Gran Premiu d’Hungría 2023

Pasó’l gran premiu d’Hungría y dexó delles coses interesantes como una pole inédita esta temporada y un equipu que confirma que los pasos alantre que diera nun yeren un espeyismu.

Nun ye novedá que los sábados tean dando más de sí que los domingos de gran premiu y que tengamos sesiones de clasificación más intenses de lo que nun llega a ser la carrera, y n’Hungría volvimos a replicalo.

SÁBADO

Como yá vos comentemos na previa d’esti gran premiu, la FIA decidió camudar el procesu de clasificación coles gomes como protagonistes. Yá vos desplicamos que, col enfotu d’aforrar gomes, decidióse que tolos equipos por obligación tiníen de montar gomes dures na Q1, medies na Q2 y blandes na Q3. Hai dellos pilotos que, depués de la clasificación nun paecieron tar mui contentos cola midida, pero la verdá ye que, a lo menos, vimos coses inesperaes. Per un llau, la obligación de la mayoría de pilotos de facer dos vueltes bones p’asegurar una plaza na siguiente sesión. Per otru, la “ventaya” d’aquellos pilotos ya equipos que probaran les gomes dures nes sesiones d’entrenamientos llibres y pudieron aprovechar esi conocimientu pa esguilar na clasificación. Ye’l casu de los dos Alfa Romeo. que non sólo pasaron de Q1 si non qu’entraron na Q3 y Zhou salió quintu na carrera del domingu. Tamién meritoria la posición de Ricciardo, nel décimotercer llugar depués de xubise esti gran premiu per primer vegada a un coche de F1 depués de mediu añu na solombra.

Nel llau negativu, tuvo George Russell, que por problema de tráficu nun pudo facer una vuelta bona y quedó fuera en Q1 teniendo que salir décimoctavu’l domingu nun circuitu nel qu’adelantar nun ye lo más cenciello. Tampoco nun brilló en clasificación Carlos Sáinz, que nun pasó de Q2. Pelo cimero, un Lewis Hamilton inspiráu marcó la so octava pole nesti circuitu con tres milésimas de diferencia con Max Verstappen, que nun terminaba de tar mui agusto coles gomes y que vio como se rompía la so racha de poles nesta temporada. Acompañándolos nel podiu de clasificación, Lando Norris, que confirmó una vegada más ya nun circuitu estremáu del de Silverstone, que McLaren yá son un equipu a tener en cuenta pa los podios (Oscar Piastri clasificó cuartu) y, quiciás, p’aprovechase de la debilidá de Red Bull en dalgún momentu y ganar una carrera.

DOMINGU

Los momentos más interesantes del gran premiu d’Hungría centráronse nes paraes, nes estratexes y na salida. Nun tamos avezaes a ver salir mal a Lewis Hamilton, y de xuru l’inglés esperaba que, depués de consiguir la pole, pudiera aguantala anque fuera una vuelta, pero nun foi posible ya’l pilotu de Mercedes perdió bien pronto la posición con Verstappen, que se punxo llíder y tamién con Oscar Piastri, qu’aprovechó la batalla de Hamilton con Verstappen y de Norris con dambos pa colocase segundu. L’australianu aguantaría nesa posición hasta la primer parada, na que’l so compañeru, que rápido adelantó a Hamilton, paró primero faciendo un undercut que funcionó y lu colocó delantre de Piastri ya en segundu llugar de la clasificación, puestu que yá nun diba abandonar hasta ver la bandera a cuadros, pesie a que Sergio Pérez foi escalando posiciones, dende’l novenu llugar de clasificación, pa colocase terceru.

La carrera de los dos Mercedes foi bastante estremada, pero de bon rendimientu sacante’l momentu de Lewis Hamilton na salida. Russell fizo un gran trabayu cola xestión de gomes y terminó la carrera nun meritoriu sextu puestu (aprovechando una penalización a Leclerc) pensando qu’entamaba dende’l puestu dieciocho. Hamilton acabó cuartu, aprovechando que Piastri tuvo problemes depués d’una batalla con Pérez y empezó a baxar el ritmu. L’australianu acabó quintu.

Per detrás, Ferrari tuvo la so propia batalla interna, con Leclerc faciendo un undercut a Sáinz que tuvo una meyor salida que’l so compañeru d’equipu. El monegascu, aparte de tener una mala parada, tuvo una penalización de cinco segundos por superar la velocidá permitida nel pitlane. Otru domingu modestu pa la Scuderia, en sétimu (Leclerc) ya octavu llugar.

Zarraron la clasificación de los diez primeros los dos Aston Martin, con Alonso per delantre en novenu llugar. Nesti gran premiu en teoría l’equipu verde debiera tener rendío muncho meyor de lo que se vio, yá que ye un trazáu que beneficia, como comentemos na previa, les sos calterístiques. Sicasí, nun foi eso lo que vimos el domingu y yá van delles carreres nes que nun podemos cuntar con Alonso nel podiu. Paez como si McLaren pasara a ser l’equipu revelación un pocu d’esta temporada, llugar qu’enantes ocupaba Aston Martin.

Domingu deceicionante p’Alfa Romeo depués del bon rendimientu del sábadu. Zhou provocó un accidente que dexó fuera de carrera a dambos Alpine y torgó la carrera de Ricciardo que, entá y asina, acabó per delantre de Tsunoda. Tamién deceición en Haas, que nun acaben de treslladar el rendimientu del sábadu al domingu, y tamién mui deceicionante p’Alpine que, como tamos acabantes de dicir, quedaron fuera de carrera.

D’Hungría pasamos ensin descansu a Bélxica enantes del parón braniegu. Mientres llega’l día, equí vos dexamos tolos númberos que dexó’l gran premiu d’Hungría 2023.