que se tercie. Nesta ocasión, y por tercera vez en cinco carreres, tocaba-y a Jenson Button. Los incidentes de la salida cebáronse con elli tamién y na vuelta 43 tuvo que retirar el coche pesie a entrar en boxes pa intentar siguir en pista. El so compañeru, dempués d’una perbona salida na que llegó a ser quintu, consiguía terminar séptimu y sumar puntos pa la escudería, que sigue abriendo brecha con Toro Rosso.

– Force India: Dalgo asemeyao a lo de McLaren suel pasa-yos a Force India. Dicíemos na previa qu’esti yera un circuitu que se-yos da bien y Pérez pudo demostralo dempués de salir con ocho posiciones de penalización. Quedó octavu. El so compañeru nin siquiera llegó a la primer curva, y foi’l mayor afeutáu del incidente na salida, onde se convirtió nel rellenu d’un sandwich formuleru que lu dexó fuera de carrera. Pa aliviu de Force India, Williams nun puntuó, asina que siguen tando vivos na so llucha con ellos pol cuartu llugar nel campeonatu de constructores, un puntu perriba la escudería inglesa.

– Toro Rosso: Dempués de munches carreres víemos a Kvyat brillar. Un novenu puestu puede saber a pocu, pero teniendo en cuenta les sos males actuaciones dende que se “mudara” a Toro Rosso, esta carrera, esperamos, pue da-y un emburrión de cara al so futuru. El so compañeru nun pudo imitalu y quedó dafechu fuera los puntos, en décimocuartu puestu con problemes nel MGU-K.

– Renault: Nun tamos avezaos a ver esta temporada’l color amariellu de Renault dientro los puntos, pero Singapur ye una esceición pa too. Magnussen dicía que se-y facía increyible lo bien que diba’l coche y que casi-y sabía a poco’l décimu puestu que consiguió. Esi puntín va vali-yos bien na so defensa escontra Manor nel campeonatu de constructores. Los seis puntos que los separen deberíen ser suficientes pa que Renault asegure’l so novenu puestu. Palmer, pel so llau, anduvo perdíu pelos puestos baxos demientres tola carrera y sigui na cuerda floxo con respeutu a lo que puea pasar col so futuru en Renault. Acabó décimoquintu.

– Haas: Grosjean nun pudo nin salir por problemes col brake-by-wire, y Gutiérrez volvió a quedase a les puertes de puntuar. Ensin duldes foi un gran premiu pa olvidar pa la escudería norteamericana, pero teniendo en cuenta que yera la so primer vez, el fechu de ser casi quien a puntuar tendría de da-yos motivos, a lo menos, pa sorrir un poco. Cada carrera ye un descubrimientu pa ellos, y ta claro que nun van poder triunfar en toes, porque nin siquiera los equipos más consolidaos y poderosos lo faen. Empezaben el campeonatu col oxetivu d’acabar carreres y tán viéndose capaces de puntuar, asina que pue dicise que la temporada de Haas ta siendo bien positiva.

– Williams: Nun ta siendo’l so añu. Ente les carreres floxes que tienen y qu’encima nun paez que la suerte tea del so llau, en Singapur víemoslos fuera de los puntos otra vegada más. Massa a lo menos pudo terminar la carrera, siendo décimosegundu, pero Bottas foi’l tercer afeutáu del incidente de la salida y anque paró y pudo continuar delles vueltes, terminó por abandonar na 35.

– Sauber: Dambos coches terminaron y eso yá ye un llogru pa la escudería suiza. Nun puntuaron pero a lo menos nun se vieron afeutaos por nengún incidente en pista nin nes paraes. Nasr consiguió acabar per delantre’l so compañeru siendo décimoterceru, demientres qu’Ericsson foi décimoséptimu, per detrás de Pascal Wehrlein.

– Manor: Nun foi quiciás el gran premiu más positivu pa ellos. Con dellos incidentes demientres los entrenamientos llibres, paecía que nun diben brillar muncho’l domingu y tuvieron una carrera discreta, anque consiguieron colocar a un Sauber per detrás d’unu de los suyos. Ocon nun lo ta faciendo mal teniendo en cuenta lo que lleva nel coche y les posibilidaes qu’esti ufre, pero queda-yos entá muncho que trabayar. Esi puntín nel mundial de constructores val el so pesu n’oru.