Si en Singapur vimos al Red Bull más floxu de la temporada, en Xapón esti fin de selmana tornemos a ver, y confirmar, porque l’equipu Red Bull ye campeón del mundu 2023.
Y ye que yá dende’l vienres dexaron claro que lo que se vio nes cais de Singapur fuera una anomalía que nun encaxa colo que teníemos visto nes carreres previes y pa que naide nun tuviera duldes, l’equipu de la bébora enerxético encargose de bordar hasta les sesiones de práutica pa que naide nun s’engañara: la temporada 2023 ye de Red Bull y lo que pasó hai una selmana namás foi una confirmación de que, detrás de les máquines tamién hai seres humanos que nun pueden ser perfeutos en too.
Sicasí, Xapón foi otru suma y sigui del equipu y de Verstappen, cola compañía, a della distancia, de McLaren, que sigui’l so camín pasín ente pasu de tornase nel segundu meyor equipu dende Austria col permisu de Mercedes y de la victoria de Ferrari. Fueron los dos pilotos de McLaren los qu’acompañaron a Max Verstappen tanto nes primeres posiciones de la parriella del domingu, siendo Piastri segundu y Norris terceru, como’l domingu nel podiu, coles posiciones cambiaes y Norris per delantre de Piastri.
Per detrás, Ferrari y Mercedes tuvieron de conformase con asumir que nun yeren quien a ponese al altor de los coches papaya y que teníen de conformase coles posiciones más averaes al podiu. Hamilton quedó per delantre de Russell, que sufrió con una estratexa a una parada que lu dexó vendíu coles gomes casi gastaes al final de la carrera. Ferrari pel so llau aprovechó la debilidá de Russell pa xubir posiciones, anque Sáinz tuvo dalgo meyor que Leclerc.
Hai que rescamplar l’actuación, otra vuelta, de Liam Lawson col AlphaTauri, que sigui dando razones a los equipos pa tenelu nel puntu de mira pal futuru prósimu. Quiciás nun seya pa 2024, pero si l’australianu nun baxa’l ritmu, de xuru vamos velu pronto nun Fórmula 1.
Xapón dio una carrera mui estratéxica, cola teoría de que yera meyor dir a dos paraes pero dellos pilotos tentando de facer funcionar la estratexa a una parada y estremaos resultaos. La F1 da’l saltu agora al desiertu catarí pa otru gran premiu embaxo les lluces artificiales en dos selmanes.