Gran Premiu de Singapur 2023

Depués d’once carreres siguíes ganando y de namás ver un Red Bull no cimero del podiu lo que llevamos de temporada 2023 a la fin les lluces nuecherniegues de Singapur ufrieron un nuevu ganador, dalguién que ruempe cola racha de récor de Verstappen y Red Bull.

Y ye que munches persones yá albidraben qu’esti circuitu nun diba afitase bien a les calterístiques de Red Bull y la verdá que foi la primer vegada en munches carreres que vimos a Verstappen sufrir pa poder conducir y sacar les vueltes alantre. El vienres tuvo munchos problemes colos cambios y el sábadu, anque abultaba recuperáu, observemos con plasmu que non, que les coses nun diben bien pa los coches de la bébora enerxético.

SÁBADU

CLASIFICACIÓN

Non, nun tán mal los nomes de los tres primeros puestos na parriella de salida del gran premiu. Nin Sergio Pérez nin Max Verstappen fueron quien a pasar a la Q3 dalgo que había años que nun víemos en F1. Lo del vienres nun fuera un espeyismu y anque nos terceros entrenamientos llibres paecía que la cosa nun yera pa tanto, la confirmación vieno dalgo más tarde, cuando al términu de la segunda parte de la clasificación nun cuntábemos colos dos pilotos de Red Bull ente los diez primeros depués de clasificar nel puestu once Verstappen y nel trece Pérez. Aprovecharon la circunstancia los dos pilotos de Haas pa colase en posiciones de puntos, con Magnussen sextu y Hülkenberg novenu.

Pero quien meyor aprovechó la debilidá de Red Bull foi, ensin duldes, Ferrari. Carlos Sáinz tuvo mui fuerte tol fin de selmana y nun foi raro, sobre too depués de ver a Verstappen fuera, qu’ocupara la pole‘l sábadu, pesie a los bonos cronos de Norris, Leclerc y Russell, que finalmente nun pudieron con él. El madrilanu repitió asina primer puestu un sábadu dos selmanes depués de consiguilo en Monza, pero con unes perspeitives pal domingu bien estremaes.

La sesión de clasificación viose torgada al final de la Q1 por un fuerte accidente de Lance Stroll cuando taba a piques de zarrar la so vuelta y perdió’l control, chocó contra les proteiciones y dexó el coche estrozáu en medio del circuitu. El pilotu nun sufrió nengún percance, anque’l domingu nun podría competir, aparte de polo doloríu que podía tar, pol estáu nel que quedara el monoplaza. El so accidente cuando yá casi nun quedaba tiempu nel crono afeutó a dellos pilotos colos que se cuntaba más arriba como ye’l casu d’Oscar Piastri, que quedó fuera nel puestu dieciesiete.

Otru convidáu a la Q3 nesti gran premiu de Singapur foi Liam Lawson que continúa a los mandos del AlphaTauri cubriendo a Daniel Ricciardo y que nun dexa de collechar bones actuaciones. El so compañeru nun pudo pasar de Q2, na que nin siquiera marcó tiempu por un incidente. Foi, otra vuelta, una sesión mui apertada ya emocionante, dalgo que yá se ta tornando en vezu dende va unos cuantos grandes premios.

DOMINGU

GRAN PREMIU

Quiciás podríemos falar de dos parte de la carrera bien estremaes. Una primer parte na que, sacante la salida y dalgún incidente en pista, nun pasó muncho ya otra na que la llucha pola victoria se tornó bien interesante.

La estratexa a una parada marcaba la xestión de gomes de los más de los pilotos. Red Bull, fuera de posición, optaron por montar gomes dures, anque a la llarga diben ver que nun diba ser la meyor opción puesto que nunca nun tuvieron nin cerca de suañar cola victoria o siquier col podiu. Carlos Sáinz dominó la carrera dende la salida, teniendo per detrás a diferentes compañeros de baille que fueron camudando al tiempu que se desenvolvía la carrera. Leclerc nun tuvo al altor del so compañeru nesta ocasión, y atopar tráficu tres facer la so parada nun ayudó.

Hamilton fizo una salida fantástica pa compensar la mala salida del so compañeru d’equipu. Pronto, púnxose per detrás de Leclerc, depués de que Russell cayera per detrás de Norris. Vimos dellos adelantamientos, intentos per parte de Verstappen de facer como siempre fai y dir adelantando como un reló coche tres coche, pero esti domingu nun taba pa él.

Depués d’un coche de seguridá que munchos aprovecharon pa parar y que salió por cuenta’l coche de Sargeant, la carrera foi camudando la color y los equipos fueron viendo hasta qué puntu funcionaben les sos estratexes. Tendríemos otru coche de seguridá, esta vegada virtual, dalgo más tarde, por cuenta d’Ocon, nel que dellos pilotos decidieron quedase en pista mientres qu’otros aprovecharon pa parar.

Y asina tuvo Carlos Sáinz cuando pocu a pocu foi viendo como dende atrás Norris recortaba distancia y, más rápido tovía, lo facíen los Mercedes con gomes más nueves y más rápides que dambos depués d’una doble parada. Nesi momentu iniciose una persecución de los dos pilotos del equipu de Brackley. Norris cuntaban coles mesmes gomes que Sáinz pero en meyor estáu y recortaba distancia hasta ponese en DRS, dalgo que’l madrilanu decidió xestionar al so favor. Asina, tuvimos un tren de DRS del primeru al cuartu, nel que Sáinz permitía a Norris acercase a un segundu pa qu’asina l’inglés pudiera protexese de Russell y Hamilton y, de pasu, protexelu a él torgando l’adelantamientu. Fueron unes últimes vueltes d’aguantar la respiración y cuando quedaben pocos metros pal final George Russell que cásique tinía a Norris al alcance acabó estrelláu escontra les proteiciones dando asina por rematada la so carrera y el gran premiu. Hamilton heredó esi tercer puestu per detrás de los yá nomaos Sáinz y Norris. Leclerc tuvo de conformase con un cuartu puestu que de xuru-y supo a pocu.

Verstappen y Pérez puntuaron, siendo quintu l’holandés y octavu’l mexicanu. En sextu llugar atopamos a Pierre Gasly que foi l’únicu Alpine en ver la bandera a cuadros. Oscar Piastri quedó sétimu faciendo un bon gran premiu, adelantando diez posiciones con respeutu a la parriella de salida. Per detrás de Pérez en novenu llugar quedó Liam Lawson, qu’estrena puntos na F1. El so compañeru nun pudo nin dar una vuelta y foi’l primer abandonu del domingu depués d’un accidente con Sergio Pérez, que tamién tuvo un momentu con Alexander Albon. El mexicanu nun tuvo mui inspiráu en pista y recibió una sanción de cinco segundos por provocar una colisión. Zarró la clasificación de los diez primeros el Haas de Kevin Magnussen.

Deceición n’Aston Martin depués d’una carrera mui complicada p’Alonso que recibió una sanción de cinco segundos por entrar nel carril de paraes de manera inadecuada dalgo que supunxo una torga mayúscula pa la so carrera. Los Williams tuvieron más floxos equí, como yera d’esperar, y Alfa Romeo sólo vio la bandera a cuadros con Zhou depués de que Bottas abandonara.

Cuando creyíamos que Red Bull diba dominar la temporada 2023 de principiu a fin ganando toles carreres llegó Singapur. Y la F1 nun descansa, dexamos les lluces nuecherniegues pa empobinamos hacia Xapón pa dientro d’una selmana disputar el so gran premiu nel míticu circuitu de Suzuka. Demientres llega’l día, equí vos dexamos tolos númberos d’esti fin de selmana de triunfu de Ferrari nes cais de Singapur.