Gran Premiu de Gran Bretaña 2023

Hai circuitos nel calendariu de F1 que nun suelen deceicionar. Silverstone ye ún d’ellos. Esti fin de selmana vimos coses en pista que yá esperábemos, pero delles otres coles que nun cuntábemos.

Y ye que nada nos facía albidrar el resultáu primero de la sesión de clasificación del sábadu ya’l podiu del domingu. Cuando l’equipu McLaren dixo que trayía meyores n’Austria y Norris quedó cuartu, valoremos positivamente eses actualizaciones y tiníemos interés por saber qué podía facer Piastri con elles. Amás, l’equipu trayía un alerón delanteru nuevu que diba montar Norris. El resultáu, segundu y terceru na clasificación y podiu pa Norris el domingu. Pero, vamos dir por partes.

SÁBADU

El vienres en Silverstone nun dexó muncho que cuntar más allá de delles quexes de los pilotos pola falta d’agarre de les gomes, y l’ambiente de les grades incluso siendo un vienres. El sábadu, con dalgo agua na primer parte del día, prevíemos una sesión de clasificación interesante. Y anque l’agua a la fin nun asomó muncho, sí foi un elementu que tener en cuenta pa los pilotos, sobre manera la rapidez cola que’l circuitu se diba secando y tamién la posibilidá de que tornara a llover. Víemos dellos errores per parte de los pilotos que trataben de dir adautándose rápido al trazáu pa marcar una bona vuelta y pasar a la siguiente sesión. Sergio Pérez foi, otra vuelta, el protagonista negativu del sábadu. El mexicanu tentó de facer una vuelta más que’l restu pa entrar na Q2 pero nun foi quien y quedó fuera. Magnussen tuvo problemes col coche y acabó últimu y la sorpresa foi Logan Sargeant, que consiguió pasar a Q2 na so meyor clasificación de la temporada. Perriba, Norris llideró la primer tanda.

L’inglés tamién diba lliderar la Q2 y, en llegando a la Q3 fexo a les grades aguantar la respiración cuando se punxo en pole provisional mientres víemos que Max Verstappen vinía en vuelta lanzada y ficiera un segundu seutor bastante probe. Sicasí, l’holandés compensólo con un tercer seutor perfeutu que lu devolvió a lo cimero de la clasificación y a sumar otra pole na so carrera deportiva. La sesión de clasificación dexó una cosa clara: McLaren diba mui rápido y yá non sólo con Norris, tamién con Piastri, que quedó xusto per detrás del so compañeru en tercer llugar. Los Mercedes nun taben contentos coles sos sesiones y Aston Martin desapaecieron (Alonso clasificó novenu y Stroll nun entró en Q3). En Ferrari, au paez que nun reina’l meyor de los ambientes, conformáronse con quedar cuartu (Sáinz) y quintu (Leclerc). El madrilanu quexóse al equipu por mandalu dexar pasar a Leclerc pa que ficiera una vuelta llanzada primero d’él cuando yera Sáinz quien taba en pior posición na clasificación. Ente esto y lo que vimos n’Austria de nun permitir que’l madrilanu pasara al monegascu pa tentar de ganar dalgo tarrén cola cabeza, les coses abulten daqué negatives.

Hai que rescamplar l’actuación d’Alexander Albon y de Williams en xeneral, que pasín ente pasu va esguilando nes posiciones y tornándose veceru de les diez primeres posiciones. Tamién hai que señalar la descalificación de Valtteri Bottas que quedó ensin gasolina suficiente pa entregar la cantidá de combustible reglamentaria que pide la FIA n’acabando la clasificación lo que lu obligó a salir últimu.

DOMINGU

El domingu, una de les primeres cuestiones que nos llegaba a la cabeza yera si McLaren diba ser quien a aguantar arriba y siquier desafiar a Verstappen pola primer posición. Depués de lo que vimos n’Austria, au Norris tamién salía mui arriba pero perdió too a pocos metros de salir, tiníemos razones pa duldar, pero l’inglés non sólo nun perdió posiciones si non que foi quien a pasar a Verstappen que tuvo una mala salida depués de que-y patinara la rueda. Norris nun desaprovechó la oportunidá del erru del holandés y colocose primeru. Verstappen tentó de pasalo inmediatamente, pero’l pilotu de McLaren aguantó y pasó delles vueltes en cabeza hasta que s’activó’l DRS y con eso’l Red Bull yá yera imparable. Sicasí, nun vimos el domingu un dominiu aplastante de Verstappen. En carreres pasaes, la ventaya cola que finalizaba les carreres con respeutu al restu de pilotos yera d’alrodiu los venti segundos, pero cada vegada ye más normal que la distancia seya más curtia y de fechu, Norris y Piastri aguantaron bastante el ritmu del Red Bull, copiando práuticamente los tiempos por vuelta.

Per detrás, nun hebo grandes incidentes na salida, salvo algún pilotu que tuvo de garrar la escapatoria nun momentu dau, como ye’l casu de Hamilton. La mayoría de pilotos apostaron, de salida, poles gomes medies, con dalgún qu’escoyó les dures y poques blandes. Ente los qu’escoyeron blandes taba George Russell, que dio una lleición de xestión de gomes faciendo que-y aguantaren la mitá de la carrera. El bon rendimientu y pocu desgaste d’elles fexo que l’inglés pudiera siguir rodando al ritmu que los sos rivales y ensin perder rendimientu nes gomes, dalgo que quiciás naide nun esperaba. De fechu, nes paraes, dellos equipos tomaron nota d’esi rendimientu y decidieron abandonar la estratexa de pasar de medios a duros pa escoyer los blandos. Hamilton foi ún d’ellos, pero al inglés nun-y funcionó tan bien como al so compañeru. Sicasí, subió al podiu.

Y ye que la carrera foi estabilizándose tres delles rondes de paraes: Leclerc foi ún de los primeros en parar, pa confusión del pilotu monegascu que consideró que paraba enforma pronto. Piastri tamién paró primero que los que diben en cabeza y montó gomes dures, McLaren manteniéndose fiel a la so idea de principiu pesie a lo que se vía con Russell y les blandes. La tranquilidá y la normalidá diben vese interrumpíes por un, primero coche de seguridá virtual y llueu físicu provocáu pol Haas de Magnussen, que quedó tiráu por un problema col motor. Dellos pilotos como Alonso o Norris nun pararan tovía y dalgunos aprovecharon pa parar anque yá lo ficieran, como ye’l casu de Leclerc, que nun taba contentu coles gomes dures y pa camudales. Norris pidiera que-y punxeran gomes blandes, pero l’equipu, mesmo que con Piastri, decidió aguantar la estratexa y montar dures. L’inglés foi mui escéuticu sobre la decisión, sobre manera cuando supo que per detrás vinía’l Mercedes de Hamilton con gomes blandes.

Na resalida, Verstappen nun tuvo problema pa poner distancia rápido ente él ya’l restu gracies a que Norris tinía más preocupación d’evitar que Hamilton lu pasase que d’alcanzalu a él. Sicasí, l’holandés nun pudo más qu’abrir un güecu que, viendo lo d’otres carreres, podríemos calificar de discretu, nun llegando a los cuatro segundos. Norris aguantó a Hamilton, que desesperáu, nun vía manera de pasar al so compatriota y tuvo de conformase con ser terceru. Per detrás, Russell tuvo’l mesmu problema con Piastri, al que tampoco nun yera quien a adelantar. Dambos McLaren diben mui rápido en Silverstone, siendo’l segundu coche más veloz del domingu.

Quien nun pudo aprovechar nin coche de seguridá nin facer funcionar la so estratexa foi Ferrari. Tanto Leclerc como Sáinz entraron nos puntos pero mui por detrás de lo esperable, novenu y décimu. Nun funcionó la estratexa, les gomes nun rindíen como queríen los pilotos y amás, el restu d’equipos diben más rápido. Foi la tormenta perfeuta pal equipu italianu.

Aston Martin mantúvose na llínia del fin de selmana, con una actuación discreta d’Alonso, que sumó puntos quedando sétimu y con Stroll, otra vuelta, perdíu nes posiciones d’abaxo y con una sanción por un toque con Gasly. El canadiense ta teniendo munchos problemas pa sumar puntos, tiniendo amás actuaciones bastante probes.

Williams confirmó’l domingu el pasu alantre que vinimos comentando d’ellos y anque sólo sumó con Albon, Sargeant quedó a les puertes de los puntos. Albon, pela so parte, quedó octavu, pero detrás d’Alonso pero per delantre de dambos Ferrari. L’equipu inglés colócase sétimu na clasificación, empatau a puntos con Haas.

Col podiu de Norris ya’l cuartu puestu de Piastri, McLaren pasa a Alpine nel mundial. L’equipu francés nun pudo ver la bandera a cuadros con nengún de los sos pilotos: Ocon foi’l primer abandonu de la carrera por una fuga nel so coche y Gasly tuvo un accidente con Stroll que desllantó’l coche y lu dexó fuera.

Sergio Pérez esguiló posiciones hasta acabar sextu. El mexicanu protagonizó bonos adelantamientos, pero siempre quedamos cola sensación de que, pesie a que faga una gran carrera na qu’adelante a munchos pilotos, nun tendría de tar faciendo eso si non peleando con Verstappen pola victoria o a lo menos allegándose al podiu. En cuenta d’eso, el mexicanu lleva delles carreres teniendo que trabayar de más los domingos por nun facer una bona vuelta’l sábadu col meyor coche qu’hai agora mesmo na parriella.

AlphaTauri suma y sigui nos puestos más baxos, esta vegada zarrando De Vries la clasificación pero con Tsunoda xusto perriba. Les meyores que fueron trayendo a les carreres nun tán dando los resultaos esperaos y la so desgracia ye que cada vegada s’alloñen más los equipos d’enriba na clasificación. Alfa Romeo nun puntuó tampocu, pero suel quedar per delantre y nel mundial de constructores agora mesmo tien una ventaya de siete puntos que, nesos puestos d’abaxo de la tabla, son munchos. Tampoco nun puede despistase Haas, que ta acabante de ver como Williams pasó de tar últimu a tar sétimu en delles carreres. L’equipu estauxunidense nun tuvo’l so fin de selmana, con Magnussen teniendo problemas el sábadu y tamién el domingu, y Hülkenberg desapaecíu y terminando fuera de los puntos nel puestu trece.

Zarramos el Gran Premiu de Gran Bretaña y ponemos rumbu a Hungría. En teoría, nesti circuitu debiéramos ver despertar a Aston Martin otra vuelta y nun debiéramos cuntar con que McLaren amosaran el mesmu rendimientu qu’en Silverstone. Pero eso ye sólo la teoría. Mercedes tamién espera siguir trabayando coles meyores que van trayendo pa faceles funcionar meyor entá de lo que tenemos visto hasta agora. Demientres nos allegamos al Hungaroring, equí vos dexamos tolos númberos d’esti fin de selmana de carreres en Silverstone.