Queden menos de dos selmanes p’aterrizar en Singapur, pero entá queden delles coses que revisar en Monza. Vamos echar una güeyada a lo que ficieron los equipos nel gran premiu d’Italia del domingu pasáu.
– Mercedes: Díbemos convencíos de que diben a ser los dominadores de tol fin de selmana ya cuntábemos con que fuere Hamilton quien consiguiese la victoria’l domingu polo visto nes primeres sesiones. Ensin embargu, víemoslu otra vez fallar na salida (paez que nun tien fácil arreglu el problema o problemes col embrague del Mercedes) y a Rosberg aprovechase d’ello. Dempués d’eso, la carrera del alemán foi bien tranquila, demientres que pa Hamilton foi un poco más entretenida, quedando sextu na salida pa recuperar darréu y terminar segundu. Namás dos puntos separen agora a los dos pilotos.
– Ferrari: De vuelta a la realidá del restu d’equipos, Ferrari consiguió dar una alegría a los tifosi con Vettel nel tercer puestu y Kimi detrás d’elli. Nun ye a lo qu’aspiren, pero un podiu en Monza vistíu de rosso siempre paga la pena. Arrivabene comentaba qu’entá nun daben nada por perdío, y paeznos que tien de ser la persona más optimista dientro l’equipu porque nun nos paez que vaigamos a ver coses mui distintes d’equí a final de temporada. De momento, siguen per detrás de Red Bull nel campeonatu de constructores.
– Red Bull: Como ellos mesmo dixeron, minimizaron daños. Nun foi la so meyor carrera, pero teniendo en cuenta que nun corríen n’un circuitu que-yos beneficiare y onde la potencia de la PU yera importante, quedar dientro los puntos yera’l mal menor. Ricciardo foi unu de los protagonistes del gran premiu pol so adelantamientu a Bottas, una de les poques coses vistoses que nos dexó la carrera. Riccardo acabó quintu con Verstappen séptimu.
– Williams: Dempués de tar nel puntu mira pol movimientu de pilotos, Williams consiguía meter dambos coches nos puntos, anque Bottas almitía que taben deceicionaos porque cuntaban con poder alcanzar el podiu. Nun foi asina: elli quedaría sextu ya’l so compañeru Felipe Massa novenu.
– Force India: Siguen batallando con Williams pol campeonatu de constructores y anque vuelven a tar per detrás, nun dexaron de sumar puntos con dambos pilotos. Suponemos que cada vez-yos cueste más facer frente a les posibles meyores que traigan el restu equipos pero nun duldamos que van siguir bregando na so llucha particular con Williams. Pérez terminó octavu y Hülkenberg, décimu.
– Haas: Anque ensin puntos, esta foi una bona carrera pa Haas. Ensin escaecer que por primer vegada consiguieron entrar en Q3 el sábadu con Esteban Gutiérrez, el domingu fueron quien a presentar batalla en pista y quedar a piques de metese ente los diez primeros. Grosjean foi undécimu y Gutiérrez acabó nel puestu trece.
– McLaren: Otros que tuvieron nel puntu mira tol fin de selmana: empezaben la carrera col convencimientu de que nun diben poder sacar muncho de Monza por ser unu de los peores circuitos pa ellos. Puntos nun sacaron, pero Alonso consiguió facer, a última hora dempués de montar gomes nueves a falta dos vueltes, la vuelta rápida de carrera polo que se fexo col troféu col que se premia al pilotu que la consigue en cada gran premiu. Nun fueron too maraviyes, ya l’asturianu víase torgáu nel pit stop, dalgo que nos regaló dalgún qu’otru mesaxe de radio al equipu, y pasáu en pista pol so compañeru. Button terminó décimosegundu y Alonso décimocuartu.
– Toro Rosso: Cuando sintimos falar a Sáinz notamos daqué frustración nes sos pallabres y les ganes de tornar a puntuar de siguío. Monza foi pa ellos unu de los peores grandes premios, y d’eso ye muestra que Sáinz sólo pudiera ser décimoquintu ya’l so compañeru nin siquiera pudiere terminar la carrera.
– Sauber: De xuru qu’a la escudería ya se-yos ta faciendo llarga la temporada. Nasr quedaría fuera de carrera a los pocos minutos d’empezar la carrera por un choque con Palmer y Ericsson nun pudo más que ser décimosextu. Ensin duldes, nun foi un día de sorrises en Sauber. Y yá sumen unos cuantos…
– Renault: Recuperáu del so accidente de va una selmana en Spa, Magnussen pudo acabar la so carrera sólo per delantre los Manor, que nun ye dicir muncho, pero que teniendo en cuenta lo que ta dando de sí la temporada pa la escudería francesa, ye bastante. Palmer quedaba fuera nel choque con Nasr y suma otru gran premiu nel que nun ye quién a amosar de lo que ye capaz en pista. Ta quedándose ensin oportunidaes ya suenen munchos pilotos pa ocupar el so asientu. Esperamos que pueda facer dalgo por compensalo d’equí a payares.
– Manor: Nun foi de los meyores domingos pa Manor, anque’l sábado dexábanos a Wehrlein otra vez en Q2. L’alemán quedaría fuera de carrera por un problema col coche ya Ocon consiguió acabar, anque nun taba demasiao contentu con como fuera’l fin de selmana. Tóca-yos, otru gran premiu más, siguir trabayando.