Gran Premiu d’Italia 2023

Hai dalgo que la xente que sigue la F1 tien claro: Monza ye capaz de sacar la meyor cara de Ferrari, tanto da si’l restu de la temporada ta siendo bastante discreta. La épica siempre asoma nel trazáu italianu.

Y ye qu’anque abulta complicao ver más allá de les victories de Max Verstappen, la realidá ye que nun había’l fin de selmana nengún fan de Ferrari que nun suañara, anque fuera, con un doble podiu o anque fuera con un podiu. Depués d’años tentando de facese col campeonatu ensin consiguilo, l’aterrizaxe en casa ye davezu motivación suficiente pa que l’equipu coloráu saque la so meyor cara. Y asina lo vimos demientres tol fin de selmana.

SÁBADU

Si hai un puntu de los grandes premios nos que Verstappen nun abulta tan dominador ye la clasificación. Nun queremos dicir que nun tea dominando tamién ehí, pero sí ye verdá qu’otros pilotos pudieron xubise a lo cimero de la parriella en cuenta l’holandés. El sábadu tocó-y a Carlos Sáinz pa gayola de los tifosi, que naguaben por ver un resultáu talu. Pa sumar, Charles Leclerc foi terceru, polo que’l sábadu foi un día reondu pa la Scuderia. Lo complicao diba ser replicar eses posiciones el domingu.

CLASIFICACIÓN

DOMINGU

GRAN PREMIU

Los domingos siguen siendo territoriu Verstappen, y Monza nun foi diferente pesie a los deseyos de les miles de persones qu’asistieron al eventu en Monza. L’holandés ta siendo quien a xestionar les carreres como quier, con una bona xestión de gomes y con paraes ya estratexes que nun dexen ver nenguna debilidá. Tamos averándonos a esa época del añu na qu’empezamos a pensar en qué carrera va proclamase campeón y si continúa faciendo carreres como la del domingu nun va ser complicao velo pronto.

Hai que rescamplar l’actuación de Ferrari, sobre too nel llau de Sáinz, que foi quien a caltener la posición de podiu depués de tener que ceder a los Red Bull, mui superiores, les dos primeres. El madrilanu amosó la so meyor versión, un pasu per delantre del so compañeru d’equipu.

L’equipu Williams tien motivos de cellebración viendo’l bon rendimientu, esperáu de toles formes, en Monza. Nun dexa de dar pasos alantre y ver a Albon ente los diez primeros el sábadu ya’l domingu yá nun ye raro. De fechu, empieza a ser normal ver a Sargeant na Q2, anque l’estauxunidense ta entavía lloñe de tar al altor del so compañeru d’equipu.

Foi un gran premiu descafeináu p’Aston Martin, que sólo puntuó con Alonso que foi novenu. Tampoco nun foi un gran premiu brillante pa McLaren pero entraba dientro de lo esperable conociendo les calterístiques de Monza, con llargues rectes nes que’l coche papaya sufre. Norris acabó octavu y Piastri, pesie a clasificar meyor que’l so compañeru, quedó fuera de puntos por un incidente con Lewis Hamilton que lu obligó a fuerciar una parada.

Mercedes sacaron el másimu d’un gran premiu nel que tampoco los vimos brillar como otres vegaes. Nun pudieron colos Ferrari que quedaron xusto per delantre d’ellos y caltuvieron un meyor ritmu, pero amás hai que sumar que dambos pilotos de Mercedes recibieron penalización de cinco segundos por incidentes con otros pilotos. Al final, Russell foi quintu y Hamilton sextu.

Alfa Romeo tornó a los puntos col décimu puestu de Bottas. Liam Lawson acabó nun meritoriu puestu once mientres el so compañeru nun pudo nin tomar la salida. Haas tuvo mui lloñe de los puestos de puntos con dambos puntos y Alpine tamién, con Ocon nun viendo la bandera a cuadros.

Rematamos asina l’aventura europea y dirixímonos agora a Asia, col gran premiu de Singapur dientro d’un par de selmanes. Demientres llega’l día, equí vos dexamos tolos númberos d’esti domingun nel circuitu de Monza.