Paecía complicao igualar lo que vimos en Monza hai siete díes. Pero Italia ta empeñada en pasar a la historia de la F1 nesti 2020 dándonos dos bonos espectáculos en dos entornos estremaos. Mugello estrenóse na categoría reina del deporte de motor y trunfó.

El resultáu nun dexa ver quiciás la bona carrera que tuvimos el domingu. Sí, ganó Hamilton, sí depués d’él llegó Bottas. Pero lo que asocedió ente la vuelta 1 y la 59 da pa muncho. Dos banderes coloraes, accidentes múltiples, adelantamientos y más adelantamientos, y un circuitu con dalgunos tifosi nes grades a los que Ferrari nun pudo contentar tampoco nesta ocasión.

Bottas dominó nes tres sesiones de llibres y apuntaba pole pal sábadu pero, como davezu, mostrose insuficiente énte la vuelta que fixo Hamilton. Terceru foi Verstappen y pintaba que la carrera nun diba ser mui distinta de dalgunes que tenemos visto nel pasáu, con estos tres pilotos mandando no cimero de la parriella. Hai que facer notar el quintu puestu de Leclerc, qu’esprimió’l so Ferrari nuna fecha importante pal so equipu: el so gran premiu númberu mil.

El domingu vimos hasta tres salides: la primera, ganóla Bottas y perdióla Hamilton, que salió mal y perdió posiciones, anque nun tardó en recuperase. Otru que tuvo una mala salida foi Verstappen. L’equipu tuvo de trabayar nel so coche hasta dellos minutos primero de ver les lluces coloraes del semáforu y nun foi raro velu perden puestos na salida. Quiciás lo que nun esperábemos, nun añu que ta siendo bastante tranquilu nes salides, yera l’apelotonamientu de la primer vuelta, na que Verstappen y Gasly quedaron fuera (la grava, vieya conocía que cásique escaecieramos yá), y otros pilotos sufrieron daños, como Vettel o Räikkönen. Esti primer incidente provocó que saliera’l coche de seguridá, momentu que dellos pilotos aprovecharon pa parar a cambiar gomes ya iguar daños.

La primer bandera colorada vieno n’entrando’l coche de seguridá de vuelta al garaxe. Bottas llideraba la carrera y, como suel ser vezu, quien ta no cimero marca l’arranque de la carrera cuando marcha Maylander de pista. Tamién suel ser vezu que’l primeru aguante tolo posible y arranque darréu, faciendo por pillar a quien lu sigue ensin posibilidá de siguilu. Foi lo que’l pilotu de Mercedes tentó de facer. El problema foi que los pilotos que rodaben más atrás, en viendo la bandera verde, aceleraron de más, provocando un accidente múltiple nel que munchos pilotos se vieron envueltos y quedaron fuera: Giovinazzi, Latifi, Sáinz y Magnussen vieron ehí terminada la so carrera nun momentu de caos énte’l que naide, nin siquier los pilotos, daben creitu. La bandera colorada nun tardó n’apaecer por cuenta de los restos que dexaron los coches qu’amás tuvieron de ser retiraos de la recta de meta.

Segunda salida. Seis pilotos menos. Tolos güeyos tán puestos enriba de George Russell y la música de los posibles puntos, cada vegada más cerca de Williams. Nesta segunda salida, Hamilton yá nun tuvo problemes y adelantó a Bottas rápido, poniendo distancia ente él ya’l so compañeru d’equipu, que tuvo cásique tol gran premiu buscando la forma de derrotar al inglés, ensin ésitu. Nel so primer tramu de carrera tuvo munchos problemes coles gomes. En tou esti tiempu, perdimos a otru pilotu, Esteban Ocon, por cuenta d’un sobrecalentamientu de los frenos.

Bottas naguaba por un coche de seguridá que-y diera una parada de baldre pa camudar les gomes que llevaba y que taben dando-y problemes cuando, na vuelta 43 Lance Stroll tuvo un pinchazu y acabó na grava y chocando contra les barreres. Otra bandera colorada, esta vegada pa iguar les proteiciones. Nesti momentu namás Ferrari y Mercedes teníen a dambos pilotos entá en pista. Tercer salida. Hamilton gana otra vuelta a Bottas y yá nun diba dexar el primer puestu hasta ver la bandera a cuadros. Quedaben doce pilotos y George Russell tinía una posibilidá real de puntuar. Sobre manera, depués d’una penalización a Kimi Räikkönen por una maniobra peligrosa a la hora d’entrar nel carril de pit. El finlandés recibió cinco segundos de penalización, que se diben sumar al final de la carrera y demientres les últimes vueltes, George Russell fizo por quedar a menos de cinco segundos del pilotu de Alfa Romeo pa poder llegar a punto. Sicasí, nun foi posible ya’l pilotu inglés quedó nel puestu once, per delantre de Grosjean y cerca de Vettel, que foi décimu.

Alex Albon sumó a la fin el so primer podiu depués de munchos intentos y munches duldes, aprovechando la oportunidá de tener fuera al so compañeru y resistiendo los ataques del Renault de Ricciardo, que tuvo de conformase con ser cuartu. Racing Point foi quintu con Sergio Pérez y McLaren sextu con Norris. Per detrás, Kvyat en sétimu puestu, Leclerc octavu, sumando puntos importantes anque insuficientes pa Ferrari, Räikkönen, qu’en verdá quedara per delantre de Leclerc anque llevó penalización como yá diximos.

Dexamos Italia con un bon tastu na boca depués de dos grandes premios mui especiales, ya’l primeru con xente de vuelta nes grades. La siguiente parada ye Rusia, el circuitu de Sochi. Tornen los circuitos conocíos y taremos sollertes a lo que pueda facer Valtteri Bottas nel asfaltu rusu que tan bien se-y da. Pero eso va ser dientro de dos selmanes.

2008. Nun circuitu de Monza moyáu, Sebastian Vettel gana la so primer carrera en F1 col equipu Toro Rosso.
2020. Nun circuitu de Monza secu pero vacíu de tifosi, Pierre Gasly gana la so primer carrera en F1 col equipu Alpha Tauri, enantes nomáu Toro Rosso.
La historia repítese.

Y si dalgo tenía falta la F1 yera d’una historia asomeyada a la qu’en 2008 protagonizó Vettel. Si amás el protagonista ye ún de los pilotos que más necesitaba reivindicase depués de tolo que tien pasao nos últimos meses, tenemos los ingredientes perfeutos pa una gran carrera. Podemos añadir que nengún de los tres grandes equipos subió al podiu y qu’esta tamién foi la ocasión na que los equipos de la parte medio de la tabla daben un puñetazu na mesa pa dicir qu’ellos tamién pueden ganar carreres y subir a podios.

Pudiera paecer que la carrera foi intensa de principiu a fin. Lo cierto ye que la primer mitá foi bastante discreta, casi tirando a aburrida, y cásique podíemos ver yá a Hamilton no cimero del podiu. Bottas tuvo una salida mui floxa y andaba perdíu pol sextu puestu con Verstappen faciendo por rondar a Hamilton y Carlos Sáinz aprovechando’l tirón de clasificar terceru’l sábadu, pero consciente de que contra Mercedes y Red Bull diba tenelo complicao. Ferrari, n’otru sábadu negru, andaben entavía más abaxo. De fechu, el primer abandonu protagonizolu Vettel que quedó ensin frenos. El suma y sigue del equipu italianu nun paez tener fin.

Otru de los qu’abandonó y desencadenó involuntariamente lo que diba venir depués en carrera foi Kevin Magnussen. Un problema col motor del coche lu dexó tiráu casi a la entrada del carril de pit y provocó un coche de seguridá que Hamilton rápidamente aprovechó pa parar. Diose la circunstancia de que’l coche de Magnussen, al tar au taba, obligó a zarrar el carril de pit, y asina se marcó a los pilotos con señales luminoses (en forma de cruz colorada) en pista. Nin Hamilton nin Giovinazzi fueron avisaos polos sos equipos de la prohibición y tuvieron que ser penalizaos, con un stop & go de diez segundos.

Enantes de que se decidiera la penalización d’estos dos pilotos, Charles Leclerc perdía’l coche d’atrás nuna curva y acababa nes proteiciones con un gran accidente del que salió ensin mayor problema pa él, anque les proteiciones tuvieron de reparase. La reparación provocó una bandera colorada qu’obligó a tolos pilotos a entrar en el carril de pit y aliniase n’orde de posición. Nesi momentu súpose la penalización de Hamilton y Giovinazzi que ponía yá en duldes esa victoria tan folgada de la que falábemos enantes.

De fechu, tres la bandera colorada, tuvimos una carrera totalmente distinta. Non sólo penalizó Hamilton, que foi quién a recuperar y acabar en puntos. También esta bandera colorada perxudicó a Red Bull, a dambos pilotos, que nun fueron a puntuar. Y no cimero tres protagonistes: Pierre Gasly, Carlos Sainz y Lance Stroll. Ellos tres diben tener tola atención el restu de la carrera: el francés por tar peleando pola so primer victoria en F1 nun gran premiu nel que Red Bull nin siquiera taba en puntos; el madrilanu tamién por llegar a ganar una carrera que yá pintaba bien dende’l principiu anque quiciás non tanto como pa suañar cola victoria. Y Lance Stroll, que foi quien a xubir al podiu y tuvo na so mano dalgo más, pero acabó desinflándose.

Les últimes vueltes fueron tenses pa los dos pilotos d’arriba, y de fechu, con un par d’elles más, ye fácil qu’en cuenta de Gasly fuera Sáinz el ganador. Pero’l francés pudo y supo imponese con un coche lixeramente inferior, nun circuitu nel que nun tinía nada que perder pero too que ganar. La gran pena foi que, siendo Alpha Tauri un equipu italianu, tuviera de celebrase ensin públicu. A falta de Ferrari, buenu ye un Alpha Tauri y de xuru la filial de Red Bull diba agradecer l’apoyu de los fans italianos.

El domingu non sólo ganó Gasly, ganó tamién la F1. Ganemos toos. Porque aparte d’una gran carrera, vimos a un pilotu que yá merecía una alegría algamar lo cimero del podiu, y éstes son les histories que presten. Mercedes ta mereciendo les victories y tar no más alto de les clasificaciones, pero ye verdá que cuando tenemos carreres nes que los protagonistes son otros, la F1 respira y dexa atrás los rumores d’aburrimientu o monopoliu de les fleches platiaes. Axallá nun seya esta la única carrera na que podamos celebrar novedaes como les d’esti eventu en Monza.

Nun vos despisteis. Tamos metíos nuna tanda de tres grandes premios n’Italia que nos lleva agora a la Toscana, al circuitu de Mugello.

De normal, una carrera como la de Bélxica nun nos diría muncho del campeonatu teniendo per delantre la segunda parte de la temporada, sicasí, esti 2020 tráxonos un gran premiu más bien tranquilu pero del que podemos sacar dalgunes conclusiones: la primera ye que Hamilton paez tar camín del so sétimu campeonatu del mundu. La segunda, que Ferrari en vez de meyorar va a peor con cada gran premiu, yá nun ye sólo cosa de Vettel. La tercera, que Williams podía tar más arriba de lo que ta con un poco más de suerte.

Daben agua pal gran premiu pero nunca nun asomó, tampocu’l sábadu, polo que tuvimos una sesión de clasificación que namás tuvo como sorpresa que Ferrari quedaron fuera de la Q3. Si pensamos que na tercer tanda d’entrenamientos Vettel quedara últimu y Leclerc nun lo fixera muncho meyor, el sábadu foi daqué positivu pa la Scuderia. El domingu confirmemos que, pesie a tener la oportunidá de metese en puntos (Leclerc tuvo ente los diez primeros parte de la carrera), l’equipu italianu necesita un cambiu mui grande si quier aprovechar dalgo d’esta temporada.

El sábadu, Hamilton fíxose con otra pole. Bottas tuvo de conformase cola segunda plaza. El finlandés paecía relativamente contentu col so puestu y tuvo oportunidaes en carrera, pero la realidá ye que Hamilton sabe bien cómo tenelu controláu en pista. Verstappen acompañó, otra vegada más, a los Mercedes nes primeres posiciones de la parriella. Hai que rescamplar la bona sesión de Renault, con Ricciardo cuartu y Ocon sextu, perriba de dambos McLaren.

El domingu, ensin agua, tuvimos una salida bastante tranquila. Hamilton almitió tener una salida probe, pero eso nun foi impedimentu pa caltener la so posición, que nun diba abandonar en tola carrera. El pilotu inglés comentaba que nun foi una carrera tan simple como podía paecer a la xente, y que tuvo de trabayalo en pista. La verdá ye que yá suma cinco victories de siete carreres y yá tien una ventaya de cuarenta y siete puntos col segundu pilotu, Max Verstappen nel mundial.

Tres una salida, como comentemos, bastante tranquila, tuvimos d’esperar a más adelantre en carrera pa empezar a vivir momentos daqué más intensos. Tuvimos dos abandonos, el de Giovinazzi y el de Russell. Una rueda mal afitada del pilotu italianu d’Alfa Romeo fíxolu abandonar y la mala suerte acompañó a George Russell que se topó con ella en pista. Nengún de los pilotos sufrió nengún problema sacante’l fechu de quedar fuera de carrera.

Ún de los protagonistes del gran premiu foi, probablemente, Pierre Gasly que sigui empeñáu n’amosar que Red Bull equivocóse al quita-y el volante nel primer equipu y de momentu ta dexando bonos momentos pesie a conducir ún de los coches de la parte medio de la tabla. Si tenemos que falar d’un equipu protagonista, ensin duldes, tien de ser Renault. Ye verdá que ye la primer vegada que vemos a dambos pilotos con un bon rendimientu, dientro de los puntos ensin los problemes qu’otres vegaes los tenemos visto carecer. Queda ver si van ser quien a replicalo en siete díes en Monza.

Nun podemos escaecer a Carlos Sáinz. El pilotu madrileñu nun tomó la salida por un problema col escape, duru golpe pa los intereses de McLaren que namás sumó puntos con Norris, que quedó sétimu. Tampoco Racing Point lo tuvo meyor y anque dambos pilotos puntuaron, sólo pudieron ser novenu (Stroll) y décimu (Pérez). La pelea pol cuartu puestu nel campeonatu d’equipos sigui mui competíu y si Renault por fin despertó, ye posible que les prósimes carreres seyan bien emocionantes.

El resume d’esti gran premiu de Bélxica ye bien cenciellu: faltu de momentos intensos como en grandes premios pasaos, Hamilton gana, siguíu del so compañeru d’equipu, cada vegada más lloñe de cualquier posibilidá de ganar el campeonatu, y de Max Verstappen, quiciás l’únicu pilotu que nestos momentos pudiera desafiar a Hamilton nesa llucha. La realidá ye que, tan pronto como en cosa de dos selmanes, l’inglés podría zarrar esta temporada y sumar asina’l so sétimu títulu. Pero pa eso tendremos d’esperar siete díes y aterrizar en Monza pal gran premiu d’Italia.

Hai delles coses que nun tán camudando pesie a la pandemia. Cambia l’orde de les carreres, les feches y los circuitos nos qu’hai eventos, pero caltiense una cosa: el dominiu de Mercedes. Esta vegada en Montmeló, nun circuitu ensin públicu como ye obligao estos díes, Lewis Hamilton tornó a ser el primeru en ver la bandera a cuadros. Amás, tolos pilotos sacante los cuatro primeros fueron doblaos, lo que fai un pocu la idea de cómo rinde’l Mercedes nesti 2020 y lo que ye quien a sacar Verstappen d’esti Red Bull. Foi segundu l’holandés, que nun pudo repetir resultáu, y Valtteri Bottas, que pasín ente pasu ve como les sos opciones d’algamar el campeonatu se compliquen, sobremanera agora col holandés un puestu per delantre d’él nel mundial de pilotos.

Nun hebo novedaes importantes na sesión de clasificación del sábadu. Pole pa Hamilton, con Bottas y Verstappen detrás. Bona actuación de Racing Point, que tán yá a un puntu de McLaren na clasificación de constructores, y de los pilotos del equipu de Woking, que siguen en puntos. Tolos güeyos taben puestos no que podía pasar el domingu, la xestión de gomes na que tanto insistimos na previa y en cómo diba aprovechase Verstappen de les posibles debilidaes de los Mercedes.

Sicasí el domingu namás hebo un Mercedes con debilidá: el de Valtteri Bottas, que perdió lo consiguío’l sábadu en pocos metros y llegó a tar quintu depués de salir segundu. Yá comentábemos qu’había dalgunos pilotos que nun taben aprovechando les posiciones del sábadu, y foi’l casu del finlandés qu’acabó en podiu pero que tuvo que lluchar dende bien ceo por recuperar les posiciones perdíes, dalgo que nun foi quién a facer con Verstappen.

Foi una salida llimpia, ensin nengún incidente y con bastantes adelantamientos, como’l doble de los Racing Point a Bottas. Hamilton tuvo una bona salida y pronto amarró la primer posición que nun diba soltar hasta ver la bandera a cuadros. Pela parte medio y baxo de la tabla, nun hebo nengún toque ente coches más allá de lo apertao de les curves, pero nengún sufrió como pa quedar fuera de carrera tan llueu.

Max Verstappen foi ún de los primeros d’arriba en parar, na vuelta 22, forciando a Mercedes, que diben controlando les gomes pa evitar sustos como los de selmanes pasaes, a vixilar la so estratexa de paraes. Dos vueltes tardaría Mercedes en parar a dambos pilotos, casi siguíos, con una parada un pelín más lenta de lo que quixeren nel casu del inglés, pero que nun punxo en peligru’l so llideralgu. Lo que nun pudieron evitar ye que Verstappen quedara per delantre de Bottas en saliendo’l finlandés de la so parada.

Nun foi un gran premiu abondo vistosu, pero tuvimos oportunidá de ver dellos adelantamientos interesantes pela parte medio la tabla, como vien siendo vezu. Los Haas tuvieron dellos momentos inspiraos en pista, pero nada de lo que vimos el vienres en los llibres, cuando dambos quedaron ente los diez primeros (Grosjean llegó a quedar quintu), pudo vese depués en carrera. Por exemplu, Magnussen foi adelantáu casi de siguío por Ocon, Albon y Sáinz na vuelta 28, cuando intentaba metese en puntos, ensin que’l pilotu danés pudiera evitalo. Grosjean acabaría l’últimu cuando, a falta de pocu pa rematar la carrera, fixo un trompu en pista. L’equipu estauxunidense paez, de momentu, condergáu a engarrase por nun acabar l’últimu esta temporada.

Racing Point y McLaren tuvieron un bon día. Yá comentemos que tán separtaos per un puntu nel mundial de constructores. Pérez tuvo una penalización de cinco segundos por nun facer casu a les banderes azules cuando rodaba quintu y pudiera acabar más arriba, pero tanto él como’l so compañeru fixeron una carrera curiosa. McLaren nun pudo facelo meyor anque sumó puntos con dambos pilotos. Sáinz rindió bastante meyor nesta ocasión de Norris, nun hebo problemes nes paraes y tovía los vimos ser protagonistes de dalgunos de los meyores adelantamientos del domingu. Anque a menor ritmu, McLaren siguen sumando puntos, dalgo que-yos interesa muncho nesi intentu de tornar a ser cuartos al final de la temporada.

Sedría na vuelta 37 cuando llegara’l primer abandonu: Charles Leclerc. Un fallu nel motor provocó un trompu que lu dexó travesáu en pista y ensin posibilidá de continuar más que cuatro vueltes. El domingu de Ferrari foi, en xeneral, pal escaezu. Nun paez que la rellación de Vettel cola so contorna tea ameyorando, a lo que sumamos falta d’entendimientu y d’enfotu, quiciás peles dos partes. L’alemán foi sétimu, una posición discreta pero que, sintiendo les sos declaraciones, foi un llogru pa él según como diba’l coche. Abultaba que col cambiu de chasis les coses ameyoraran, como vimos el vienres, pero en carrera l’asuntu foi bien distintu.

Alfa Romeo continua col baxu rendimientu col qu’entamó la temporada. Cuando más notamos la so presencia ye porque dalgo pasó en pista con dalgún adelantamientu axustáu o por dalguna visita a la grava, pero nun tán consiguiendo dar bones noticies sobre les sos actuaciones, lo mesmo Giovinazzi que Räikkönen. El so estáu de forma ye mui asemeyáu agora mesmo al de Haas. Williams tampoco nun ta muncho meyor, pero viniendo de lo negativo de 2019 paez que compensen un poco más los sos resultaos probes. Ye verdá que nun tán puntuando pero viendo lo que facíen la temporada pasada, ye más realista pensar que puedan facelo en dalgún momentu esti añu. Pa los tres equipos, esti gran premiu en Montmeló va quedar archivau rápido.

Alpha Tauri, pa lo último, consiguió puntos gracies a Pierre Gasly, que sigui empeñáu n’amosar que nun ye tan mal pilotu como lu quixeron pintar nel so tiempu en Red Bull. De fechu, Alex Albon, el pilotu que lu sustituyó, namás pudo ser octavu, xusto per delantre d’él.

Insistimos que nun foi una carrera mui vistosa, pero a vegaes la F1 precisa d’estes carreres más tranquiles pa garrar fuercia y trayenos eventos más interesantes. Sicasí, agora toca esperar dos selmanes, hasta l’últimu fin de selmana d’agostu, pa visitar otru circuitu, el míticu Spa-Francorchamps pal gran premiu de Bélxica d’esti 2020.

Esta vez nun hebo reventones pero sí xestión de gomes. El pilotu que supo manexase meyor nes condiciones qu’ufría Silverstone esti domingu foi quien salió victoriosu y, anque pudiera paecenos raro, esti nun diba nun Mercedes.

Y ye que la clasificación del sábadu, con pole pa Bottas y Hamilton segundu con un Hülkenberg inspiradísimu na tercer posición, facía albidrar otru gran premiu de dominiu platiáu. Pero yá avisemos: les gomes escoyíes pa esti gran premiu yeren más blandes, diben obligar a más paraes y a una xestión más intensa per parte de los pilotos. Hamilton suel amosar bones maneres nesti asuntu, Bottas nun lo fai mal tampocu, pero Verstappen fíxose cargu de pasar perriba los sos rivales con una bona estratexa sumada a un bon manexu de lo que Pirelli ufría pa esti gran premiu. Col so meyor estilu, el pilotu holandés ganó per primer vegada en Silverstone y suma yá nueve victories.

Nun foi un gran premiu de grandes momentos nin d’abandonos numberosos. De fechu’l primer y únicu foi Magnussen y porque diba últimu a muncha distancia del restu y arrastraba una penalización por un alcuentru con Latifi en pista que los comisarios consideraron sancionable. Nun foi tampocu un gran premiu d’adelantamientos imposibles, anque dellos vimos, como davezu na parte media de la tabla.

Sí foi’l gran premiu de les gomes, de l’ansiedá nes paraes en boxes, de controlar al milímetru lo que facía l’otru pa replicalu y de sacar tol rendimientu posible al coche. Dalgunos pilotos viéronse condicionaos poles paraes de los sos equipos, como ye’l casu de Sáinz o Vettel. Falando del alemán, per radio dexó claro que la relación equipu-pilotu nun ye bona, dalgo que pudiera desplicar el baxu rendimientu del coche y l’aparente falta d’enfotu del pilotu. El so compañeru Leclerc, nuna meyor estratexa qu’él, foi cuartu, puestu que nun duldó en celebrar como si fuere un podiu. Les coses nun pinten bien en Ferrari y yá nun ye sólo pol coche.

Hülkenberg nun foi quien a tornar esi tercer puestu na clasificación nun podiu, y el so sétimu puestu casi nos cai deceicionante polo qu’esperábemos d’él. Nun podemos escaecer la sanción que cayó sobre Racing Point tres la denuncia de Renault al so coche pa 2020 y que trai perda de puntos y multa económica. Sicasí, tanto l’alemán como’l so compañeru Stroll clasificaron ente los diez primeros, que ye dalgo que l’añu pasáu nun consiguieron hasta bien avanzada la temporada.

Per detrás, Williams ta pasando perriba Haas en dellos momentos. Ensin entavía pensar en puntos, sí ye verdá que l’equipu inglés ta aprovechando la baxa forma de los estauxunidenses pa dir, pasín ente pasu, superándolos en carrera. Haas nun da amueses de meyora y paez que tamos énte otru añu deceicionante y col peligru, esta vegada, de nun llegar a puntos en nenguna carrera. Entavía queda tiempu ya’l fechu de que vaigamos a visitar dellos circuitos nuevos puede favorecelos pero ye verdá que, de momentu, nun hai motivos pa ser optimistes.

Tampocu nun pueden tar contentos n’Alfa Romeo. Paez que nun son quien a dar cola solución pal so baxu rendimientu y otra vegada los vimos siendo de los más lentos de la parriella. Tienen regularidá, el coche nun da problemes, pero la velocidá nun ta ehí y ensin ella, nun tán los puntos. Dalgo más contentos tán n’Alpha Tauri, qu’anque pocos, van sumando puntos en casi toles carreres. Nesti eventu tocó-y a Kvyat sumar un puntu, pesie a que’l so compañeru Gasly tuvo gran parte de la carrera dientro de los diez primeros. Sicasí, la estratexa del equipu y la xestión de los gomes acabaron dexándolu nel puestu once.

McLaren tuvo una bona carrera, pesie a les paraes y la mala suerte de Sáinz, qu’atopó tráfico de la que salía de box y tuvo de frenar, dexando pasar a otru pilotu y perdiendo tiempu que lu dexó fuera de puntos. Norris tuvo una actuación discreta, pero sumó puntos. L’inglés ta quintu na clasificación de pilotos y l’equipu ye cuartu, a dos puntos de Ferrari.

Renault llevó una alegría nos entrenamientos cuando Daniel Ricciardo quedó terceru nuna de les sesiones. Pero nun duró y anque sumaron puntos foi namás con Ocon, que quedó octavu. Ricciardo tuvo un incidente en pista y acabó nel puestu décimocuartu, lloñe de les sos aspiraciones y de les promeses de los entrenamientos. Entavía tienen muncho que trabayar na escudería francesa.

Fueron dos grandes premios intensos por razones estremadas, pero dexamos Silverstone cola sensación de tener vivío dos carreres bien prestoses. El rumbu va agora hacia Barcelona. Nunos díes nel Circuit de Catalunya va celebrase’l siguiente gran premiu d’esta temporada y au cuidamos ver un dibuxu distintu de lo que vimos nes carreres pasaes.