Gran Premiu d’Estaos Xuníos 2023

A vegaes cuéstanos ver l’interés nos campeonatos de F1 dende’l momentu que sabemos quién ye campeón, pero hai carreres como les d’Austin d’esti fin de selmana que son exemplu de qu’entavía queden coses que ver esta temporada.

Y ye que, quiciás dalgo tarde, abulta que los equipos van cada vegada averándose más al rendimientu de Red Bull. Nun sabemos en qué porcentaxe hai relaxu na competición del equipu ganador d’esta temporada, pero yá fuimos viendo los pasos alantre de dellos equipos como McLaren o Mercedes, que son los que tán un pocu agora sumándose a los intentos de sumar una victoria nesti 2023.

VIENRES

CLASIFICACIÓN

Na sesión de clasificación del vienres quiciás lo más llamatible foi’l baxu rendimientu d’Aston Martin en xeneral y Fernando Alonso en particular, que nun pasó de la Q1. Dambos pilotos tuvieron problemes nos entrenamientos llibres y cásique nun pudieron rodar nel circuitu americanu, pero nada nun facía pensar que diba ser tan grave na clasificación.

Otra sorpresa foi la posición de pole, que nun ocupó Max Verstappen si non Charles Leclerc quien una vegada más amosó’l bon rendimientu de Ferrari nes sesiones de clasificación. Verstappen tuvo de conformase con ser sextu depués de que la so vuelta de pole fuera borrada por llímites de pista.

SÁBADU

CLASIFICACIÓN PA LA CARRERA AL SPRINT

La sorpresa que llevemos el vienres con Aston Martin nun foi tan grande’l sábadu, anque Alonso tampoco nun pudo entrar na Q3 dalgo que nun pasara esti añu en nengún de los dos casos, nin na clasificación nin na del sprint. Max Verstappen tornó al primer puestu de la parriella ensin que Leclerc fuera quien esta vegada a superalu pero quedando xusto per detrás y acompañáu de Lewis Hamilton. L’inglés tuvo un mui bon ritmu tol fin de selmana, dalgo que nun vimos en Russell, quien nun lo fizo mal en xeneral pero nunca nun tuvo posibilidaes reales de podiu.

Los McLaren rindieron dalgo peor el sábadu que’l vienres en clasificación y Checo Pérez tampoco nun tuvo al altor del rendimientu del so compañeru d’equipu, como yá ye vezu esta temporada.

CARRERA AL SPRINT

Na salida Charles Leclerc concentrose en rebasar a Verstappen, tanto que Lewis Hamilton aprovechó la circunstancia y acabó superando al pilotu de Ferrari. Dende esi momentu, Verstappen entamaría la so cabalgada hasta la victoria, siguíu de Hamilton qu’al principiu pudo siguir el ritmu pero que poquín a pocu foi perdiendo fuercia y teniendo que conformase con ser segundu. Leclerc tuvo un pocu en tierra de naide cásique tola carrera sacante les últimes vueltes nes que foi perdiendo ritmu y vio la bandera a cuadros con Lando Norris a menos d’un segundu d’él. El so compañeru d’equipu Carlos Sáinz foi l’únicu qu’apostó por una estratexa distinta, montando gomes blandes poles medies del restu de la parriella. Anque al principiu foi superando pilotos, la realidá del desgaste de gomes lu acabó dexando per detrás de Norris y Pérez, anque salvando la posición con Gasly y Russell que viníen detrás. Russell recibió una penalización de cinco segundos por adelantar a Piastri por fuera de la pista. L’australianu nun pudo puntuar y tuvo de conformase con ser undécimu.

DOMINGU

GRAN PREMIU

El domingu Lewis Hamilton deprendió la lleición de la carrera al sprint y foi más intelixente na so persecución d’un Max Verstappen que partía sextu pero que nun tardó en facese cola primer posición. Sicasí, foi un primer puestu mui trabayáu non sólo pol bon ritmu del Mercedes de Hamilton, si non tamién polos problemes de frenos del pilotu holandés. La distancia ente dambos en viendo la bandera a cuadros dexa claro que la carrera del domingu nun foi un paséu del pilotu de Red Bull.

El gran premiu entamó con Lando Norris lliderando’l primer tramu de vueltes. Aprovechó una mala salida de Leclerc pa ponese per delantre y dexar al monegascu peliando con Hamilton por posición. Verstappen nun tardaría en colocase quintu y dellos pilotos perdieron posiciones como Piastri, que tuvo un toque con Ocon. El francés sedría’l primer abandonu de la carrera por daños nel pontón y diba acompañalu precisamente Piastri delles vueltes más tarde. Alpine tuvo un bon rendimientu’l vienres, con dambos pilotos ente los diez primeros, pero sólo Gasly sumaría’l domingu, quedando sextu.

Foi una carrera que pidía estratexa a dos paraes pero que dellos equipos tentaron de facer a una ensin éxitu. Mercedes foi ún d’esos equipos, avezaos como tamos a velos nun desgastar les gomes tanto como los sos rivales, pero nin siquier ellos pudieron facer funcionar esa estratexa. Ferrari tamién quiso tentalo con Leclerc, dalgo que nos sorprendió bastante teniendo en cuenta l’altu grau de degradación de los dos coches no que cinca a gomes, pero a la fin tuvo de facer la segunda parada.

A Ocon y Piastri xuniríase Alonso casi na recta final de la carrera, cuando rodaba con bon ritmu y en posición de puntos, por un fallu na suspensión trasera. Definitivamente un fin de selmana pa escaecer nel llau del asturianu. El so compañeru d’equipu sí que pudo sumar puntos depués de quedar sétimu.

La llucha pola victoria tornose bien interesante cuando Verstappen entamó a reportar problemes de frenos y vimos que Hamilton tinían un bon ritmu de carrera que lu averaba cada vegada más al holandés. Pela so parte, Norris tentaba de caltener la última posición del podiu per delantre d’un Carlos Sáinz que, una vegada adelantáu Leclerc, tentó d’averase al inglés. A la fin nun pudo igualar la so velocidá y tuvo de conformase con ser cuartu.

Sicasí, nin Hamilton nin Leclerc diben conservar les sos posiciones de carrera. Hamilton acabaría segundu a poca distancia de Verstappen y Leclerc, sextu. Dambos pilotos fueron descalificaos n’acabando la carrera por infrinxir la norma que regula l’estáu del fondu planu nos coches n’acabando la carrera. Asina, les tres primeres posiciones fueron Verstappen, Norris y Sáinz. La vuelta rápida foi pa Tsunoda qu’aprovechó que disponía d’un xuegu de gomes nueves pa sumar un puntu al que yá sumaba por acabar décimu (y que llueu sedríen cuatro más por acabar octavu coles descalificaciones). Per otru llau, Alex Albon recibió una penalización de cinco segundos por superar los llímites de pista. El tailandés, sicasí, sumó dos puntos beneficiándose tamién de la descalificación de Hamilton y Leclerc mesmo que Sargeant, que sumó’l so primer puntu de la temporada.

Ensin casi tiempu pa garrar aire volamos a México pal viniente gran premiu de la temporada. Demientres llega’l momentu, equí vos dexamos tolos númberos que dexó’l gran premiu d’Estaos Xuníos na so edición de 2023.