Los vienres tenemos vezu d’asoleyar la previa del gran premiu que vaiga celebrase de domingu pero güei toca facer daqué estremao.
El miércoles 17 recibimos la noticia, esperada, de que’l gran premiu d’Emilia Romagna 2023 nun diba poder disputase por cuenta la cantidá d’agua que tuvo cayendo en díes pasaos y que ta causando abondos problemes na zona italiana au s’alluga’l circuitu y tamién n’otros llugares como, por exemplu, la ciudá de Faenza au tien la so fábrica la escudería AlphaTauri.
Yá col entamu de la selmana les prediciones y tamién la situación que se taba viviendo facía albidrar que díbemos tener esti resultáu, dalgo que la F1 decidió finalmente’l miércoles pesie a que creyemos que taba claro dende bien ceo na selmana. Abúltanos una decisión prudente y lóxica pues, pensando no qu’envuelve un gran premiu n’Italia y los recursos que precisa y que, agora mesmo, son más necesarios p’ayudar a la población y tentar d’iguar una situación tan dramática.
De momentu nun sabemos si’l gran premiu va movese pa otra fecha o si va cancelase dafechu. La F1 nun se pronunció entavía nesi sen y suponemos que nos vinientes díes o selmanes sabremos si ye vidable encaxar otru eventu pente un calendariu tan apertáu como’l d’esti 2023.
Yeren munchos los equipos que trayíen novedaes y meyores pa esti gran premiu, y van ver torgada la oportunidá de probales nesta ocasión. Siendo Mónaco’l prósimu gran premiu dientro d’una selmana, ye fácil que la prueba se tresllade a Barcelona en dos selmanes anque haiga delles coses que puedan probar en Mónaco ye verdá que’l míticu circuitu nun ye’l más afayadizu pa llevar meyores significatives nos coches. Mercedes, por exemplu, ye ún de los equipos que llevaba más actualizaciones a Ímola y va tener d’esperar dellos díes pa ver si’l trabayu pagó la pena.
Vos convocamos entós pa dientro de siete díes nel circuitu de Mónaco pal prósimu eventu de F1 nel míticu circuitu de Montecarlo.