Pasín ente pasu vamos averándonos a ochobre y a les carreres que marquen la recta final d’esta temporada. Entavía tenemos bien d’elles y nada decidío, pero cada vegada van quedando menos puntos y les tensiones nun dexen de medrar. Depués d’un gran premiu d’Italia que tornó a dexanos un incidente ente los dos competidores pol títulu y la primer victoria de McLaren depués de munchu tiempu, aterrizamos en Sochi, nel circuitu rusu nel que, nos últimos años, tien dominao Mercedes. Ye verdá que nun ye territoriu Hamilton y que Bottas tien bien garrada la midida a esti trazáu, pero tamién ye verdá, que tando como tán les coses, sacante un abandonu de Hamilton, abúltanos difícil que Mercedes quiera que gane Bottas si puede facelo l’inglés. Y ye qu’agora mesmo, los puntos que van quedando pel camín son cada vegada más valiosos tanto pa Verstappen como pa Hamilton, polo que sabemos que da un pocu igual si Mercedes dominaba en Sochi, de xuru vamos ver a un Red Bull tentando d’acabar con esi dominiu. Nun podemos escaecer que Verstappen parte con penalización de tres posiciones pol incidente con Hamilton en Monza, dalgo que pa dar un pocu más d’emoción a la carrera.

Tenemos delles noticies que vamos actualizando nel nuestru artículu de la silly season que nun dexa de medrar. Per un llau la confirmación oficial de qu’Aston Martin va competir l’añu que vien con Sebastian Vettel y Lance Stroll como pilotos. Tamién Haas confirmó que tanto Mick Schumacher como Nikita Mazepin van continuar otra temporada con ellos. Nel casu de la escudería Aston Martin, anque nun ta siendo una temporada brillante, sí que tán teniendo momentos interesantes, como les dos segundes posiciones de Vettel n’Azerbaixán ya Hungría, anque esti últimu a la fin quedara en descalificación.

Ferrari nun pudo contener a McLaren en Monza, y agora atópase per detrás na clasificación de pilotos y ensin munchu enfotu en poder facer daqué en Sochi p’amenorgar la distancia. Charles Leclerc va tener penalización por cambiu d’unidá de potencia, polo que’l so fin de selmana yá nun entama en positivu. Sicasí, la posibilidá de qu’haiga lluvia puede, como yá sabemos, alteriar les coses. Ye fácil que llueva’l sábadu, y hai delles posibilidaes pa vienres y domingu, anque paez que, como dicimos, lo más probable ye que si llueve seya pa la sesión de clasificación.

Kimi Räikkönen torna al trabayu depués de tres selmanes alloñáu de les pistes por cuenta’l coronavirus. Tando yá na recta final del campeonatu, el finlandés va sumando los que van ser los sos últimos grandes premios na F1, polo que de xuru va tar contentu de ponese otra vuelta al mandu del so monoplaza. Antonio Giovinazzi, pel so lláu, entavía nun sabe qué va ser del so futuru pa 2022, pero cuida facer una bona actuación de Sochi, con dalgo más de suerte qu’en Monza, pa poder xustificar la so presencia na parriella del añu que vien.

Aterrizamos pues en Rusia, nesti circuitu soleyeru y nel que Mercedes vien reinando dende 2014. Taremos sollertes a lo que pueda facer Max Verstappen dende la so posición de penalización, asina como de lo que puedan facer equipos como McLaren frente a Ferrari, y Alpine, qu’en principiu deberíen dir bastante meyor equí qu’en Monza.

Nun perdáis detalle d’horarios y tola información que precisáis pa esti fin de selmana formuleru:

Y estes son les gomes que van montar los equipos demientres esti fin de selmana:

Entá tamos recuperando de lo que foi’l gran premiu d’hai menos d’una selmana en Zandvoort y yá tenemos la vista puesta n’Italia, nel míticu circuitu de Monza. Casi podemos sintir el glayar de los tifosi, deseyando ver la solombra colorada del Ferrari pel trazáu italianu. Aterrizamos con munches noticies en forma de cambios pa 2022 que vos tamos detallando y actualizando nesti artículu, pero tamién con otra edición de la clasificación al sprint que yá vivimos hai delles selmanes en Silverstone. La so primer vegada recibió crítiques tanto bones como males, asina que nesta segunda toca ver si ye en verdá dalgo que convence o si quedara como una prueba más nun intentu por innovar na F1.

Por si nun vos alcordais, esti viernes vamos tener una sesión de llibres, como davezu, y depués la clasificación pal sprint del sábadu. Esti día, vamos tener otra sesión de llibres y más tarde el sprint, que va decidir les posiciones de partida de la parriella del domingu. El sprint son cien kilómetros de recorríu y lleven puntos los tres primeros (3, 2 y 1). El domingu, finalmente, tendremos la carrera.

Como novedá más importante pa Monza tenemos la presencia de Robert Kubiça a los mandos del Alfa Romeo. Como yá comentemos, Kimi Räikkönen nun pudo competir en Zandvoort por dar positivo en coronavirus y pola mesma razón entá nun puede facelo en Monza. Ye otra oportunidá d’oru pal polacu pa tener dellos kilómetros nel bolsu.

No que cinca a la carrera, esperamos tornar a ver competición no cimero, con Verstappen de vuelta nel llideralgu del campeonatu pero por un marxe bien pequeñu. L’holandés precisa d’una bona carrera, de sumar tolos puntos que pueda, y de dalgún fallu nel llau de Mercedes que-y permite facer medrar esa distancia qu’agora lu separa de Hamilton. Ferrari tien necesidá de facer un bon gran premiu énte’l so públicu, aprovechando amás la debilidá amosada nes carreres pasaes por McLaren, que ta agora cuartu per detrás del equipu italianu.

Va ser un gran premiu de munches alcordances p’AlphaTauri y sobre too pa Pierre Gasly. Hai un añu conseguía la so primer victoria na F1 depués de pasar un añu nel que lu echaron de Red Bull y perdió a ún de los sos meyores amigos y tamién pilotu Anthoine Hubert. En condiciones normales ye difícil que’l francés pueda facese con otra victoria equí, pero ta diendo a bon ritmu, como vimos en Zandvoort, asina que tien posibilidades de facer un bon trabayu.

En Williams yá saben que nun cuenten con George Russell pa 2022, pero sí con Alex Albon, que va formar pareya con Nicholas Latifi. El canadiense, que ta casi siempre a la solombra del so compañeru d’equipu, paez que convence a los dueños del equipu inglés. Sicasí, tamos entá en 2021 y, viendo como fueron les carreres hasta güei, nun podemos descartar que Williams sume más puntos de los que tien, complicando entá más a Alfa Romeo y Haas el poder alcanzalos.

Nun son bonos tiempos pal equipu estauxunidense. A les actuaciones probes, súmense les crítiques esternes que ciertamente nun ayuden a la moral d’un equipu que paez qu’esta temporada ta condergáu a zarrar la clasificación de constructores y pilotos. Sicasí, nun 2021 con carreres tan abiertes, nun podemos dar nada por zarrao hasta’l final.

Llegamos pues al gran premiu d’Italia con ganes de sintir l’atmósfera única d’esi entornu, la velocidá de los monoplaces y la intensidá de les diverses batalles que tenemos en distintos puntos de la parriella. Los horarios pa esti fin de selmana son los siguientes:

No que cinca a les gomes, esto ye lo que vamos a ver en pista:

Pasaran 36 años dende la última vegada que la F1 punxera un pie nel circuitu de Zandvoort, y tantos años y dellos retoques depués, aterrizaba esti fin de selmana ellí l’espectáculu del motor. Les sesiones de llibres dexaron munches banderes coloraes, salíes de pista y demás problemes pa los pilotos, lo que nos facía albidrar que la sesión de clasificación y la carrera diben ser mui intenses. Sicasí, podemos dicir que la clasificación dexó delles sorpreses pero en carrera ganó quien tenía que ganar.

Y ye que’l sábadu, Sergio Pérez nun pasó de la Q1 y con él Sebastian Vettel, yá que dambos fueron estorbaos polos Haas de Mazepin y Schumacher. Nun ye que penalizalos fuera solucionar nada, pero dambos pilotos diben rodando bien y pa ellos, sobre manera pa Pérez, foi una gran deceición vese fuera tan ceo. La Q2 acabó enantes de tiempu, depués de que Latifi tuviera un accidente bastante grande que lu dexó fuera a él y al so compañeru d’equipu sin posibilidá de replicar lo que ficiera en Bélxica, pero tamién al McLaren de Lando Norris. La lucha pola pole nun tuvo muncho secretu, pues Max Verstappen nun dexó marxe nengún a los Mercedes, que tuvieron de conformase con escoltalu tres fallar nel intentu d’undercut que fizo a Hamilton salir en tráficu y nun poder recortar tiempu.

Hai qu’almitir que la carrera dio pa muncho menos de lo qu’esperábemos. Nun hebo bandera colorada nenguna, malpenes incidentes, y namás que dos abandonos que fueron por averíes. Amás, nun circuitu nel que ye tan abegoso adelantar, namás Sergio Pérez, necesitáu de puntos, s’atrevía a movimientos que lu ayudaren a xubir posiciones na clasificación. A la fin, el mexicanu foi octavu. Pero la llucha pol podiu, anque en dellos momentos tuvo interesante y reñida, cásique abultaba resuelta dende que s’apagaron les lluces colloraes del semáforu de salida. Vimos un bon rendimiento a los Alpine, con Fernando Alonso sextu con una mui bona salida y xestión de les gomes y Ocon novenu. Tamién toca señalar el cuartu puestu de Pierre Gasly, que yá clasificó mui bien el sábadu, tamién cuartu con un bon rendimientu’l domingu. El so compañeru, ensin embargu, acabó’l gran premiu enantes de tiempu.

Ferrari tinía munches posibilidaes d’atropar puntos y pasar a McLaren nel campeonatu de constructores. Diben muncho meyor que l’equipu inglés nos entrenos, ya’l revés de la clasificación con Norris, abrió la puerta a sumar bastantes puntos más que’l so rival. Anque l’inglés de McLaren acabó siendo décimu, quedando per delantre del so compañeru d’equipu aun clasificando dellos puestos per detrás, esi únicu puntu nun valió pa muncho frente al quintu puestu de Leclerc y al sétimu de Sáinz. Ferrari tien agora una ventaya d’once puntos y mediu con McLaren y Lando Norris perdió’l so tercer puestu nel mundial de constructores con Bottas, que foi terceru. Asina, continua la batalla por esi tercer puestu qu’agora ta nes manes del equipu italianu y que va correr en casa nunos díes, nel circuitu de Monza.

La deceición más grande del fin de selmana ye, probablemente, Aston Martin. Vettel tuvo condicionáu pol bloquéu del Haas de Mazepin, pero amás l’alemán tuvo un trompu en pista en carrera que yá lu dexó fuera de les opciones de sumar dalgún puntu esti domingu. El so compañeru Lance Stroll, tampoco nun pudo facer muncho. Fuera de puntos acompañáronlos Daniel Ricciardo, que quedó undécimu y sigui ensin dar cola tecla que lu ponga al nivel al que nos tien avezaos; los dos Alfa Romeo: anque Giovinazzi tuvo una bona sesión de clasificación el sábadu, la realidá y la mala suerte del domingu pesó más perdiendo posiciones na curva 3 na primer vuelta y con un pinchazu xusto tres cambiar los neumáticos. Nel otru Alfa Romeo tuvimos tol fin de selmana a Robert Kubiça que tuvo de ponese a los mandos del Alfa porque Kimi Räikkönen dio positivu por coronavirus. Los dos Williams quedaron lloñe de los suaños que fueron Bélxica ya Hungría y zarró la clasificación el Haas de Mick Schumacher, que foi l’únicu que vio la bandera a cuadros depués del abandonu del so compañeru.

Como comentemos, nun foi un gran premiu que vaiga pasar a la historia polo entreteníu que foi, anque sí tenemos de rescamplar l’atmósfera creada nel circuitu. Depués de tantu tiempu de restricciones y poca xente nes grades, lo que vimos en Zandvoort trai de vuelta los tiempos enantes de la pandemia, que tan llonxanos abulten agora. Cuidamos que nunos díes en Monza, viviremos daqué asomeyao.

Y ye que la F1 nun descansa y suma otra carrera siguida, de circuitu míticu en circuitu míticu. La prósima cita ye, como dicimos, Monza, templu de Ferrari y de los tifosi. L’añu pasáu foi una carrera bien entretenida. Esperamos qu’esti añu tamién lo seya. Hasta que llegue la previa, vos dexamos equí col artículu de la silly season, que yá, a la fin, arrancó dafechu.

Yá tiníemos ganes de tornar a Zandvoort. Depués de l’intentu fallíu de 2020 que, por mor de la pandemia, nun nos permitió visitar el circuitu neerlandés, aterrizamos equí con más ganes que nunca de ver una carrera. Y ye que tres les escenes que vimos en Spa y la deceición de la decisión final de nun correr más que dos vueltes, llegar a un circuitu nuevu, en teoría favoratible a Max Vertappen por tar acompañáu del so públicu, nun dexa de ser una bona noticia.

Falando de noticies, esta selmana dio pa bien poco. Más allá de los comentarios y decisiones a posteriori sobre cómo abordar una situación asomeyada a la de Spa si se volviera a repitir. Ta claro que’l gran premiu nun xeneró munchos comentarios pola carrera en sí, si non poles decisiones que se tomaron, y con tan pocu espaciu ente carreres, les novedaes son poques. La silly season, que tamos actualizando equí, sigue tando bastante tranquilina. Sicasí, el miércoles enterémonos de que Kimi Räikkönen nun va siguir na F1 pa 2022, dexando asina un sitiu llibre nel equipu Alfa Romeo que, de xuru, en breve sabremos pa quién va ser.

Si dalgo tenemos claro ye que hai munchos pilotos que quieren ponese en pista pa tentar de compensar lo malo que-yos dexó Spa. Nun paez que naide quedara contento col resultáu, anque sumar puntos ensin arriesgar nuna carrera en moyáu casi paez un regalu, y ye evidente que Zandvoort va servir a muncho pa desquitase de lo que pasó hai unos díes en Bélxica, mesmo pilotos qu’equipos.

Atopámonos énte un circuitu curtiu y mui rápidu, dalgo que contrasta col llargor de Spa. Un circuitu que los pilotos aprecien pol retu que supón y nel qu’un de los principales enemigos de Lewis Hamilton na so batalla con Verstappen pola victoria va ser, como yá diximos enantes, el públicu. Correr en casa nun ye garantía de primer puestu pero ye un estra de motivación que nengún pilotu s’atreve a refugar.

Preparamos pues la información que precisáis pa nun perder nada esti fin de selmana y ponemos la vista y la cabeza yá en Zandvoort. Estos son los horarios d’esti fin de selmana:

Y estes son les gomes que trai Pirelli pa esti gran premiu:

Si echamos la vista atrás, nun paez que pasara yá la mitá del campeonatu de 2021. Vivimos munches carreres mui intenses y una llucha por dambos campeonatos qu’había tiempu nun víemos. Tres el parón braniegu bien merecíu pa toos, la F1 torna a poner los coches en pista, esta vegada nun de los sos iconos, el circuitu de Spa-Francorchamps.

Cásique tol mundu coincidi en que la segunda parte de la temporada, de xuru, va ser tan bona o meyor que la primera, sobre manera pensando que s’avera’l so final y que cualquier fallu o cualquier abandonu puede ser definitivu. Aterrizamos en Bélxica con tiempu inestable, al puru estilu Spa, y colos campeonatos apertaos per au quiera que miremos. Lóxicamente, tola atención ta puesta enriba los dos principales competidores pola victoria a final d’añu, pero la verdá ye que la temporada ta siendo intensa en tolos sentidos y pa cásique tolos equipos. Como yá vos despliquemos nes nuestres reflexones de branu (que podéis lleer equí y equí) hai dellos equipos que precisen un pasu alantre si quieren algamar los sos oxetivos, como ye’l casu de Ferrari. La pelea con McLaren ta siendo mui apertada, muncho más que l’añu pasáu, pero l’equipu italianu nun puede cayer na confianza de dir meyor, pues el so mayor rival nestos momentos tampoco nun va facelo. Per detrás, tolos equipos quieren situase nesi deseyáu tercer puestu.

Pero non sólo ta interesante la parte media-alta de la tabla. Cola suma de puntos de Williams, dalgo colo que naide nun cuntaba, a lo menos non tanta cantidá, preséntase una situación mui interesante pa lo que queda de temporada. Quiciás l’equipu de Grove tenga oportunidá de sumar dalgo más pero lo que ta claro ye que la ventaya garrada colo fecho n’Hungría da un colchón abundante con Alfa Romeo y Haas, que casi paecen condergaos a quedar onde tán.

A estes altures del añu, de normal, tendríemos yá material abondo pa escribir nel artículu que solemos dedicar a la silly season y que vamos actualizando coles nueves que nos lleguen. Esti añu, esti artículu entavía tien bien poca información qu’ufrir porque la situación de lo que va pasar en 2022 ta anormalmente tranquila. Sí que tenemos delles noticies, que podéis dir lleendo equí, como la confirmación de que Fernando Alonso va siguir n’Alpine pa 2022, dalgo qu’en realidá yá sabíemos yá que la idea del asturianu yera competir cuando entraran les nueves regulaciones n’aición.

Nun hai noticies del futuru de Bottas y Russell, qu’entrugaos esti xueves dixeron que nun tiníen nada nuevo que dicir sobre los sos futuros. Lóxicamente tola atención ta puesto enriba d’ellos dos porque son el cambiu de cromos más probable pa 2022. Sicasí, nun ta claru’l retornu de Bottas a Williams y tamién se fala de que pueda acabar n’Alfa Romeo ocupando’l sitiu que, en teoría, va dexar Kimi Räikkönen n’acabando 2021. Son too especulaciones, pero nenguna ta confirmada, polo que de momentu l’artículu sobre la silly season va tener qu’aguantar. El finlandés va tener oportunidá de probase otra vegada más en Bélxica, au amás tien una penalización de cinco posiciones na salida por cuenta l’accidente que provocó n’Hungría. El mesmu númberu de posiciones de penalización tienlu Lance Stroll, tamién polo acontecío n’Hungría.

Spa va ser amás escenariu esti fin de selmana d’alcordanza d’Anthoine Hubert cuando se cumple’l segundu aniversariu del so fallecimientu nun accidente na F2 nesti mesmu circuitu en 2019. Tolos pilotos y equipos aprovecharon p’alcordase del pilotu francés quien yera una de les promeses del deporte.

La F1 retorna a la rutina y failo con un clásicu, con promeses de tiempu cambiante y una llucha pol campeonatu que va entrar nuna etapa perinteresante de la que vamos ser testigos. Pa que nun perdáis nada d’esti fin de selmana, equí vos dexamos tolo que precisáis saber:

Y como davezu, la información sobre les gomes que se van usar pa esti gran premiu: