Gran Premiu de Miami 2023

L’añu pasáu la carrera que vimos nel recién estrenáu circuitu de Miami foi una d’eses que nun pasen a la historia por ser de les más emocionantes. Depués de Bakú la verdá ye que pocu nos prometíemos nel circuitu estauxunidense.

Y ye que’l circuitu d’Azerbaixán, que tantes espeutatives crea siempre, a la fin deceicionó más que nada, y llegar a Miami nun yera motivu de cellebración. Sicasí, anque nun tuviemos la meyor de les carreres de la historia, sí que ye verdá que dalguna cosina interesante pudimos ver.

Dende los entrenos, vimos a los pilotos teniendo munchos problemes, cometiendo munchos erros. La superficie del circuitu tuvo d’asfaltase otra vuelta depués de lo que se vivió en 2022, pero lo llamatible yera sintir a los pilotos falando de lo cambiante que yera l’agarre, dalgo a lo que tampoco nun ayudó la calor nin l’agua. El que pior lo llevó foi Charles Leclerc, que llegó a tener dos accidentes práuticamente nel mesmu puntu y ún dellos na Q3 del sábadu.

SÁBADU

Namás un güeyu al podiu de la sesión de clasificación del sábadu llevanos a entrugar qué foi lo que pasó con Verstappen y cómo ye que tán ehí Alonso y, sobre too, Sáinz. El madrilanu foi un pilotu estremau del que vimos en Bakú: dende’l vienres rodó mui rápido, tuvo cásique en tou momentu per delantre de Leclerc y, en xeneral, dio dos pasos alantre con respeutu a Azerbaixán.

Pero esti podiu atípicu nun tien más desplicación que l’accidente que mencionemos más arriba. Charles Leclerc, mui irregular esti fin de selmana, chocó escontra les proteiciones y acabó fuera de la clasificación con mui pocu tiempu restante pa qu’esta rematara lo que condergó al restu de pilotos a conformase col tiempu que tiníen marcao. El de Verstappen yera’l novenu meyor, y dende ehí tuvo d’entamar la carrera. Pero hebo quien s’aprovechó de les circunstancies como por exemplu Kevin Magnussen partió cuartu col so Haas y Gasly que clasificó quintu col Alpine.

Nun foi un bon día pa Hamilton que nun pasó de Q2, nin tampocu pa Stroll, que rindió mui por debaxo d’Alonso tol fin de selmana, mesmo en clasificación qu’en carrera. Sí tuvieron bon sábadu los dos Alpine: yá diximos que Gasly foi quintu pero ye qu’Ocon tamién entró na Q3 y clasificó octavu. Bottas diba zarrar esi grupu.

DOMINGU

Podiu familiar el de Miami, colos dos Red Bull y Fernando Alonso de vuelta p’acompañalos. Pesie al problema de la clasificación, nun había duldes de que Verstappen diba tener opciones si non de ganar, sí de facer un podiu. El neerlandés foi mui superior tol fin de selmana, marcando ritmos mui fuertes y amosando en pista que’l coche que tien esti añu-y permite facer cásique lo que quiera. Amás, la so xestión de les gomes dures coles qu’entamó la carrera lu ayudó a facer furrular la estratexa escoyida de dir a una parada de duros a medios, depués de más de cuarenta vueltes col mesmu compuestu. La facilidá cola que foi adelantando en pista a los pilotos que tinía per delantre, y lo poco que-y llevó pasar al so compañeru d’equipu depués de la so parada, amás del ritmu altísimu de les sos vueltes, son l’amuesa de qu’en Miami Max Verstappen nun tuvo quien lu parara. Pérez fexo lo que pudo dende una pole cola que probablemente nun cuntaba. Y aguantó, tentó de facer bona la so estratexa, estremada de la del so compañeru, pero nun tuvo forma de paralu. La brecha ente Verstappen y Pérez agrándase un pocu na clasificación de pilotos, pero lo importante pal mexicanu ye siguir sumando en segundu llugar y quiciás, eso sí, aprovechase más de los problemes qu’ésti tenga, como foi’l casu en Miami.

Alonso almitió tenese aburrío demientres la carrera, y ye que si miramos la distancia a la qu’entró detrás de los Red Bull (más de ventiseis segundos, dalgo que, sicasí, yá nun ye novedá) y a la qu’entró Russell per detrás d’él (alrodiu los siete), podemos comprobar que la so carrera foi más bien tranquila con dalguna batalla con Sáinz por posición y llueu con Verstappen, col que sabía que nun tinía muncho que facer. Aston Martin torna al podiu con Alonso y sólo puntúa con él per primer vegada esta temporada. Stroll tuvo una sesión de clasifición, como diximos, terrible, y pagólo en carrera. Namás pudo alcanzar el puestu doce.

Mercedes tuvo un fin de selmana previu al gran premiu bastante más discretu de lo que llueu amosaron. Yá comentemos que Hamilton nin siquier entró na Q3 y Russell entró por pocu. Sicasí llueu l’inglés pudo clasificar sextu el sábadu y en carrera rodar mui regular y sólidu pa terminar cuartu. Hamilton tuvo de trabayase más el puestu y les primeres vueltes-y costó abondo pasar coches, pero la so estratexa funcionó y acabó sextu.

En Ferrari sumen otru gran premiu deceicionante. Sáinz nun pudo retener la tercer posición munchu tiempu y amás el desgaste de les gomes condicionó muncho la so carrera, mesmo que la de Leclerc. Aparte, el madrilanu acabó penalizáu con cinco segundos por pasase nel llímite de velocidá del carril de pit, lo que lu condergó a quedar per detrás del Mercedes de Russell y col güeyu puestu nel de Hamilton que vinía per detrás. Ye verdá que lu vimos meyor qu’en Bakú, pero entavía creyemos que tien muncho más que dar. Lo mesmo podríemos dicir de Leclerc esti fin de selmana. Depués de dos accidentes, abúltanos lóxico que nun saliera col enfotu nin les ganes que saldría de normal, y vimos al monegascu bastante perdíu ya nun siendo quien a pasar a pilotos, en teoría más lentos qu’él, como por exemplu Magnussen.

El danés foi la pesadiella de dellos pilotos, sobre manera Leclerc, polos problemes que-yos dio p’adelantalu. El Haas namás pudo terminar décimu, xusto per detrás de los dos Alpine, pero en pista mereció dalgo más. El so compañeru Nico Hülkenberg acabó décimoquintu. Alpine a la fin pudo sumar con dambos pilotos un bon númberu de puntos pa compensar poles carreres pasaes y tamién aprovechando que McLaren nun puntuó. L’equipu de Woking dio un pasu atrás con respeutu a Bakú: Norris nun pasó de la Q1 y en carrera una embestida de De Vries lu obligó a parar enantes de tiempu, a lo que se sumó una estratexa arriesgada partiendo con gomes blandes que nun dio resultáu. Piastri acabó per detrás de Norris, colos mesmos problemes coles gomes blandes de partida, y nun pudo tampocu facer muncho más qu’él. L’australianu quedó penúltimu y Norris nel puestu diecisiete.

Fuera de puntos quedó tamién AlphaTauri. Otra vuelta más Tsunoda queda per delantre de De Vries pesie a que’l xaponés clasificó per detrás d’él. L’erru del choque contra Norris tamién lu dexó a él tocáu y condicionó la so carrera. El neerlandés namás pudo ser antepenúltimu mientres que Tsunoda quedó a les puertes de puntuar, nel puestu once.

Alfa Romeo tuvo un meyor sábadu que domingu, y Bottas llegó a entrar en Q3 pero nin él nin Zhou entraron en puntos el domingu. Tuvieron como estos díes, perdíos en posiciones baxes ya ensin muncho que facer. Podríemos dicir dalgo asomeyao de Williams. Foi quiciás el fin de selmana más floxu del equipu cuntando con que dambos pilotos acabaron la carrera. Albon acabó décimocuartu y Sargeant foi l’últimu en ver la bandera a cuadros.

Sacante’l resultáu esperáu anque más trabayau que davezu de Max Verstappen, lo más interesante de la carrera tuvo siempre nos puestos más baxós y los adelantamientos que díbemos viendo buscando subir de posición. Nun foi una carrera brillante, pero sí tuvo dellos momentos entreteníos. Ponemos agora rumbu a Italia al circuitu d’Ímola. Demientres llega’l día, equí podéis consultar tolos númberos y posiciones del fin de selmana en Miami.