Gran Premiu de Países Baxos 2023

Esta temporada hai un elementu que ta decidíu a facer actu de presencia en bien de carreres y en Países Baxos tuvo un protagonismu especial demientres tol fin de selmana.

Y ye que l’agua acompañó los tres díes de competición nel circuitu de Zandvoort y condicionó sobremanera munches de les decisiones que se tomaron el domingu na carrera. Lo qu’abultaba un paseu trunfal de Max Verstappen acabó siendo una carrera con munches paraes, munchos erros ya incertidume y un Verstappen entá más llíder ya igualando a Sebastian Vettel nel so récor de nueve victories consecutives conseguíes nuna mesma temporada.

Hai vegaes que les prediciones pa los grandes premios anuncien lluvia que llueu nun asoma o si lo fai ye depués de qu’acabó tola competición. Nun foi’l casu d’esti fin de selmana en Zandvoort onde yá dende’l vienres tuvimos agua. Sicasí, cuando más se fizo notar foi precisamente’l domingu dando un toque d’emoción extra a una carrera que yá prometía dende’l sábadu.

SÁBADU

CLASIFICACIÓN

El sábadu dexó dalguna sorpresa, como que Lewis Hamilton nun fuera quien a entrar na Q2, que Lando Norris replicara un segundu puestu de partida na parriella y que Sergio Pérez namás pudiera ser sétimu tando’l so compañeru d’equipu, una vegada más, na pole. Foi amás un primer puestu con un marxe bien abultáu con respeutu al segundu, lo que dexó claro’l potencial del Red Bull pa esti gran premiu.

Tamién hai que destacar la entrada de dambos Williams ente los diez primeros, anque Sargeant nun pudo nin tentar de marcar un bon tiempu na Q3 depués d’acabar escontra les proteiciones. Dalgo asomeyao pasaría a Leclerc, que nun tuvo’l meyor de los fines de selmana. De fechu, había pocu enfotu no que pudiera facer Ferrari esti fin de selmana, ya’l puestu de Carlos Sáinz tanto na clasificación como na carrera, pesie al incidente de Leclerc el sábadu ya’l so resultáu’l domingu, foi dalgo más que positivo pal equipu italianu.

DOMINGU

GRAN PREMIU

El domingu l’anuncia d’agua yera mayor que lo que tuviéramos vienres y sábadu, y cumplió los pronósticos de principiu a final. En dando la vuelta de formación, los equipos y los pilotos decatáronse de que llegaba’l primer bastiazu y que taben toos con gomes de secu. La primer vuelta, aparte de tentar de caltenese dientro del trazáu, foi una llucha estratéxica por ver quien entraba primero a quitar les gomes de secu pa montar los intermedios. El primeru en facelo foi Pérez, al que nun tardaron n’imitar los demás equipos. Dellos pilotos decidieron aguantar dalguna vuelta más, pero la mayoría terminó parando, sacantes algunos como Alexander Albon o Oscar Piastri. El tailandés, de fechu, aguantó non sólo la salida y l’agua, sinon qu’allargó la parada hasta más de la mitá de la carrera.

Verstappen perdió temporalmente’l llideralgu cola so parada tardía, pero nun diba tardar en recuperala. Demientres, Fernando Alonso tuvo una gran salida que lu colocó mui pronto en podiu y nun tardó en superar a Lando Norris pa colocase segundu detrás de Verstappen. En pasando’l primer bastiazu, les coses fueron normalizando y la carrera estabilizando. Los pilotos que montaran gomes intermedies tuvieron de volver a entrar pa quitales cuando la pista yá entamaba a secase, dalgo que nun tardó en pasar. El baille de paraes nesti gran premiu de xuru foi de récor. Dellos pilotos, de fechu, recibieron penalizaciones por superar la velocidá llímite d’entrar nel carril de paraes: ye’l casu de Gasly y Pérez que recibieron cinco segundos de penalización caún. Pal mexicanu esto supondría perder el podiu en favor, precisamente, del francés.

Averándonos a la última tanda de vueltes y con delles batalles en pista como Sáinz y Gasly o Norris con Hamilton per detrás y Tsunoda per delantre, los cielos tornaron a abrise, dalgo que viníen anunciando los equipos dende cásique la mitá de la carrera. Pero esta vegada l’agua que cayó nun permitió continuar y declarose una bandera colorada que paró la carrera. En pasando’l temporal y con menos de diez vueltes pa terminar la carrera, Verstappen vía la so ventaya amenorgada con un Fernando Alonso per detrás que diba a por toes. Sicasí, l’holandés supo xestionar mui bien la resalida en colando’l coche de seguridá y nun tuvo problema dalu pa defendese del asturianu y poner dalgo distancia con él. Lo que sí nun pudo consiguir l’holandés foi la vuelta rápida, que foi p’Alonso.

Per detrás del pilotu d’Aston Martin, Pérez nun foi a abrir distancia con Gasly, y acabó perdiendo posición con él. El francés subió otra vuelta al podiu, dalgo que nun facía dende 2021 n’Azerbaixán. El compañeru de Gasly, Esteban Ocon, namás puso acabar décimu. Per detrás de Pérez entró Carlos Sáinz, que fue quién a caltener la posición de salida y tuvo dellos momentos interesantes en pista nos que pudimos velu pelear por posición. El so compañeru d’equipu, como yá diximos, tuvo un incidente con otru coche que dañó’l so monoplaza y lu dexó tocáu hasta que l’equipu decidió retirase.

En sextu llugar aportó Lewis Hamilton, que consiguió sacar puntos depués d’un sábadu bastante murniu. Fízolo amás depués de que’l so compañeru d’equipu que partía terceru nun pudiera ver la bandera a cuadros por un toque con Norris. Sicasí, la estratexa de Mercedes coles gomes nesti gran premiu nun foi de les meyores, ya’l propiu Russell nun entendía como, partiendo terceru, s’atopaba tan abaxo na clasificación delles vueltes más tarde.

Lando Norris y Oscar Piastri fueron sétimu y novenu, pero de xuru nun quedaron conformes col resultáu sobre too porque McLaren tinía abondo más potencial que’l qu’amosaron en carrera. Norris nun tardó en vese superáu por Alonso, y la tardanza a la hora de parar lu condergó a baxar de posiciones y tener que recuperales nunes condiciones de pista cambiantes. Piastri foi ún de los que decidió quedar en pista, pero tampoco nun funcionó la estratexa pa él.

Albon, como yá diximos, foi otru de los qu’aguantó en pista tres l’agua, y allargó la so parada más de la mitá de la carrera. Al final sumó otru bon númberu de puntos pal equipu. Sargeant tuvo otra visita a les proteiciones y nun pudo ver la bandera a cuadros. Dalgo asomeyao pasó con Zhou, que cuando empezó a llover na parte final de la carrera, perdió’l coche y acabó estrellándose. Nesos momentos fueron munchos los pilotos que tuvieron salides de pista ya incidentes. El compañeru de Zhou, Valtteri Bottas acabó nel puestu catorce.

Hai que rescamplar el trabayu de Liam Lawson con AlphaTauri. El neozelandés tuvo a ponese al volante del monoplaza depués de que Daniel Ricciardo rompiera’l metacarpu de la mano drecha nun accidente nos llibres del vienres. El debutante non sólo foi quién a acabar la carrera si non qu’amás fízolo per delantre del so compañeru d’equipu, Yuki Tsunoda. El xaponés rodó bona parte de la carrera nos puntos pero acabó desapaciendo al final por cuenta una penalización de cinco segundos por provocar un accidente. Namás pudo ser décimoquintu. Lawson pela so parte acabó nel puestu trece. En principiu tornaremos a velu al volante del AlphaTauri na viniente carrera nel circuitu de Monza.

Haas nun tuvo la meyor de les carreres con dambos pilotos fuera de los puntos. Hülkenberg namás pudo acabar doce y Magnussen tuvo de conformase col décimusextu llugar depués de recibir una penalización de cinco segundos por nun respetar la distancia de diez coches col coche de seguridá. Stroll tampoco nun puntuó y quedó a les puertes de los diez primeros n’undécimu llugar.

Casi nun descansamos y yá ponemos rumbu a Monza pal últimu gran premiu en territoriu européu enantes d’encaminanos a Asia. Demientres llega’l día, equí vos dexamos tolos númberos del fin de selmana nel circuitu de Zandvoort.