Gran Premiu d’España 2023

La F1 tornó al revisáu circuitu de Montmeló nel que vivimos un nuevu eventu formuleru nel que, como davezu yá esta temporada, un Red Bull s’impuso ensin mayor problema al restu de pilotos.

Nun queremos sonar gafos pero’l dominiu de Red Bull nes manes de Max Verstappen, a estos altores de la temporada y con tantes carreres per delantre, fai albidrar una victoria aplastante pa él y la so escudería en dambos campeonatos. Hai quien piensa que’l pilotu holandés sedría quien a ganar él solu’l campeonatu de constructores. Nun sabemos si ye desaxerar o qué pero lo que ta claro ye que, otra vuelta más, el pilotu de Red Bull dominó de principiu a fin yá non sólo la carrera del domingu si non tamién les sesiones de la clasificación del sábadu, ensin tregua nin ensin amosar signu dalgún de debilidá.

Les amenaces d’agua pal fin de selmana a la fin nun tuvieron más impautu que’l d’afeutar daqué a la primer sesión de clasificación, pero nun se ficieron realidá’l domingu polo que vivimos una carrera relativamente tranquila pa unos y deceicionante pa munchos otros.

SÁBADU

Nun nos abulta desaxerao dicir que’l sábadu tornó quiciás a ser el día más interesante del fin de selmana. Nun hai más qu’echar un güeyu a los tres primeros clasificaos pa entamar a pensar qué ye lo que pudo pasar pa qu’un McLaren, el de Lando Norris, fuera quien a colocase ehí pa la parriella del domingu.

Como diximos, l’agua sí qu’apaeció’l sábadu, afeutando a la tercer sesión d’entrenamientos llibres y dexando la pista daqué moyada pa la clasificación. Esto, que de primeres nun abultaba gran cosa, acabó faciendo que tuviéramos una sesión de clasificación bien interesante. Empezando por delles salides de pista, como la de Fernando Alonso o la d’Álex Albon, que diba provocar una bandera colorada na Q1. L’asturianu saliose cuando embocaba la recta de meta pa entamar la so vuelta llanzada y la grava afeutó al fondu planu del coche que yá nun rindió al cientu por cien el restu de la sesión. Vimos a los mecánicos trabayar nel coche, tirando de cinta adhesivo pa tener de minimizar el dañu nel coche y poder, a lo menos, clasificar ente los diez primeros, cosa que pudieron conseguir.

Tamién tuvo una salida de pista Sergio Pérez, cuando se preparaba pa facer la so vuelta llanzada na Q2 y tentaba de salir de la zona d’eliminación. El mexicanu nun tuvo finu y acabó quedando fuera de la Q3 al clasificar undécimu. Otru que tamién quedó fuera, pero en la Q1 foi Charles Leclerc. El monegascu nun tuvo cómodu col coche en nengún momentu, nun yera quien a facer funcionar les gomes y pa sorpresa de tol mundu, clasificó penúltimu. Nun ayudó tampocu que lu llamaran a pesase cuando quedaben menos de cinco minutos nel reló pa rematar la sesión. Y tampocu nun entró na Q3 George Russell, que tamién tuvo munchos problemes pa llegar al puntu óptimu de les gomes y nun pasó de clasificar nel puestu doce, xusto per detrás de Pérez.

Con estos tres pilotos fuera de la Q3, el so sitiu ocupáronlu Hülkenberg, y los dos McLaren. Alpine tamién metió a los dos pilotos ente los diez primeros, y Lance Stroll foi quien a facer una bona ronda de clasificación, quedando de fechu per delantre d’Alonso na Q3. La pole nun tuvo munchu secretu más allá de ver hasta cuánto podía baxar el crono Max Verstappen, pero sí foi llamatible ver a Lando Norris colocase mui cerca del holandés con un McLaren qu’en temperatures más fresques rendía casi a la perfeición. Sáinz tamién supo aprovechar la so oportunidá pa colocase segundu. Gasly clasificó cuartu pero recibió dos penalizaciones de tres posiciones por torgar les vueltes rápides de Sáinz y Verstappen, y acabó saliendo décimu. Hamilton taba faciendo unos tiempos mui bonos na Q3 pero acabó quedando quintu. Na Q2 él ya’l so compañeru d’equipu fueron protagonistes d’un incidente que casi acaba con dambos fuera de carrera. Russell nun vio a Hamilton que se metía pela so izquierda na recta de salida por tar mirando a Sáinz, al que tinía delantre, y al movese hacia Hamilton casi choquen. Sicasí, quedó nun sustu.

DOMINGU

Ensin agua ya ensin munchu problema ganó Max Verstappen esti domingu en Montmeló. El neerlandés non sólo sumó otra victoria más si non que s’apuntó un Grand Chelem (pole, victoria, vuelta rápida y llideró toles vueltes de carrera). Nun hai falta añadir muncho más al gran premiu del pilotu de Red Bull qu’en nengún momentu vio peligru na so carrera y pudo facer y desfacer como quiso. Anque Sáinz tuvo a piques na salida de ponese a la so altura y pasalu, el neerlandés acabó imponiéndose y dende esi momentu tolo que fizo foi lliderar la carrera.

Per detrás, Sergio Pérez tentaba d’esguilar na clasificación pa compensar otru sábadu desastrosu, mesmo que Leclerc, que partió dende’l pitlane depués de facer dellos cambios de componentes nel so coche. Russell facía lo propio con un Mercedes que’l domingu enseñó los dientes y amosó que sí, que les meyores que trayeron dieron bon resultáu. Non sólo nel casu de Russell, si non tamién nel de Hamilton. Dambos pilotos acompañaron a Verstappen nel podiu, sumando una bona cantidá de puntos que permite a Mercedes colocase segundu nel campeonatu de constructores. Aston Martin nun pudo repetir les bones actuaciones del pasáu al volante d’Alonso, que nun recuperó dende’l sábadu y acabó sétimu per detrás del so compañeru d’equipu, Lance Stroll. Nun foi un gran premiu brillante pal equipu verde que nunca nun tuvo oportunidá d’arimase a los puestos de podiu. Pa Ferrari tamién foi un gran premiu bastante deceicionante, con Sáinz acabando quintu y Leclerc a les puertes de puntuar. La Scuderia nun termina de dar cola tecla esti añu, y concretamente el casu de Leclerc entama a ser preocupante. Pérez, a lo menos, foi quien a quedar cuartu, puestu deceicionante no personal pero qu’a lo menos-y permite siguir nel segundu puestu del mundial de constructores pesie anque agora con una distancia más grande col so compañeru.

Foi un bon fin de selmana p’Alpine que volvió a puntuar con dambos pilotos, anque lloñe del podiu. L’equipu francés dio un pasu alantre significativu nestes últimes selmanes y va garrando con fuercia esi quintu puestu nel mundial de pilotos, metiendo distancia con McLaren per detrás. McLaren nun pudo sacar nada de la bona clasificación de Norris porque un choque del inglés con Hamilton pocu depués de la salida lu dexó ensin alerón ya ensin oportunidá d’entrar siquier en puntos. Piastri nun lo fizo muncho meyor y quedó tamién fuera, nel puestu trece.

N’Alfa Romeo sí tienen motivos pa tar contentos depués de que Zhou fuera quien a puntuar per primer vegada esta temporada. El pilotu chinu foi novenu y sumó dos puntos bien importantes pal equipu qu’empata con Haas na clasificación de constructores. La escudería estauxunidense tampocu nun pudo facer bona la clasificación de Hülkenberg y dambos pilotos quedaron bien lloñe de los puntos.

Nyck de Vries tuvo un bon sábadu y quedó per delantre del so compañeru d’equipu, dalgo importante pal pilotu que busca la manera de dar esi pasu alantre que tol mundu-y pide. En carrera, sicasí, nun foi quien a pasar de clasificar nel puestu catorce per detrás de Tsunoda que quedó nel puestu doce. De Williams tampocu nun podemos dicir muncho más allá de que los dos pilotos vieron la bandera a cuadros pero en puestos bien baxos y lloñe d’atropar nengún puntu. La so esperanza sigui tando en qu’AlphaTauri nun sume nengún puntu y ellos tengan la so oportunidá de pasalos, habiendo namás qu’ún puntu de diferencia ente dambos equipos.

Esta carrera de xuru nun va pasar a la historia como una de les más interesantes pero sí tuvo delles coses a les que vamos tener que tar sollertes: per un llau, les meyores de Mercedes y la so progresión. Per otru, el rendimientu de Ferrari ya’l d’Aston Martin, sobre manera nel casu del segundu depués de ver un baxón considerable en Montmeló.

La prósima parada ye Canadá, en dos selmanes. Demientres aterrizamos en Montreal, podéis consultar tolos númberos que nos dexó la carrera de Barcelona equí.